WebRwanda.com

🔒
❌
There are new available articles, click to refresh the page.
Today — May 29th 2017dove.rw

Abafite ubumuga bwokutabona basaga ibihumbi 57 nibo biteganyijwe ko bazatora bakoresheje impapuro za bugenewe zizwi nka Brailles

By John Bagabo

Nkuko byemejwe n’umunyamabanga mukuru wa komisiyo y’amatora Munyaneza Charles mu kiganiro kihariye yagiranye n’ikinyamakuru Dove.rw munyamabanga mukuru wa komisiyo y’amatora Munyaneza Charles avugako kugeza ubu imyiteguro y’amatora imezeneza ku buryo bushimishije.

Munyaneza yavuzeko kugeza ubu imibare bafite muri komisiyo y’amatora ari ibihumbi 57 y’abafite ubumuga bityo ko nta kibazo impapuro zabugenewe zo gutoreraho abafite ubumuga zamaze gutegurwa

Yagize ati” ku geza ubu imibare twahawe n’inamankuru y’abafite ubumuga mu gihugu NCPD  dufite abasaga ibihumbi 57 bityo impapuro bazatoreraho zamaze gutegurwa”

Ku kibazo cyuko haba hari abafite ubumuga bwo kutabona batazi gukoresha izompapuro za Brailles, Munyaneza yavuzeko ntakibazo kuko izompapuro zikoranye ikorana buhanga ku buryo yaba uzi kuzikoresha cyangwa itabizi bose bazazitoreraho ntakibazo bagize.

Ibi kandi byuko abafite ubumuga bwo kutabona  ntambogamizi bazagira mu kwitorera umukuru w’igihugu, byashimangiwe na Hon: Rusiha Gaston ubwo yavuze yuko mu matora aherutse yogushaka umudepite uzahagararira abafite ubumuga muri EAC  abafite ubumuga bwo kutabona bakoresheje Brailles, kandi ko byagenzeneza bityo ko bafite ikizere yuko nta muntu ufite ubumuga bwo kutabona uzongera kubuzwa amahirwe yiokwitorera umukandida ashaka.

Amatora y’umukuru w’igihugu ateganyijwe mukwezi kwa kanama 2017 ku matariki ya 3 ku banyarwanda baba hanze ndetse no kuri 4 ku banyarwanda baba mu gihugu imbere.

John BAGABO

www.dove.rw

 

The post Abafite ubumuga bwokutabona basaga ibihumbi 57 nibo biteganyijwe ko bazatora bakoresheje impapuro za bugenewe zizwi nka Brailles appeared first on DOVE MAGAZINE.

Somaliya: Al-Shabab yicishije umuntu amabuye

By Alphonse Bizimana

Al-Shabab

Umugabo w’imyaka 44 y’amavuko yaraye yicishijwe amabuye ayatewe n’abarwanyi ba al-shabab mukarere ka Rama Addey mu mumajyepfo ya Somaliya.

Ku rubuga rwa internet rwa al-Shabab, bavuga ko uwo mugabo ashinjwa icyaha cy’ubusambanyi mu kirwa cya Ufurow kubirometero 60 uvuye mu mujyi wa Baidoa. Al-Shabab ivuga ko ku itariki ya 20 z’uku kwezi kwa gatanu niho bamenyeshejwe ko ubwo busambanyi bwakozwe.

Mu majwi yashizwe ku rubuga rwabo kuri internet ejo kucyumweru, umucamaza wo muri uwo muri ako gatsiko kabarwanyi avuga ko uwitwa Dhaywo Mohamed Hassan yemeye icyaha cyo guca inyuma abagore babiri asanzwe afite. Al-Shabab imushinja kandi ko yateye inda umugore utari umwe mubo bashakanye.

Si ubwambere ako gatsiko kabarwanyi gahana umuntu kamwicisha amabuye.

Sheikh Abdirahman Sharif umwe mu bayobozi b’inyigisho z’idini ya Islamu avuga ko ubwo bwicanyi butemewe  n’amategeko kandi ko ako gatsiko kadafite uburenganzira bwo guhana.

Alphonse Bizimana

WWW.DOVE.RW

The post Somaliya: Al-Shabab yicishije umuntu amabuye appeared first on DOVE MAGAZINE.

Gakenke: Abaturage Bariye Karungu Ngo Ntibazagurisha Amajwi mu Matora ya Perezida

By John Bagabo

Bamwe mu baturage bo mu karere ka Gakenke bavugako bari maso ko ntamuntu uzabaca mu rihumye abasaba ko bamusinyira kugirango azabone amajwi amwemerera kujya ku rutonde ruzemezwa na komisiyo y’amatora. 

Abo baturage bashimangira ko bazineza agaciro k’amajwi yabo bityo ko ntawabashukisha amafaranga ngo bamusinyire mu matora ya Perezida mu gihe ntakizere bamufitiye.

Mu gihe hari bamwe mu bashaka kuziyamamariza umwanya w’umukuru w’igihugu mu matora ateganyijwe mu kwezi kwa Kanama uyu mwaka, hari bamwe muribo batangiye gusinyisha ababashyigikiye arinako babaha amafaranga kugirango buzuze umubare w’abantu basabwa ngo bemererwe kuba abakandida nkuko biteganywa na komisiyo y’amatora mu Rwanda.

Kimwe mu bintu bibujijwe abantu bifuza kuba abakandida bigenga mu matora ya Perezida ni ugusinyisha ababashyigikiye babanje kubaha ibiguzi kuko komisiyo y’amatora ibifata nka ruswa kuko bashobora kumusinyira atari uko bamushyigikiye ahubwo ari uko bakurikiranye indonke muri uko kubasinyira.

Umunyamabanga Nshingwabikorwa wa Komisiyo y’igihugu y’amatora Charles Munyaneza, mu kiganiro aherutse ku girana n’itangazamakuru yavuze  ko mu minsi ishize hari  umwe mu bashaka kuziyamamariza umwanya w’umukuru w’igihugu wakoze ikosa ryo gusinyisha abantu mu gihe kitagenwe ndetse ngo akanabaha amafaranga kugirango bamusinyire.

Myaneza yagize ati: “…..Ubundi gusinyisha ni mu masaha y’akazi, hari uwo twari tugiye kugirana ikibazo arimo asinyisha ni joro, arimo atanga n’amafaranga ariko twamubwiye ko aba abiretse! Gusinyisha ni ibintu bikorwa kugeza saa kumi n’ebyiri kandi bikorerwa ahantu hazwi runaka, kubikora nijoro nk’ibyo twumvise ntabwo byemewe”.

Bamwe mu baturage batuye muri imwe mu mirenge  ya Gakenke ndetse na Kivuruga bavugako bazineza agaciro k’ijwi ryabo bakavugako ntawabaca mu rihumye ngo abashukishe amafaranga ku girango bamushyigikire mu gihe bazineza ko ntacyo azabagezaho.

Bamwe muri abo baturage bavugako batatinyuka gutora umuntu runaka ngo nuko yabahaye amafaranga, ahubwo bazatora bakurikije uburyo babona umukandida ko ashobora kuzabageza ku iterambere rirambye.

Abandi baturage nabo bemeza ko gutora umuntu bitewe nuko yaguhaye amafaranga babifata nka ruswa, aho bemeza ko iyo ufite mu mutwe hazima ushobora gukorera amafaranga ukayabona biturutse mu bikorwa byawe.

Aha kandi niho  Prof Kalisa Mbanda umuyobozi wa Komisiyo y’igihugu y’amatora mu Rwanda asaba abayobozi b’inzego z’ibanze gufasha abifuza kuba abakandida bigenga ariko nabo abasaba gukora mu buryo bwubahirije amategeko.

Yagize ati: “…..Abashaka kuba abakandida bakwiye kumenya uko bakorana n’abayobozi, bagasaba ubufasha kandi bigakorerwa ahantu hakwiriye ntibajye mu tubari  cyangwa ahandi  hatemewe gukorerwa icyo gikorwa”.

Bwana Prof Mbanda yakomeje agira ati: “…….Abanyarwanda bafite uburenganzira bwo gutora no gutorwa kandi ko kubona amasinyatire ari amategeko abisaba”.

Uyu muyobozi kandi yibukije ibi yavuze ko biri mu mabwiriza yasohotse mu igazeti ya Leta abayobozi bagomba kumenya ibyasohotse mu igazeti no mu mabwiriza ya komisiyo y’igihugu y’amatora bakabyubahiriza borohereza abashaka gusinyisha.

Kugirango umuntu yemererwe kuba umukandida wigenga mu matora ya Perezida mu Rwanda asabwa kugira byibuze abantu 600 bamusinyiye bemeza ko bashyigikiye kandidatire ye kandi muri buri karere hagomba kubonekamobyibuze abantu batari munsi ya 12.

Amatora ya Perezida ateganyijwe uyu mwaka mu kwezi kwa Kanama, ku geza ubu hari bamwe mu bamaze ku vugako baziyamamariza uwo mwanya nk’abakandida bigenga, mu ri abo harimo Mpayimana Phillipe,Diane Shimwa Rwigara na Mwene data Jilbert.

thenextstar

John BAGABO
WWW.DOVE.RW

The post Gakenke: Abaturage Bariye Karungu Ngo Ntibazagurisha Amajwi mu Matora ya Perezida appeared first on DOVE MAGAZINE.

Police Handball Club ikomeje kwitwara neza muri Shampiyona

By Alphonse Bizimana

Police Handball Club

Ku cyumweru tariki ya 28 Gicurasi, shampiyona y’umukino w’intoki (handball) yarakomeje ikaba yari igeze ku munsi wayo wa 13 kuri Police handball club. Ku mukino wayihuje na GS St Aloys Rwamagana,  wabereye I Rwamagana ku wa gatandatu taliki ya 27 Gicurasi,  warangiye ari ibitego 31 bya  Police handball club kuri 21 bya GS St Aloys.

Mu gihe bukeye bwaho, Police Handball yagiye I Gatsibo aho yahuye na ADEGI Gituza, umukino warangiye ku nsinzi ya Police Handball, aho yari ifite ibitego 36 kuri 21 bya ADEGI Gituza.

Umutoza wa Police Handball Club , AIP Antoine Ntabanganyimana  yavuze ko imikino yombi itakomereye ikipe ye bitewe n’imyitozo ihagije abakinnyi atoza bakoze. Uyu mutoza akomeza avuga ko ibitego ikipe ye yatsinze byashoboraga kwiyongera, ariko imiterere y’ibibuga bakiniyeho yababereye imbogamizi .

AIP Ntabanganyinama  yakomeje avuga ko ikigiye gukurikiraho ari ugutegura neza ikipe ye igakora imyitozo ikaze mu rwego rwo kuzitwara neza mu mikino iri  imbere  dore ko kuri we asanga kuyitsinda bizamwongerera amahirwe yo kwegukana igikombe cya shampiyona.

Kugeza ubu Police Handball Club ni iya kabiri ku rutonde rw’agateganyo rwa shampiyona n’amanota 39 kuri 39 imaze gukinira(imikino 13) mu gihe ku mwanya wa mbere   haza  APR  Handball club n’amanota 40 kuri 42 imaze gukinira(imikino 14)  kuko hari uwo yatsinzwemo na Police HBC  ariko Police Handball ikaba ifite umukino w’ikirarane itarakina na ES  Kigoma.

Aho umutoza Ntabanganyimana agira ati:” Nitumara gukina imikino yose, twizeye kuzaba turi ku mwanya wa mbere kandi nk’uko bisanzwe, intego y’uyu mwaka ni igikombe kandi turi mu nzira yo kubigeraho kubera ubuyobozi bwiza Police Handball ifite, n’umurava tutazahwema gukorana muri uyu mwaka w’imikino.”

Mu mpera z’icyumweru gitaha, Police HBC izitabira irushanwa mpuzamahanga ryo kwibuka abazize jenoside yakorewe Abatutsi mu 1994, rizabera mu Rwanda, rikazahuza amakipe yo mu bihugu by’u Rwanda, Uganda, Tanzaniya , Kenya na Zambiya.

The post Police Handball Club ikomeje kwitwara neza muri Shampiyona appeared first on DOVE MAGAZINE.

Ibyo Byose ni Akagambane Kagamije Kunyangisha Abanyarwanda – Jay Polly

By Abdou Bronze

Nyuma y’inkuru y’umusore waryozaga Jay Polly umwenda ndetse akemeza ko natamwishyura azasakaza amashusho ye asambana n’umurundikazi, Jay Polly usigaye yiyita Kabaka yemeza ko atari gusa ahubwo kumuharabika hari akagambane arimo gukorerwa kagamije kumwangisha abanyarwanda.

Ubwo Jay Polly yaherukaga kuganira na Dove Magazine yahakanye ibivugwa n’umusore witwa X Dealer aho yavugaga ko Jay amufite umwenda ndetse ko natamwishyura yiteguye gusakariza isi amashusho ye asambana n’umukobwa w’impunzi ukomoka i Burundi uri mu nkambi y’abarundi mu Rwanda.

Nyuma yo guhakana aya makuru ndetse ashimangira ko yiteguye kwiyambaza inkiko yaje kongeraho ko ibyatangajwe n’uriya musore byose ari umugambi w’akagambane uri gukorwa ugamije kumwangisha benshi mu rwego rwo kumwambura igikundiro no kumwibagiza benshi muri muzika nyarwanda.

Jay Polly ati: “……Amakuru abenshi barikumva amvugwaho ahanini ni ukumbeshyera,ni agatsiko k’abantu bafite umugambi wo kunyangisha no kumparabika ngo nkunde namburwe igikundiro mfite”.

 

Ese koko Jay Polly yaba ari gukorerwa akagambane?

Mu mwaka wa 2012 umuraperi Jay Polly yerekeje muri Tanzania no muri Kenya muri gahunda ze z’ubuhanzi. Ubwo yageraga i Nairobi byavuzwe ko yaba yafunzwe, bivugwa ko ngo yaziraga gushaka gukoresha impapuro mpimbano zo kujya mu Bwongereza rwihishwa. Gusa Jay Polly yaje guhita anyomoza ayo makuru, aho yanibasiye mu ruhame bamwe mu banyamakuru arabatuka arabandagaza.

Jay Polly akigera mu Rwanda, yumvikanye kuri Radio Flash FM (ari kumwe n’abanyamakuru Rutamu na Dj Alex) aho mu gusobanura iby’iyo nkuru yamwanditseho Jay Polly yatukanye yibasira bamwe mu banyamakuru babitangaje.

Jay Polly yavuganye uburakari bwinshi avuga ko mu Rwanda hari abanyamakuru baba batifuza ko umuhanzi yatera imbere ahubwo bagaharanira kumusenya gusa.

Aha Jay Polly yatunze agatoki umunyamakuru Ally Soudy wakoraga kuri Radio Isango Star uku kumutunga agatoki Jay Polly yabivuze yikoma amagambo yari yanditswe ku rubuga rwa Facebook rw’ikiganiro Sunday Night (avuga ko ari Ally Soudy wayanditse) avuga ko n’ubwo Jay Polly yari yahakanye ko atafunzwe, bo bafite gihamya bazatangariza kuri Radio mu kiganiro.

Aha Jay Polly yasomye ubutumwa yari yanditse asubiza Sunday Night kuri ayo magambo y’uko bafite gihamya bazatangariza kuri radio, ari naho humvikanyemo ibitutsi Jay Polly yavuze.

Yagize ati: “…Murashaka gucuruza sha Ally Soudy we? Okay nzaba mpari munyereke uburyo mfungiye Kenya, ariko nta n’ubwo mugira n’ubwenge? Umuntu afungwana ikoranabuhanga? Ko ndi muri Kigali se kandi ko nta n’aho muzanca? Nta tangazamakuru ryanyu. Kenya, UG (Uganda) na Tanzaniya baharanira ko abahanzi babo batera imbere mwembwe murarwana no gusenya ibyo twubatse. Kiriya cyaha mu Rwanda gihanirwa n’amategeko. Mu Rwanda sinzi icyo munshinja sha duherukana munteranya na King James ngo naramusebeje ahubwo murasebye. Turakizwa na Leta. Ibambe wo ku Nyarwanda, Patycope n’utundi twana mwigishije twose kuvugavuga munyitege. Leta nishyire ingufu mu itangazamakuru naho ubundi bararera amadebe nk’aya ngaya?”

Nyuma y’uko Jay Polly asohoye ubu butumwa, yafatiwe ibyemezo n’itangazamakuru indirimbo ze zirahagarikwa abura amahirwe yo kwitabira irushanwa rya PGGSS ndetse asa n’uwibagiranye mu ruhando rwa muzika. Bidatinze yabonye ko bimurangiriyeho asaba imbabazi itangazamakuru arugurirwa yongera kwigaragaza byanamuhesheje amahirwe yo kwegukana irushanwa rya PGGSS.

Ibi byose nibyo Jay Polly aheraho yemeza ko yaba ari akagambane gaterwa n’inzika ya bamwe.

Mu mpera z’umwaka wa 2016 Jay Polly afatanyije na Amag The Black mu kumurika Album yabo bahuye n’igihombo aho igitaramo bari bateguye kuri Petit Stade mu mujyi wa Kigali cyitabiriwe n’abantu mbarwa bibashyira mu gihombo kitagira ingano.

 

Jay Polly yasohoye Indirimbo irimo Abakobwa bambaye Ubusa

Jay Polly aherutse gushyira hanze amashusho y’indirimbo ye nshya yise “Too Much” indirimbo itavugwaho rumwe bitewe n’abakobwa biyambitse ubusa binengwa n’umuryango nyarwanda ndetse benshi ngo ntizakandagire kuri Televiziyo y’igihugu ndetse ngo amashusho yayo akwiye gucibwa ahacururizwa indirimbo.

Nyuma gato y’uko aya mashusho asakaye bamwe mu bahanzi bayirimo barasaba ko ihagarikwa, Jay Polly n’uwayikoze Nameless ubu nabo ntibavuga rumwe barahanganye.

Ese Jay Polly ari mu bihano nanone?

Yenda koko yafungiwe amayira n’itangazamakuru cyangwa ntagikunzwe.
Nk’abakunzi ba muzika nyarwanda bazi ibigwi bya Jay Polly muri Hip Hop muduhe ibitekerezo byanyu kuri [email protected]

Abdou Bronze
WWW.DOVE.RW

 

The post Ibyo Byose ni Akagambane Kagamije Kunyangisha Abanyarwanda – Jay Polly appeared first on DOVE MAGAZINE.

Rayon Sports na APR zagabanye amanota mu mukino ubanziriza uwa nyuma wa shampiyona

By Alphonse Bizimana
Umukino w’umunsi wa 29 wa shampiyona waberaga kuri sitade ya Kigali i Nyamirambo wahuzaga Rayon Sports yari yakiriye APR FC urangiye amakipe yombi anganya 1-1
Umukino watangiranye imbaraga nyinshi ku mpande zombi nk’uko byari byitezwe, ku munota wa mbere gusa w’umukino Moustapha yarekuye ishoti rikomeye ariko abinyuma bawushyira muri koruneri itagize icyo itanga. APR yahise nayo ibona koruneri, bayiteye umupira ugarurwa n’umutambiko w’izamu. Ku munota wa munani APR yabonye coup franc hafi y’urubuga rw’amahina ariko Fiston awutera hejuru y’izamu.

Umukino wari ukazi ku mpande zombi ariko waryoheye aboawitabiriye

Ku munota wa 12, APR yongeye kubona coup franc ariko nayo ntiyatanga umusaruro.Nyuma y’iminota itatu, Savio yakoze akazi gakomeye ahagarika umukinnyi wa APR wari uri imbere ya Bakame akiza izamu gutyo. Ku munota wa 19 Pierrot yateye coup franc yari ibonetse ku ruhande rwa Rayon Sports ariko Djabel umupira awutera ku ruhande rw’izamu gato.
Ku munota wa 25 Issa Bigirimana yaboneye ikipe ye igitego cya mbere biturutse ku kwibeshya ko yaraririye maze Mugabo na Ange bisanga yamaze kuroba Bakame utari kugira icyo akora.
Nyuma y’iminota 4, Rayon Sports yagerageje kwishyura ariko amahirwe ntiyayisekera. Bitunguranye ku munota wa 35, Masudi yakoze impinduka ya mbere aho Muhire Kevin yasimbuye Moustapha. Rayon sports ishyiramo imbaraga ariko habura amahirwe yo kubona izamu. Igice cya mbere cyarangiye nta gihindutse, Rayon Sports ijyana umukoro wo kwiga uko yagombaga kwishyura iki gitego.

Mu gice cya kabiri Rayon Sports yaje yariyr karungu ku buryo ku munota wa 46 gusa Tidiane Koné yishyuye igitego n’umutwe nyuma yo guherezwa neza na Muhire Kevin. Iki gitego cyongereye imbaraga abasore ba Masoudi maze si ugutambaza umupira bivayo, gusa amahirwe yose bageragezaga bagasanga umuzamu Kimenyi wa APR ahagaze neza imipira akayikuramo. Uyu muzamu ni nawe waje kugirwa umukinnyi w’umukino (home du match).
Rayon Sports yakomeje gusatira ku buryo bukomeye ndetse inarusha APR ku buryo bugaragara, gusa umukino warinze urangira itabashije gushyiramo ikinyuranyi bikomeza kuba 1-1 ari nako amakipe yombi anagabana amanota, ibi bikaba byahaye Rayon Sports kugeza ku manota 70 ikarusha APR 13 kuko ifite 57 ikaba ku mwanya wa 3 nyuma ya Police.
Muri rusange iikigeranyo cy’uko umukino wagenze kerekanye ko Rayon Sports yarushije APR kwiharira umupira mu kibuga ku kigereranyo cya 59% ku mukino wose mugihe APR yagize 42%. Dore inchamake y’uko umukino warangiye bihagaze.

11 babanjemo ku ruhande rwa Rayon Sports: uhereye ibumose: Manzi Thierry, Mugabo Gabroel, Nsengiyumva Moustapha, Mugheni Fabrice, Savio Nshuti, Ndayishimiye Bakame, Manishimwe Djabel, Kwizera Pierrot, Niyonzima Olivier Seif, Tidiane Kone na Mutsinzi Ange

Abanjemo ku ruhande rwa APR

Uyu mukino wasifuwe na Ishimwe Claude mu kibuga hagati. Aha yari ifoto y’abasifuzi na ba kapiteni bombi Bakame na Rusheshangonga

Abafana bari bitabiriye uyu mukino ari benshi

Imifanire yo ku rwego rwo hejuru ku ruhande rwa Rayon Sports niyo yaranze uyu mukino

The post Rayon Sports na APR zagabanye amanota mu mukino ubanziriza uwa nyuma wa shampiyona appeared first on DOVE MAGAZINE.

Uko “Ruti” Yariye Karungu Akinjira mu Njyana ya Hip hop Iwabo Ari Abakirisitu

By Abdou Bronze

Ndayisaba Aime ku izina ry’ubuhanzi wiyita “Ruti”, ni umuhanzi mushya ukizamuka winjiye mu njyana ya Hip hop nyuma y’igihe kinini agenda inyuma y’abaraperi abigana none yahisemo gushyira ahagaragara indirimbo ye yambere.

Ruti ufite imyaka 23 y’amavuko akaba umusore umwe rukumbi mu muryango w’abakobwa b’abatambyi.

Uyu musore aganira na Dove Magazine yemeje ko amaze imyaka 8 yumva injyana ya Hip Hop akanagerageza no kwigana abayiririmba bituma afata umwanzuro wo gushyira ahagaragara indirimbo ye ya mbere yitwa “Nkunda u  Rwanda”.

Mu kiganiro yagiranye na Dove Magazine Ruti yagize ati ”….Nakuze nkunda kumva no kuririmba Hip Hop gusa nkatinya kubikorera mu maso y’ababyeyi kuko ari abakirisitu natinyaga ko bamfata nk’ikirara bakampana”.

Ruti akomeza agira ati ”…..Uko imyaka yahitaga indi igataha nabonye ntakomeza kubyihanganira maze gukura nsoje amashuri yisumbuye ntangiye Kaminuza, naje kwifatira umwanzuro ntitaye kubizashimisha ababyeyi ntangira iyi njyana”.

Umuraperi mushya muri Hip hop yamaze gushyira ahagaragara indirimbo ye yambere “Nkunda u Rwanda” akaba yizeye ko igiye kumufungurira amarembo yo kurushaho kwigaragaza no gususurutsa abakunzi ba Hip hop nyarwanda.

Ruti ngo ababazwa n’uko injyana ya Hip hop yasubiye inyuma akaba yizeza abakunzi bayo ko yiteguye kugarura Hip hop yumvikanamo ubutumwa ndetse ngo yubaka igihugu.

Abdou Bronze
WWW.DOVE.RW

The post Uko “Ruti” Yariye Karungu Akinjira mu Njyana ya Hip hop Iwabo Ari Abakirisitu appeared first on DOVE MAGAZINE.

RwandAir Yungutse Indege y’Agatangaza yo mu Bwoko bwa Boeing 737-800 NG

By John Bagabo

Mu mpera z’icyi cyumweru dusoje Sosiyete Nyarwanda yo gutwara abantu n’ibintu mu kirere ‘RwandAir’ yakiriye indi ndege nshya yo mu bwoko bwa “Boeing 737-800 Next Generation” irimo interineti.

Iyi ndege yagatangaza yageze ku kibuga cy’indege mpuzamahanga cya Kigali  mu masaha y’igicamunsi cyo kuri icyi cyumweru.

Umuyobozi wa RwandAir, bwana Col. Chance Ndagano yavuzeko iyi ndege yo mu bwoko bwa ‘Boeing 737-800 NG’ ari iya kane yo muri ubu bwoko bakiriye.

Nk’uko uyu muyobozi yakomeje abitangaza iyi ngege ikaba ije kubafasha gukomeza kwagura ingendo za RwandAir ku mugabane wa Afrika no hanze yawo.

Col. Ndahiro yagize ati “ …….Iyi ndege ije kudufasha mu ngendo nshya ku mugabane no hanze yawo, muri iki gihe RwandAir ikomeje kugira uruhare mu kwagura ubucuruzi hagati y’u Rwanda n’isi”.

Iyi ndege nshya ifite na murandasi idakoresha umugozi (Wi-Fi Internet), ifite ibyicaro bibiri, hari ikicaro cy’abifite ‘Business Class’ kigizwe n’imyanya 16, n’ikiciro cy’abantu bose kigizwe n’imyanya 138.

RwandAir  ibinyugije ku rubuga rwayo rwa Twitter yari yatangaje ko iyi ndege iturutse muri Amerika y’Amajyaruguru yabanje guhagarara Athens ku mugabane w’Uburayi.

Kuruyu wa 26 Gicurasi 2017 RwandAir yatangiriye ingendo zayo ku mugabane w’Uburayi mu gihugu cy’Ubwongereza, intambwe yakiriwe neza cyane n’igihugu cy’Ubwongereza nk’uko byatangajwe n’ubuhagarariye mu Rwanda.

RwandAir CEO Colonel Chance NdanganoUmuyobozi wa RwandAir, Colonel Chance Ndangano (Hagati) n’aabandi bafata ifoto y’urwibutso

John BAGABO
WWW.DOVE.RW

 

The post RwandAir Yungutse Indege y’Agatangaza yo mu Bwoko bwa Boeing 737-800 NG appeared first on DOVE MAGAZINE.

Yesterday — May 28th 2017dove.rw

Drake Yanditse Amateka muri Billboard Music Awards

By CHIEF EDITOR

Mu ijoro ryakeye Aubrey Drake Graham [Drake] yakoze amateka yegukana ibihembo 13 bya Billboard Music Awards aca ku Umwongereza Adele wari ufite agahigo ko kwegukana 12.

Mu bihembo Drake yatwaye harimo Top Male Artist, Top Billboard 200 Artist, Top Hot 100 Artist, Top Song Sales Artist, Top Streaming Songs Artist, Top Rap Artist na Top Rap Tour.

Mu ndirimbo zamufashije kwegukana ibihembo byinshi harimo “One Dance” — yo yakoranye na WizKid ndetse na Kyla.

Drake mu ijambo yagejeje ku bitabiriye uyu muhango wo gutanga ibihembo yashimiye se umubyara, Lil Wayne wamuzamuye ndetse na Nicki Minaj bakorana muri Young Money Records.
Drake

The post Drake Yanditse Amateka muri Billboard Music Awards appeared first on DOVE MAGAZINE.

Before yesterdaydove.rw

Shyorongi: Abantu 15 Baguye mu Mpanuka ya Coaster

By CHIEF EDITOR

Ku mugoroba wo kuri uyu wa gatandatu ahagana ku isaha ya 14:30 mu kagari ka Gatare mu Murenge wa Kanyinya, akarere ka Nyarugenge, imodoka yo mu bwoko bwa Coaster itwara abagenzi yakoze impanuka yaguyemo abantu 15.

Iyi modoka yaritwaye aba bagenzi ngo yavaga i Musanze yerekeza i Kigali ikaba ari iya Kompanyi ya Kigali Safari ifite ikiyiranga (purake) nimero RAB593H.

Nkuko byemejwe n’abari ahabereye iyi mpanuka ngo abantu babiri gusa nibo barokotse iyi mpanuka; umwe ngo yagerageje gusimbuka undi ni uruhinja rwajugunywe na nyina agirango arengere ubuzima bwarwo we akaba ari mubayiguyemo.

CIP Emmanuel Kabanda, umuvugizi wa Polisi y’igihugu ushinzwe umutekano wo mu muhanda yemeje ko abantu 15 aribo baguye muri iyi mpanuka muribo hakaba harimo abana babiri.

Impanuka i ShyorongiIyi mpanuka yaguyemo abantu 15.

Claire Uwineza
WWW.DOVE.RW

 

The post Shyorongi: Abantu 15 Baguye mu Mpanuka ya Coaster appeared first on DOVE MAGAZINE.

Umugabo n’Abana be 3 Bafashwe n’Uburwayi bwo mu Mutwe Nyuma yo Kwica Inzoka 4; Umwana wavugije Induru, Uwayitunze Agatoki; Uwayiteye Umujugujugu na Se Wazishe Batewe Inshinge Zibasinziriza bari mu Bitaro

By CHIEF EDITOR

Abaturage bane bo mudugudu wa Ruhende, Akagari ka Gako, Umurenge wa Masaka bo mu karere ka Kicukiro barwariye mu bitaro bya Masaka nyuma yo guterwa n’inzoka bahinguye.

Aba baturage ni umubyeyi n’abana be batatu bana bishe inzoka eshatu iya kane ikabacika.

Urimubenshi Manuelia aganira na TV1 yavuze ko abana babonye inzoka bakavuza induru umwe atungira se urutoki, undi arayica, nyuma yo hashize iminota nk’ibiri gusa haje indi nayo nayo arayica, nyuma yo kwica iya kabiri haje kuza nanone iya gatatu nayo se arayica, iya kane iramunanira.

Nyuma yo kwica eshatu indi ikirukira mu mateke, Manuelia ngo abana be batangiye gutaka bavuga ko ibintu bitangiye kuburirira mu maguru niko kujya kuryama na se ubabyara bose bajya mu buriri; mu ijoro nibwo babyutse basohoka bambaye ubusa bameze nk’abafashe n’indwara yo mu mutwe.

Nk’uko uyu mugore abivuga ngo haba umugabo we w’imyaka 40, umwana wabo w’imyaka 11 watunze agatoki, umwana w’imyaka 9 wateye agatoki ndetse n’umwana w’imyaka itanu wavuze ko indi nzoka iteye bose bari mu bitaro.

Abaturage bose bafite ubwoba ndetse ngo ibyabaye ku muturanyi wabo nabo byababayo. Bamwe mu maturage bavuga ko izi nzoka uyu muryango wazitererejwe na nyiri inzu gusa arabihakana.

Abarwariye kwa muganga batewe inshinge zibasinziriza mugihe hibazwa uko bizarangira. Amakuru atangazwa n’abaganga avuga ko bigoranye kuvura aba barwayi kuva izi nzoka zitabariye.

Kugeza ubu ibintu ni amayobera ndetse abaturanyi ubwoba bwabatashye, icyi ni icyibazo benshi cyahungabanije abaturage ndetse benshi baremeza ko ari aha amasengesho.

Alphonse Bizimana
WWW.DOVE.RW

The post Umugabo n’Abana be 3 Bafashwe n’Uburwayi bwo mu Mutwe Nyuma yo Kwica Inzoka 4; Umwana wavugije Induru, Uwayitunze Agatoki; Uwayiteye Umujugujugu na Se Wazishe Batewe Inshinge Zibasinziriza bari mu Bitaro appeared first on DOVE MAGAZINE.

Misiri: Abakirisu 23 Biciwe mu Gitero Cyagabwe kuri Bisi

By CHIEF EDITOR

Mu misiri abakirisitu 23 baguye mu gitero cy’abantu bitwaje intwaro bagabye kuri bisi mu ntara ya Misiri nk’uko byatangajwe n’ikinyamakuru cya Leta.

Icyi gitero cyagabwe mu ntara ya Misiri iri ku birometero 220 uturutse mu murwa mukuru Cairo. Nk’uko amakuru abivuga ngo iyi bisi yagabweho igitero yarigiye ku kigo cy’abihayimana cyitwa St Samuel.

Umutwe w’intagondwa za leta ya kisilamu (Islamic State:ISIS ) niwo wigambye iby’icyi gitero. Muri Mata uyu mwaka uyu mutwe wagabye ibitero ku nsengero zitandukanye mu Misiri uhitana 46.

Icyi gitero cyahumuye amaso Prezida Abdul Fattah al-Sisi bituma ashyiraho amategeko adasanzwe yo guhangana n’abahezanguni b’imitwe y’iterabwoba mu misiri.

ISIS baherutse gushyira ahagaragara amashusho bavuga ko abakirisitu ari imihigo yabo bagomba kubica.

Ubu bwicanyi bukorewe abakirisitu bubaye nyuma gato y’uruzinduko rw’umushumba wa Kiliziya Papa Francis yaraherutse kugiririra mu Misiri aho yasambya abica abakirisitu gutekereza kugira umutima wa kimuntu.

isis mu misiriAbana batatu gusa nibo barokotse icyi gitero cyagabwe kuri uyu wa 26 Gicurasi 2017

Alphonse Bizimana
WWW.DOVE.RW

The post Misiri: Abakirisu 23 Biciwe mu Gitero Cyagabwe kuri Bisi appeared first on DOVE MAGAZINE.

EAC: Imisoro niyo ntandaro yo guhenda ku Matike y’indege

By John Bagabo

Mu inama yabera i Kigali, Ihuriro ry’abakurikirana iby’ingendo mu ndege mu Muryango w’Afurika y’Uburasirazuba (EAC)  bemeje ko imisoro ariyo ntandaro yo kuba ibiciro ku matike y’indege bikiri hejuru ndetse bikaba binabangamira abagenzi.

Ibi abagize ihuriro babitangarije mu nama kunshuro ya 42, iri kubera mu Rwanda i Kigali yatangiye kuri uyu wa 24 Gicurasi 2017 ikaba izamara iminsi itatu.

Iyi nama ikaba ifite kaba  intego yo gushaka icyakorwa ngo ubwikorezi bwo mu kirere bworohe hagati y’ibihugu bigize uyu muryango wa EAC.

Umuyobozi ushinzwe ubucuruzi muri ‘RwandAir’,Alex yavuze ko imisoro ari kimwe mu bituma itike y’indege ihenda muri EAC no muri Afurika muri rusange.

Yagize ati  “Imisoro ku bibuga by’indege iri hejuru bikabije, servisi zikorerwa indege n’abayijemo ku kibuga nazo zirahenze cyane ndetse n’amavuta indege zinywa ahenze”.

Hari kandi ibihugu indege igezamo abagenzi ariko ntibyemere ko ihavana abandi, ibyo ni byo ahanini bituma amatike y’ingendo ahenda bikabije muri ubu buryo.

Yakomeje avuga ko iki ari ikibazo gikomeye kinabanagamira abagenda muri uyu muryango wa  EAC cyane nk’abakora ibikorwa by’ubucuruzi bagenda kenshi.

Ibi byanashimangiwe n’umuyobozi ushinzwe iby’ubukungu mu Kigo cy’indege za gisivili mu gihugu cya Tanzania bwana Daniel Malanga yavuze ko  ibiciro by’ngendo mu indege muri EAC bikikiri hejuru. Aho yatanze urugero rwaho nk’itike y’indege yo kuva Dar Es Salaam ujya na Nairobi ari Amadolari y’Amerika $800, abarirwa mu bihumbi 660 RWf.

Ahamya ko ayo mafaranga y’itike ari hejuru kurusha ayo kuva Dar Es Salaam ujya i Dubai kandi urwo rugendo arirwo rurerure.

Yakomeje avuga hakiri byishi byo gukora, birimo kongera abashoramari mu bwikorezi bw’indege bityo habeho ipiganwa, bikazaba imbarutso y’igabanuka ry’ibiciro by’ingendo.

Naho ushinzwe indege za gisivili n’ibibuga by’indege muri EAC bwana Eric Ntagengerwa we avuga ko hari ibyatangiye gukorwa mu guhangana n’iki kibazo.

Yagize ati “Icyo turimo gukora ni ugukuraho inzitizi zituma indege zo muri aka karere zitisanzura ku bibuga byose by’ibihugu bya EAC.”

Yakomeje avuga ko ubu hari amabwiriza yamaze gutegurwa, azatuma abashinzwe iby’indege muri EAC bazajya bahura bakiga ku biciro by’ingendo, ibituma biri hejuru bityo hashakwe uko bikemuka igiciro kigabanuke.

Bimwe mu bihugu by’itabiriye iyi nama harimo Tanzania, Kenya, Uganda n’u Rwanda. Abayijemo bakaba banaboneyeho gusura ikibuga cy’indege mpuzamahanga cya Kigali kiri ikanombe.

U Rwanda rukaba rwatorewe kuyobora iri huriro mu gihe cy’amezi  atandatu, rusimbuye kuri uwo mwanya igihugu cya Tanzania.

John BAGABO
WWW.DOVE.RW

The post EAC: Imisoro niyo ntandaro yo guhenda ku Matike y’indege appeared first on DOVE MAGAZINE.

Amafoto y’Abagore Batigisa Murandasi muri Afurika Bayobowe n’Umunyarwandakazi

By Abdou Bronze

Hirya no hino ku isi hakundwa gukorwa intonde zitandukanye z’ibyamamare batunzwe n’imiterere y’imibiri yabo, ubu tugiye kurebera hamwe abatigisa murandasi muri Afurika hadashingiwe ku bwiza gusa ahubwo n’imiterere y’umubiri.

Ibi byamamare biganjemo abanyamideli by’umwihariko bakomoka mu bihugu bya Nigeria ndetse na Ghana, gusa igishimishije ruyobowe n’umwali w’i Rwanda.

Abakobwa batigisa murandasi muri Afurika.

Princess Shyngle: Uyu munyaburanga avuka mu gihugu cya Ghana ubwiza bwe  ahanini ngo bushingiye ku indeshyo ye,imiterere y’umubiri no kugira amabere ateye neza.

Joselyn Dumas: Uyu nawe avuka muri Ghana, akunzwe cyane mu biganiro bya televiziyo muri iki gihugu. Imitererere ye y’umubiri n’ijwi rye bituma benshi bamukunda.

Corazon Kwamboka: Uyu mukobwa ukiri muto avuka muri Kenya,ni icyamamare cyane mu mwuga wo kumurika imideri no gutambuka. Kwemeza ko ari mwiza ahanini ababivuga bashingira ku miterere y’inyuma ye no munda hazwi nka “zeru”.

Juliet Ibrahim: Uyu mukobwa ufite abite ababyeyi badasangiye igihugu, avuka kubabyeyi babiri UmunyeGhana na Liberia. Ashyirwa ku rutonde rw’ibyamamare beza mu bagore hashingiwe ku kibuno cye n’imyinwa ye.

Peace Hyde: Uyu mukobwa uvuka muri Ghana akaba n’icyamamare mu itangazamakuru rya Televiziyo, uretse ubwiza n’imiterere y’umubiri ngo ubusanzwe ni n’umuhanga aheruka kwegukana impamyabumenyi y’ikirenga  mu mitekerereze n’imibanire y’abantu “Psychology” muri imwe muri Kaminuza zo muri Amerika.

Tracy Obonna: Uyu mukobwa avuka muri Nigeria,gushyirwa ku rutonde rw’abeza ahanini bashingira ku minwa ye, imiterere y’ikibuno ndetse ngo n’icyamamare mu kumurika imideri akaba yaranarangije kaminuza icyiciro cya 3 mu bucuruzi.

Daniella Okeke: Uyu mukobwa uvuka muri Nigeria ngo afite abakunzi benshi bamukurikirana kuri instagram ahanini ku bw’imiterere y’umubiri we.

Vera sidika: Uyu we yitirirwa Kim Kardashian w’Afurika, avuka muri Kenya, ni umwe mu bakunzwe cyane muri iki gihugu ku bw’imiterere ye. Ahanini ngo yifashishwa na benshi mu bahanzi batuye muri iki gihugu  ndetse ngo amaze kwamamara ku isi ku bw’amafoto akunze gusakaza.

Toolz: Uyu mukobwa uvuka muri Nigeria, azwi mu mwuga w’itangazamakuru akaba akunzwe cyane ku mbuga nkoranyambaga kubwo amafoto ye ashyira ahagaragara yatumye ndetse yitwa icyamamare cya internet. Afite impamyabumenyi ihanitse mu bucuruzi n’itumanaho.

Omotola Jalade Ekeinde: Avuka muri Nigeria akaba nyina w’abana 2, abenshi bemeza ko afite uburanga buhebuje n’imiterere myiza y’umubiri.

Matilda Quaye: Uyu yamamaye cyane mu gihugu cya Ghana ku bw’imitere y’umubiri we dore ko ngo iyo agenda abenshi bamugenda inyuma birebera imiterere y’ikibuno cye.

Didi Ekanem: Avuka muri Nigeria, muri iki gihugu ngo abenshi bemeza ko afite imiterere myiza bikaba akarusho ku kibuno cye.

Grace Msalame: Ni icyamamare mu itangazamakuru rya televiziyo muri Kenya, abenshi bamukundira imiterereye n’ubwiza nyaburanga akaba umuhanga cyane mu gutegura ibiganiro.

Lisa Visagie: Uyu mukobwa ufite imyaka 23 y’amavuko ni umunyamideli ukunzwe na benshi muri Afurika y’Epfo ku bw’imiterereye n’uburanga bye bihebuje.

Mercy Janson: Uyu mukobwa avuka mu gihugu cya Nigeria ubwiza bwe hemezwa ko bushingiye mu miterereye n’indeshyo.

Anita Joseph: Uyu mukobwa uturuka mu gihugu cya Nigeria yamamaye cyane mu kumurika imideli, ahanini ngo akunzwe ku bw’amafoto agaragaza ubwambure bwe adasiba gusakaza kuri Instagram.

Risper Faith: Akomoka mu gihugu cya Kenya abenshi bamukundira ubunini bw’ikibuno afite ndetse n’inseko ye.

Evia Simon: Uyu mukobwa yamamaye guhera mu mwaka wa 2010, akomoka mu gihugu cya Nigeria  akaba akunzwe na benshi ku bw’uburanga bwe.

Tanga Ncetezo: Akomoka muri Afurika y’epfo akaba ari icyamamare cyane mu itangazamakuru ho akora kuri televiziyo.

Judy Anyango: Uyu mukobwa akomoka mu gihugu cya Kenya akaba akunzwe cyane n’abagabo ku bw’imiterere y’umuranga karemano afite.

Nana Supersexy: Ni umukobwa w’i Rwanda, akundwa n’abatari bacye kubera imiterere y’ikibuno cye. Ubusanzwe amazina ye nyakuri ni Hyacinthe Weber, yamamaye ku mbuga nkoranyambaga nka Supersexy Nana, ni umugore wubatse, aza mu bagore bakunzwe cyane kuri Instagram.

Hyacinthe Weber, yamamaye ku mbuga nkoranyambaga nka Supersexy Nana, ni umugore wubatse, yashakanye n’Umunyamerika bakundaniye muri Uganda aho yigaga kaminuza.

 

Abdou Bronze
WWW.DOVE.RW

The post Amafoto y’Abagore Batigisa Murandasi muri Afurika Bayobowe n’Umunyarwandakazi appeared first on DOVE MAGAZINE.

Amatora2017: WhatsApp na Facebook Bishobora Gufungwa mu Gihe Bigaragaye ko Byabangamira Amatora ya Perezida

By John Bagabo

Komisiyo y’igihugu y’amatora iravuga ko mu gihe bizagaragara ko Imbuga nkoranyamba nka Facebook na WhatsApp zishobora kubangamira imigendekere myiza y’amatora ntakabuza zishobora gufungwa.

Ibi byagarutsweho kuri uyu wa 25 Gicurasi 2017 mu kiganiro komisiyo y’amatora yagiranye n’itangazamakuru. Iyi komisiyo yasobanuriraga itangazamakuru aho inyiteguro y’amatora igeze.

Prof Kalisa Mbanda umuyobozi w’iyi komisiyo yavuze ko imyiteguro y’amatora igeze ku kigereranyo cya 90%.

Iyi komisiyo yasobanuriye itangazamakuru ko mu gihe bizagaragara ko imbuga nkoranyambaga zikoreshwa mu buryo butemewe burimo no kwamamaza abakandida igihe cyagenwe kitaragera bishoboka ko zafungwa mu gihe gito ku girango zitazabangamira imigendekere myiza y’amatora y’umukuru w’Igihugu.

Mu bindi byasobanuriwe abanyamakuru ku birebana n’inyiteguro y’amatora ni uko komisiyo y’amatora kugeza ubu hari  abakandida batatu bamaze kugeza ubusabwayo kuri iyi komisiyo, abo bakandida ni Diane Shima Rwagara, Mwenedata Gilbert na Mpayimana Philippe.

Iyi komisiyo yanaboneyeho gutangaza ingengo y’imari izakoreshwa mu matora aho yatangaje ko izaba ingana n’amafaranga y’u Rwanda miliyari esheshatu na miliyoni magana atandatu (6,600,000,000). Muri ayo mafaranga hari mo ayangana na  1,400,000,000 Rwf azakoreshwa mu bikorwa byo gukurikirana kwiyamamaza kw’abakandida, guhugura abazatoresha no kwigisha abanyarwanda ibijyanye n’uburere mboneragihugu.

Iyi komisiyo ivuga ko  tariki 7 Nyakanga 2017 aribwo abakandida bose baziyamamaza bazaba bamenyekanye, hanyuma kwiyamamaza bikazahita bitangira kugeza kugeza tariki 3 Kanama 2017.

Kwiyamamaza mbere y’icyo gihe ntibyemewe ndetse nibikorwa cyane ku mbuga nkoranyambaga, bishobora gutuma imbuga nkoranyambaga zavuzwe haruguru zifungwa.

Amatora y’umukuru w’igihugu ateganyijwe kuya ya 3 na 4 Kanama uyu mwaka.

Charles Munyaneza, the executive secretary of the National Electoral Commission (L) chats with Kalisa Mbanda, the chairperson during the media briefing. (Timothy Kisambira)Charles Munyaneza, umunyamabanga wa Komisiyo y’igihugu y’amatora aganira na Kalisa Mbanda, umuyobozi mukuru w’iyi komisiyo. (Ifoto ya Timothy Kisambira/ The New Times).

John BAGABO
WWW.DOVE.RW

 

The post Amatora2017: WhatsApp na Facebook Bishobora Gufungwa mu Gihe Bigaragaye ko Byabangamira Amatora ya Perezida appeared first on DOVE MAGAZINE.

Mu gihe guhabwa igikombe ku mukino wa APR byanze, hashakwa umukino wa gicuti cyatangirwaho

By Alphonse Bizimana

Nyuma y’aho Ferwafa yemereje ko igikombe cya shampiyona kizatangwa ku mukino wa nyuma wa shampiyona, ubu Rayon Sports yamaze kumenyesha Ferwafa ko ititeguye guhabwa igikombe kuri uwo mukino izaba yasuyeho Kiyovu, ahubwo ikaba isaba ko hazigirwa hamwe uburyo hategurwa umukino wa gicuti watangirwaho icyo gikombe

Twabibutsa ko ubuyobozi bwa Rayon Sports bwari bwifuje ko ikipe yashyikirizwa igikombe yegukanye ku mukino izaba yakiramo APR kuri iki cyumweru, ibi Ferwafa ikaba yarabyanze ikemeza ko igikombe kizatangwa ku mukino wa nyuma na Kiyovu tariki ya 30.

Nk’uko bikubiye mu ibaruwa ya Rayon Sports, impamvu ikomeye ni uko imyiteguro ijyanye no kwakira icyo gikombe itashoboka mu gihe ikipe yaba yasuye, ikiruta kikaba kuba hategurwa umukino wa gicuti wihariye ugatangirwamo icyo gikombe.

The post Mu gihe guhabwa igikombe ku mukino wa APR byanze, hashakwa umukino wa gicuti cyatangirwaho appeared first on DOVE MAGAZINE.

Minisitiri w’Ingabo yatashye amazu 32 ahendutse yubatswe n’ Inkeragutabara

By Alphonse Bizimana

Minisitiri w’Ingabo z’u Rwanda, Gen James Kabarebe yayoboye umuhango wo gutaha amazu 32 ahandutse yubatswe n’ Inkeragutabara zibumbiye muri Koperative ABADAHIGWA KU NTEGO .  Aya mazu yubatswe hafi y’umujyi w’ i Kabuga, mu kagari ka Butangampundu, Umurenge wa Masaka , Akarere ka Kicukiro.

Mu ijambo rye Gen Kabarebe yashimye Abadahigwa ku Ntego hamwe n’abafatanyabikorwa ku bufatanye mu gikorwa cyiza cyo kubaka amazu ahendutse.   Ku bw’umwihariko, Minisitiri w’Ingabo yashimiye Inkeragutabara ku bw’ubwitange mu kubaka igihugu bazirikana impanuro za Nyakubahwa Perezida Paul Kagame mu 1992 aho yagize ati” Izi ngabo za RPA ni zo zizaba umusingi w’iterambere ry’igihugu cyacu”.

Minisitiri w’Ingabo yashimiye Abadahigwa ku Ntego abasaba gukomeza ibyo bikorwa ariko cyane birinda gucunga nabi umutungo n’ibindi bibazo byaba inkomyi ku iterambere rya Koperative yabo.  Yabasabye gutekereza ku baturage bagurira ubutaka ahakorerwa ibikorwa uburyo nabo bakinjizwa muri gahunda y’uyu mushinga. “ Byaba byiza mutekereje uburyo abaturage mugurira ubutaka bwubakwaho aya mazu bashyirwa mu bashabora guhabwa izi nzu zihendutse mwubaka bijyanye na gahunda y’Igishushanyo Mbonera cy’Umujyi ”.

Muri izi nzu 32 cumi n’eshatu zarangije kwishyurwa naho izindi 19 hari abarangije kugaragaza ko bazikeneye kandi nabo bashobora kuzishyura bitarenze icyumweru.  Buri inzu ifite agaciro ka Miliyoni 18 n’ibihumbi Magana atandatu. Imwe muri iyi nzu igizwe n’ibyumba 3. Izi nzu zubatswe ku nkunga ya Guverinoma by’umwihariko ubufatanye bw’Ikigo cy’igihugu gishinzwe imiturire ari nabyo bituma aya mazu ahendutse.  Muri aya mazu harimo n’ibindi byangombwa nk’amashanyarazi, amazi, imihanda n’ibindi bigendanye n’imiturire igezweho.

Abadahigwa ku Ntego ni Sosiyete yashinzwe  n’inkeragutabara zibumbiye muri Koperative ya KVCS ariyo ifite imigabane myinshi muri iyi Sosiyete.  Iyi Koperative ifite intego yo kwiteza imbere aho barwanya ubukene bateza imbere ubuzima bwiza bw’inkeragutabara,  bagafasha urubyiruko ruhabwa uburere mu Kigo Ngororamuco cya Iwawa hamwe n’abagore mu kwiteza imbere mu mishinga itandukanye. Mu kubaka aya mazu abagera kuri 60 barimo urubyiruko rwatorejwe Iwawa hamwe n’abagore batishoboye bahawe akazi.

The post Minisitiri w’Ingabo yatashye amazu 32 ahendutse yubatswe n’ Inkeragutabara appeared first on DOVE MAGAZINE.

Mu mafoto: Irebere Umukobwa Ushaka Kuzimanganya Izina Wema Sepetu 

By Abdou Bronze

Mu gihugu cya Tanzania hadutse umunyamideli witwa Gigy Money, witwaje ubwiza mu gushaka kwigarurira abakundaga Wema Sepetu ndetse ngo akanazibanganya izina rye mu myidagaduro y’icyi gihugu.

Uyu munyamideli Gigy Money mu kiganiro yagiranye na Bongo5 yagaragaje uburyo Wema Sepetu ari umuntu udashobatse ndetse avuga ko yibaza icyo abamuntu bamukundira kandi atari mwiza.

Gigy Money avuga ko yakuze akunda Wema Sepetu mbese ariwe kitegererezo cy’ubuzima bwe gusa ngo uko imyaka yagiye ihita indi igataha yaje kuvumbura ko ntakiza cye ashingiye ku makuru yagiye amuvugwaho n’imiterere ye y’umubiri yita ko idashamaje.

Gigy Money ngo ntakiri uwo kureba ibikorwa bya Wema ahubwo ngo nawe yamubereye ikitegererezo ari nayo mpamvu batavuga rumwe kuko yamukuye ku isoko.

Uyu mukobwa avuga ko abenshi ariwe basigaye bahanga amaso ndetse bakunda ibikorwa bye bityo ngo umubare munini w’abagabo baba bamubwira ko ari mwiza.

Gigy Money ufite imyaka 19 y’amavuko yibasiye Wema Sepetu yemeza ko ashaje akwiye kubisa abakiri bato bakigaragaza ikindi kandi ngo asaziye mu bugaragu.

Ubu butumwa bwatangajwe n’uyu mukobwa Wema Sepetu ntiyagize icyo abuvugaho ari nabyo bishimwa na benshi ko yagaragaje ko ari mukuru yirinda gushyamirana.

N’ubwo uyu Gigy Money yivugwa imyato ashinjwa n’abatari bacye ingeso zidakwiye umukobwa uzaba umugore ndetse ntibavuga rumwe ku mafoto agenda ashyira ahagaragara y’ubwambure bwe.

Wema Sepetu ni umukobwa wigeze kuba nyampinga wa Tanzania mu 2006, azwi nk’umukinnyi wa Filimi, umushabitsi ndetse yanigeze gukundanaho na Diamond Platnumz umwe mu bahanzi bakunzwe muri Afurika.

Asoza icyiganiro kigufi yagiranye na Bongo5 dukesha iyi nkuru Gigy Money yavuze ko mu byo ashaka harimo kwibagiza abantu izina Wema Sepetu ngo bose abe ari we bahanga amaso.

Ngayo ng’uko!

Mu mafoto umukobwa wahigiye kuzimanganya burundi izina Wema Sepetu.

 Yemeza ko ariwe myiza muri Tanzania 

 Akunze kugaragara asigasiwe n’abagabo ari nabyo aheraho yemeza ko ari mwiza

Abdou Bronze
WWW.DOVE.RW

The post Mu mafoto: Irebere Umukobwa Ushaka Kuzimanganya Izina Wema Sepetu  appeared first on DOVE MAGAZINE.

USA: Jeff Sessions asaba urukiko gusubiramo itegeko ry’abimukira

By Alphonse Bizimana

Minisitiri w’ubutabera wa leta Zunze Ubumwe za Amerika, Jeff Sessions yatangaje ko agiye gusaba urukiko rukurukuru rw’igihugu ko rwasuzuma neza itegeko ry’urukiko, yahagaritse itegeko rya Prezida Donald Trump ku bijyanye no kubuza abaturage baturuka mu bihugu by’abarabu bigera kuri bitandatu kwinjira k’ubutaka bwa USA.

Itangazo ryasohotse kuri uyu wa kane rivuga ko iryo tegeko rya Prezida Trump ryubahiriza amategeko ku bijanye n’uko umutekano w’igihugu wubahirizwa. Sessions yavuze kandi ko minisiteri y’ubutabera itemera itegeko ryafashwe n’urukiko ryo guhagarika iryo tegeko. Akavuga ko agiye gusaba ko urukiko rukuru rwasubira kwiga  iryo tegeko.

Ibyo byabereye murukiko rw’igihugu rukukira umujyi wa Richmond, muri leta ya Virginie. Kuri uyu wa kane, urukiko rw’ibanze rukaba rwatangaje ko iryo tegeko rya Prezida ribuza aba isilamu kwinjira, kandi ko ryisunga ibyo Prezida Trump yagiye avuga mu gihe cyo kwiyamamaza ku mwanya w’umukuru w’igihugu m’umwaka ushize.

The post USA: Jeff Sessions asaba urukiko gusubiramo itegeko ry’abimukira appeared first on DOVE MAGAZINE.

FERWAFA yasubije ihakana ibyo gutanga igikombe ku mukino na APR

By Alphonse Bizimana

Nyuma y’aho ubuyobozi bw’ikipe ya Rayon Sports bwandikiye FERWAFA busaba ko igikombe yatsindiye cya shampiyona yagishyikirizwa ku mukino ubanziriza uwanyuma uzayihuza na APR, Ferwafa yamaze gutanga igisubizo cyayo

Ibaruwa isubiza Rayon Sports yatangajwe uyu munsi, ikaba yaje ishimangira ibyari byatangajwe mu binyamakuru n’umuvugizi wa Ferwafa avuga ko ibyo Rayon Sports yasabye bidashoboka, ahubwo agashimangira ko igikombe yatsindiye izagisshyikirizwa ku mukino wa nyuma wa shampiyona uzahuza Rayon Sports na Kiyovu ku itariki ya 15/06/2017.

Uretse iby’icyo gisubizo, Rayon Sports yanamenyeshejwe ko umukino wayo na APR uzabera kuri Stade ya Kigali aho kuba Stade Amahoro nk’uko byari biteganyijwe mbere.

Dore ibikubiye muri ayo mabaruwa yombi:

The post FERWAFA yasubije ihakana ibyo gutanga igikombe ku mukino na APR appeared first on DOVE MAGAZINE.

❌