WebRwanda.com

πŸ”’
❌
There are new available articles, click to refresh the page.
Today β€” May 20th 2018Makuruki

Abakoresha umuhanda Kigali-Gatuna bajya Uganda bahinduriwe inzira nyuma yo kuba wongeye kuriduka

By Bikorimana Alexis

Abakoresha umuhanda Kigali-Gatuna bajya Uganda bongeye gusabwa gukoresha umuhanda wa Kigali-Kagitumba nyuma yo kuba uyu muhanda waridukiye kuri metero nka 40 uvuye ku mupaka w'u Rwanda ugana Uganda

Polisi y'u Rwanda yahise isaba abakoresha uyu muhanda guhindura inzira iti β€œPolisi y'u Rwanda iramenyesha abakoresha umuhanda Kigali-Gatuna bajya Uganda, ko kubera inkangu zangije uwo muhanda ku gice cya Kabale ahitwa Kyonyo muri Uganda, umuhanda si nyabagendwa. Abava mu Rwanda barasabwa kunyura Kagitumba.”

Abakoresha uyu muhanda bari babujijwe kongera kuwukoresha (abatwara amakamyo) kuwa 14 Gicurasi 2018 ubwo imvura nyinshi yari yawangirije cyane mu Murenge wa Cyumba, Akagari ka Rwakojo. Iki gihe basabwe gukoresha inzira ya Kigali-Kagitumba cyangwa bakanyura ku Cyanika.

ku mugoroba wo kuwa 17 nibwo polisi y'u Rwanda yahise ishyira hanze itangazo ryemmerera amakamyo kongera gukoresha uyu muhanda n'ubwo imirimo yo kuwusana yari igikomeje.

PNG - 634.2Β kb
Umuhanda Kabale-Gatuna wangiritse cyane

Amavubi U-20 yihagazeho anganyiriza muri Zambia

By Bikorimana Alexis

Mu mukino wo guhatanira itike y'igikombe cya Afurika cy'abatarengeje imyaka 20, Amavubi anganyije na Zambia mu mukino wo kwishyura waberaga I Rusaka muri Zambia.

Ni umukino watangiye ubona ko Ambvubi adashaka kwinjizwa igitego byaje kuyifasha isoza igice cya mbere itinjijwe igitego, gusa mu gice cya kabiri ku munota wa 52' Zambia yaje kubona igitego cyatinzwe na Mwiya Malumo.

Guelette Samuel Leopord Marie niwe waje kwishyurira Amavubi-20 umukino yasoje ari abakinnyi 10 nyuma yo kuba Captain Buregeye Prince yari yabonye ikarita itukura.

Umukino warangiye ari igitego 1-1, Amavubi ahita asezererwa muri iri rushanwa ku giteranyo cy'ibitego 3-1, ahita abura tike yo kujya muri Niger nyuma yo kuba mu mukino ubanza yari yatsindiwe I Kigalli 2-0.

11 babanje mu kibuga ku mpande zombi.

11 ba Zambia babanjemo: Prince Bwalya, Prince Mumba, Justine Mwanza, Benson Kolala, Kingsley, Kakwiya, Christopher Katongo, Thomas Zulu, Lameck Banda, Martin Njobvu, Mwiya Malumo, Francisco Mwepu.

11 b'u Rwanda Babanjemo: Ntwari Fiacre, Buregeya Prince, Uwineza Aime Placide, Mugisha Patrick, Nshimiyimana Mark Govin, Ishimwe Sareh, Ishimwe Christian, Nshimyumuremyi Gilbert, Bonane Jamvier, Guelette Samuel Leopord Marie, Byiringiro Lague

Kigali: Urubyiruko rwa Kimisange ntirwifuza ko amateka ya Jenoside yaranze aka gace yazima

By Bikorimana Alexis

Mu gihe u Rwanda ruri mu minsi 100 yo kwibuka Jenoside yakorewe abatutse muri Mata 1994 ku nshuro ya 24, Urubyiruko rwo mu Murenge wa Kigarama rurasaba ko amateka yaranze aka gace atazima ko ahubwo agomba gusigasirwa kugira ngo ibyabaye ntibizongere ukundi.

Urubyiruko ruvuka Kimisange rwishyize hamwe rwiyemeza kujya rwibuka abatutsi baho bazize jenoside yo muri Mata 1994.

Umunyamabanga Nshingwabikorwa w'Umurenge wa Kigarama, Uzamukunda Anathali yavuzeko ko tugomba guha abatutsi bazize jenoside yo muri Mata 1994 agaciro.

Uzamukunda yagize ati, β€œTuribuka mu Rwanda tugomba, kuko uko twibuka niko tuba dusubiza agaciro abatutsi bishwe muri Jenoside, tubasubiza agaciro bambuwe n'Ubuyobozi bwariho ndetse n'Itangazamakuru ryariho icyo gihe, Jenoside yakoranwe ubugome bukomeye ariyo mpamvu buri wese agomba kugira uruhari mu kubaka u Rwanda.”

Yakomeje asaba abaturage kugira uruhari mu gukomeza gutanga amakuru ku haba hakiri imibiri yishwe muri Jenoside idashyinguye mu cyubahiro kugira ngo bashyingurwe ahahesha ikiremwamutu agaciro gakwiye.

Rutayisire Saidi warokokeye Kimisange avuga ko byari bigoranye kuko babanje kwihagararaho kuva kuwa 07 Mata 1994 bahangana n'interahamwe ariko kuwa 14 Mata baza kurushwa amaboko n'interahamwe zitangira kubica.

Saidi ati, β€œAha kimisange hafite amateka yihariye kuko ntabwo interahamwe zaje ngo zihite zitangira kwica nk'uko ahandi byagenze, twe twabanje kwirwanaho duhangana nazo ariko kuko imbaraga zacu zari nke kandi hari n'abari bamaze kujya ku ruhande rwazo zatangiye kwica abatutsi kuwa 14 Mata 1994.”

Jean Pierre uhagarariye urubyiruko rwa Kimisange yavuze ko bateguye igikorwa cyo kujya bibuka abazize Jenosida ba Kimisange nyuma yo kubona ko batakomeza bajya kwibuka ahandi batabanje guhera ku babo kandi bazi neza.

Ati, β€œTwatangiye iki gikorwa ngarukamwaka cyo kwibuka abatutsi bazize jenoside ba Kimisange ubwo u Rwanda rwibukaga ku nshuro ya 23 nyuma yo gusanga n'ubwo tujya kwibuka ahandi nyamara natwe dufite abacu batuvuyemo, duharanira ko amateka yacu atazazimira”

Yakomeje avuga ko aha hari imiryango 80 izwi yiciwe Kimisange igizwe n'ababyeyi ndetse n'abana bivuze ko bashobora kuba bagera kuri 400 cyangwa 500.

U Rwanda ruri mu minsi 100 yo kwibuka Jenoside yakorewe abatutsi muri Mata 1994, aho Leta isaba Abanyarwanda kudaheranwa n'agahinda ahubwo bakibuka biyubaka.

JPEG - 195.6Β kb
Umunyamabanga w'Umurenge wa Kigarama asaba abantu baba bazi ahari imibiri idashyinguwe mu cyubahiro gutanga amakuru bakaba bashyingurwa mu cyubahiro
JPEG - 209Β kb
Jean Pierre uhagarariye urubyiruko rwa Kimisange asaba ko amateka y'aka gace atazima

Umuhungu wa Cyril Ramaphosa ashobora gukwa inka 100 ku mwishywa wa Mbabazi

By Bikorimana Alexis

Ku munsi w'ejo nibwo uwahoze ari Minisitiri w'Intebe wa Uganda ndetse n'Umunyamabanga w'ishyaka rya NRM riri ku butegetsi yakiriye umuhungu wa Cyril Ramaphosa kugira ngo baganire ku bijyanye n'inkwano.

Andile Ramaphosa w'imyaka 36, akaba umuhungu wa Perezida wa Afurika y'Epfo yaje muri Uganda aherekejwe na mama we, ndetse n'abandi banyamuryango 11 bakirirwa mu rugo rwa Amama Mbabazi I Kololo baganira ku nkwano zishobora gutangwa kuri Bridget Birungi w'imyaka 37 y'amavuko.

Birungi ni umukobwa wa Peace Ruhindi, uyu akaba ari umwana Jacqueline Mbabazi, umugore wa Amama Mbabazi.

Andile Ramaphosa ushaka kurongora umwishwa wa Amama Mbabazi ni inararibonye mu bukungu akaba ari umuyobozi w'ikipe ishinzwe Imiyoborere muri banki ya Macquire muri Afurika y'Epfo, yaje muri iiyi banki avuye muri Blue Crane Capital and Coronation Asset management aho yari umwe mu bayihagarariye (Manager).

Andile Ramaphosa afite impamyabumenyi y'ikirenga mu by'ubukungu yaboneye mu Bushinwa muri Shanghai Fudan University, ndetse n'indi yaboneye muri Hong Kong University of Technology aho yakurikiranye ibijyanye n'ikoranabuhanga mu bumenyi bw'Isi (Technology in Science) ndetse kandi afite n'impamyabumenyi mu bumenyi bw'ibidukikije yaboneye muri Beijing University of Science and Technology.

Ubwoko bwa Bakiga Birungi aturukamo bufite umuco wo gutanga/guhabwa inka nk'inkwano dore ko ari aborozi, byitezwe ko uyu mukobwa ashobora gukobwa inka ijana.

Yesterday β€” May 19th 2018Makuruki

Tumenye ubuzima bwa DJ Khaled usa n'ubayeho mu Isi ya wenyine

By Bikorimana Alexis

Wabishaka, uramukunda kandi ntibishoboka kuba wamwihunza. Uku niko Dj Khaled yinjiye mu buzima bwa benshi,mu mitekerereze yabo ndetse batangira kwisanga bamwumva burigihe baba bajya kuryama cyangwa mugitondo babyuka ndetse banicara akaba akibari mu bitekerezo.

Biragoye kumenya neza igihe uyu mugabo ufite amazina y'umwimerere nka Mohamed Khaled igihe atari icyamamare, akaba ariyo mpmavu ibyiza aruko twamuvuga muri iki gihe cy'iminsi ye myiza kuko we n'umuryango we mur uhando rwa muzika bakozemo amatware.

Ndabizi ushobora kwibaza ku byo yagezeho, byaba ubutunzi,icyubahiro n'uko afatwa mmu bandi

Icyambere kumwita Khaled cyangwa DJ byonyine ntibihagije, kuko nubwo azwiho gukinira bantu umuziki mu birori, ni umwanditsi w'indirimbo ndtese akaba n'umunyamakuru. Akaba ariyo mpamvu akaunda kunyuza izina rye mu ndirimbo nyinshi kuko inshuro nyinshi uzakunda kumva mu ndirimbo avugamo ngo ( listen carefully, I can hear it in your brain right now) bishatse kuvuga ngo: β€œ Tega amatwi neza. Kuko ubu ndi kubyumva mu bwonko bwawe.”

Uyu mugabo akaba ari n'umuyobozi wa sitidiyo ikora indirimbo yitwa Def Jam South. Akaba ari nawe washinze kompanyi y'ibya muzika yitwa We the Best Music Group Company. Ese waba ukunda kumva mudirimbo nyinshi abivugamo ngo We the Best( ngo nitwe beza beza kuruta abandi)

Ibyaribyo byose aya siyo makuru y'ingenzi kuri uyu mugabo. Kuko ibyinshi bifatananjwe n'indi kompanyi izwi ku mazina ya ALL I DO IS WIN( ibyo nkora byose mba ngambiriye intsinzi) kuko biturutse kunzoga ikora ya Belaire Rose. Ndetse kaba afitanye ubufatanye na kompanyi y'ibya siporo Sport champs ndetse n'indi ikora ibikoresho by'ikorana buhanga ya Apple. yinjiza arenga miliyali 20 z'amashilingi ya Tanzaniya.

Ariko ngo ibi ntibimushyira muba dj 10 bambere beza muri iyi si. Kuko uwambere we ngo yinjiza arenze miliyoni 20 z'amadorali y'Amerika

ESE ATUYE MUNZU IMEZE GUTE?

Uyu muryango utuye mu nzu wagereranya n'ingoro ikaba iherereye mu gace ka Baverly, kuko ngo ifite agaciro ka miriyoni 10 z'amadorari y'Amerika. Ikaba ifite urwogero,ubusitani bwiza bugizwe n'imigano indabo nyinshi ndetse n'ibindi biti bitandukanye bizengurutse iyi nyubako. Gusa si iyi nzu gusa kuko ngo afite n'indi nzu iherereye muri Miami mugace ka Florida, ifite agaciro ka miriyoni 4 z'amadorari y'Amerika.

ESE UYU MUGABO AGENDERA MUMODOKA ZIHE?

Uyu mugabo ahenze cyane yo mu bwoko bwa Rolls Royce, Wraith Coupe, Ghost Sedan, Phantom VIII, Cadillac Escalade hamwe na Range Rover.

ESE YABA YAMBARA AMASAHA AMEZE ATE?

JPEG - 107.8Β kb
Dj Khaled ni umwe mu bahanzi bambara amasaha ahenze

Uyu mugabo ngo ni uw'igikundiro cyane kuko ngo yambara ibintu by'agaciro cyane, akaba yambara ibintu byo mu nganda zikomeye ku Isi kandi byose bikozwe muri zahabu. Akaba uyu Khaled yambara izo mu bwoko bwa Fancy,Rolex ndetse na Hublots.

Ntitwasoza kuvuga ku buzima bwe utavuze ko uyu mugabo nawe ari umubagabo mu bandi, akaba nawe yarabyaye umwana umwe w'umuhungu witwa Asahd Khaled. Akaba ariwe babana muri ubu bukire bwose. Akaba afite umwaka umwe n'igice nawe akaba amwambika bihenze kuko amwambika ibyo mu ruganda rwa GUCCI ndtse n'inkweto za Jordan ndetse n'isaha ihenze cyane. Ntawabura kuvuga ko uyu mugabo yatangiye gukoresha umwana mubikorwa byo kwamamaza.

JPEG - 84Β kb
Dj Khaled aba mu nzu ihenze

Cuba: Indege isandariye mu kirere abasaga 100 bahasiga ubuzima

By Makuruki

Abasaga 100 bari mu ndege yo mu bwoko bwa Boeing 737 basize ubuzima mu mpanuka ikoreye ibereye hafi y'ikibuga k'indege kitwa Jose Marti International Airport muri Cuba.

Kuri uyu wa gatanu Indege ya Boeing 737-201 yakoze impanuka saa 12:08 (16:08 ku masaha mpuzamahanga ya GMT) uwbo yerekezaga Jose Marti International Airport.

Indege ya Boeing 737-201 yari itwaye abagenzi 110 ukongeraho n'abakozi b'iyi ndege, gusa babatu nibo babashije kurokoka nubwo bamerewe nabi.

Leta ya Cuba yahise ishyiraho iminsi ibiri yo kunamira abo bazize iyi panuka kuko ngo iyi niyo mpanuka ibaye ikomeye kuva mu myaka y'1980s.

Before yesterdayMakuruki

Uganda: Abadepite bacyuye igihe bagiye guhabwa akayabo

By Makuruki

Komite Igize inteko ishinga amategeko muri Uganda, yifuza ko abadepite bacyuye igihe bahabwa akayabo ka miliyoni 100 z'amashilingi ya Uganda ahwanye n'amadolari y'Amerika $2600.

The New Vision newspaper dukesha iyi nkuru ivuga ko ,umuvugizi w'inteko ishinga amategeko muri Uganda, Rebecca Kadaga yavuze ko aya mafaranga agomba guhabwa aba banyamategeko murwego rwo kugirango nabo bagire uruhare mu itera mbere ry'igihugu.

Rebecca yakomeje avugako bamaze guhabwa $8,000 by'amadorali y'amerika gusa perezida wa Uganda Yoweri Museveni akaba avugako aya mafaranga ari make.

Kugeza ubu abanyamategeko bakoraga kuva mu mwaka wa 1962 kugeza muri 2001 nibo bateganyijwe guhabwa ariya mafaranga, gusa kugeza ubu ntibyoroshye kumenya umubare wabo bose, gusa bikaba biteganijwe ko perezida Yoweri Museveni ariwe ugomba gufata umwanzuro wa nyuma.

Tuyishime Emmanuel/@Makuruki.rw

Umuhanda Gatuna – Kigali wongeye kuba nyabagendwa ku binyabiziga byose

By Makuruki

Umuhanda Kigali-Gicumbi-Gatuna wari umaze iminsi utemerewe kunyurwamo n'amakamyo nyuma yo gusenywa n'imvura hagasigara igice gito cy'umuhanda byatumye polisi isaba ko imodoka nini zajya zitwara ibintu bijya cyangwa biva Uganda ko bakoresha umuhanda wa Kigali-Kagitumba cyangwa bakanyura ku Cyanika.

Polisi y'U Rwanda ibinyujije kuri Twitter yavuze ko umuhanda Gatuna –Kigali mu murenge wa Cyumba, akagari ka Rwankojo ,ari nyabagendwa ku modoka zose ndetse n'amakamyo.

Ni nyuma yaho hari hashize iminsi 3 uyu muhanda wangirijwe bikomeye n'ibiza, aho wari wacitsemo ibice ku buryo amakamyo yo atari yemerewe kuwukoresha.

Polisi y'u Rwanda yakomeje isaba abakoresha uyu muhanda kubahiriza amabwiriza bahabwa n'abapolisi bari gufasha mu rujya n'uruza rw'ibinyabiziga kuko ibikorwa byo kuwusana bigikomeje.

Ubwo uyu muhanda wamaraga kwangirika Minisitiri w'ibikorwa Remezo yavuze ko ikibazo cyahagurukiwe, bajya kureba uko ibyangiritse bingana mu rwego rwo gutangira gusana kugira ngo ukomeze ube nyabagendwa ku binyabiziga byose.

Amba. Claver Gatete ati, β€œKugeza ubu uyu muhanda urakoreshwa mu gice kimwe cyawo, kandi uragendwamo n'imidoka nto zitwara abagenzi ariko amakamyo yo arimo guca ku yindi mihanda ihuza u Rwanda na Uganda nka Cyanika na Kagitumba.”

Uyu muhanda wa Kigali – Gatuna wari wangiritse ufite uburebure bwa kilometero 77.8, ukaba waratashywe muri Nzeri 2015 nyuma yo kuvugururwa ku bufatanye n'Umuryango w'ubumwe bw'uburayi ugatwara amafaranga agera kuri miliyari 51 z'u Rwanda.

Tuyishime Emmanuel/@Makuruki.rw

Minisitiri w'Intebe Dr. Ngirente yakiriye Ambasaderi wa Amerika mu Rwanda

By Bikorimana Alexis

Minisitiri w'Intebe Dr. Edouard Ngirente yakiriye Ambasaderi wa Amerika mu Rwanda Peter Vrooman baganira ku ngingo nyinshi harimo ubufatanye bw'ibihugu byombi no gushimangira umubano mwiza hagati y'u Rwanda na Amerika.

Kuri uyu wa gatanu, Tariki ya 18 Gicurasi 2018, Minisitiri w'Intebe yakiriye Ambasaderi wa Amerika mu Rwanda bagirana ibiganiro . Uyu Ambasaderi yavuze ko Leta Zunze ubumwe za Amerika ziteguye gukomeza gutera inkunga u Rwanda.

Ambasaderi Peter Vrooman yavuze ko biteguye gutera inkunga u Rwanda mu kuzamura umusaruro uva mu buhinzi bw'ibujumba.

Yakomeje avuga ko Amerika yiteguye gufatanya n'u Rwanda muri gahunda yo guteza imbere ireme ry'Uburezi cyane uhereye mu mashuri y'incuke.

Lata y'u Rwanda igiye gufatanya na Amerika mu guteza imbere ubuhinzi bw'ibijumba N'ubwo ikigo cy'igihugu gishinzwe ubuhinzi n'ubworozi mu Rwanda( RAB) umwaka ushize yari yavuze ko itabiteza imbere ku rwego rw'ibindi bihingwa byinjiriza agatubutse igihugu nk'umuceri, kuko byo bidahunikika ndetse bikaba binabora vuba.

Dr Cyubahiro Bagabe wari Umuyobozi mukuru wa RAB yagize ati β€œNtabwo wafata ubuso bunini ngo ubuhingeho ibijumba ahubwo wahinga umuceri, ibigoli, kuko ni byo bihunikwa. Ngira ngo murabibona ko twinjiza imiceri ivuye za Pakistan, ariko ni ibihugu bike bishobora kohereza ibijumba.”

JPEG - 309.2Β kb
Ambasaderi wa Amerika mu Rwanda yishimiye ibiganiro yagiranye na Minisitiri w'Intebe Dr. Edouard Ngirente yizera ko bizagira umusaruro

Amakipe yageze muri 1/4 mu cyiciro cya kabiri aratabaza abashinzwe imisifurire

By Kayiranga G

Imikino y'icyiciro cya kabiri igeze muri 1/4 , ariko bamwe mu batoza n'abayobozi b'amakipe baratabaza abashinzwe imisifurire ngo babe maso kuko amakipe menshi yibirwa muri iki cyiciro cyo guhanganira kuzamuka mu cyiricro cya mbere.

Umwe mu bayobozi b'ikipe imaze imyaka myinshi mu cyiciro cya kabiri yabwiye Makuruki.rw ko ibiba muri iki cyiciro biteye ubwoba, ariyo mpamvu basaba abashinzwe imisifurire kuba maso.

Ati" imyaka maze mu cyiciro cya kabiri, imisifurire ibifitemo uruhare rwa 70%, kuko buri gihe ndibwa, iyi mikino iyo igeze muri 1/4 cyangwa 1/2 abasifuzi bakora amakosa menshi, hari aho umusifuzi yanga igitego gitsindiwe muri metero nka 30 kuko adashaka ko iyo kipe itsinda, ubundi ugasanga mugenzi we wo ku ruhande aracyemeye rukabura gica, kandi ntahanwa ahubwo ahembwa kuzamuka mu cyiciro cya mbere umwaka ukurikiyeho, muzazane camera zanyu mwirebere, barahimba niyo mpamvu kenshi amakipe arwana".

Imikino ibanza ya 1/4 izakinwa taliki ya 26 z'ukwezi kwa gatanu (amakipe azabanza kwakira ntaramenyekana), umukino wa nyuma wa shampiyona y'icyiriciro cya kabiri uzaba taliki ya 23 Kamena 2018.

Ikipe y'Intarae FC ntirasoza imikino yayo yo mu matsinda ariko amakipe yamaze kwizera 1/4 hasigaye kugaragara ikipe izarangiza ari iya mbere hagati yayo (Intare FC) na AS Muhanga.

Imikino ya 1/4 ibanza izaba kuwa 26 Gicurasi 2018

Vision Jeunesse Nouvelle FC vs Pepinieres FC
Sorwathe FC vs United Stars FC
Rwamagana FC vs izaba iya mbere hagati y' Intare FC na AS Muhanga
Unity FC vs izaba iya kabiri hagati y'Intare FC na AS Muhanga


AS Muhanga itegereje ibirarane by'Intare FC bishobora gutuma zifata umwanya wa mbere

Imikino yo kwishyura izaba taliki ya 2 z'ukwezi kwa gatandatu.

Imikino ibanza ya 1/2 izaba taliki ya 9 Kamena 2018, naho iyo kwishyura ibe taliki ya 16 Kamena.

Amakipe azakina umukino wa nyuma taliki ya 23 Kamena 2018, niyo azakina icyiciro cya mbere umwaka utaha w'imikino 2018 - 2019.

Perezida Trump yabwiye Kim Jong un ko itisubiyeho yagira ibyago nk'ibya Gaddafi wa Libya

By Makuruki

Perezida wa Leta zunze Ubumwe za Amerika Donald Trump yaburiye mugenzi we wa Koreya ya ruguru Kim Jong-Un ko naramuka ataretse gukomeza gukora intwaro za kirimbuzi ashobora kuzahura n'ibyago nk'ibyo Gaddafi wa Libya yahuye na byo.

Perezida Trump yijeje Kim wa Koreya ya ruguru ko ubuyobozi bwe buzaramba mu gihe yaba ahagaritse gucura intwaro za kirimbuzi, ariko ngo bitabaye ibyo ngo bizamugendekera nka Gaddafi wahoze ayobora Libya.

Trump yagize ati β€œ Mu gihe inama yacu yaramuka ibaye tugahura musezeranyije umutekano kandi uzaba ukomeye, azaguma mu gihugu cye ndetse anakiyobore nta nkomyi ndetse banagire ubukire bwo ku rwego rwo hejuru.”

Yakomeje avuga ko iyi nama iramutse itabayeho ko Kim ashobora kuzahura n'ibibazo bikomeye bisa neza n'ibya Gaddafi. Yagize ati β€œ ibyabaye kuri Gaddafi nibyo bizagwiriri Kim Jong un mu gihe gahunda yacu twari dufitanye idakunze.”

Iyi gahunda Trump avuga ni inama y'amateka hagati y'ibi bihugu iteganijwe kuzabera mu gihugu cya Singapore kuwa 12 Kamena uyu mwaka.

Umwuka mubi hagati y'ibihugu byombi uzamutse nyuma y'aho Amerika ikomeje kugenda yigamba ko yabaye imbarutso yo guhagarika igeragezwa ry'ibisasu muri Korea ya Ruguru, ibi bikaba byararakaje cyane iyi Korea ndetse Perezida Kim Jong un avuga ko bikomeje muri ubu buryo uruzinduko afitanye na Trump yaruhagarika.

Murwanashyaka Jean de Dieu/@Makuruki.rw

Amatora yabaye atagira indorerezi yaba ariyo mizero y'amahoro mu Burundi?

By Bikorimana Alexis

Kuri uyu wa kane mu Burundi bazindukiye mu matora ya Referandumu aha uburenganzira Perezida Pierre Nkurunziza bwo kuyobora u Burundi kugeza mu 2034.

Inzego z'umutekanno (Abapolisi n'abasirikare) bari bakajije umutekano kugira ngo hatagira igihungabanya aya matora abaye nyuma y'imyaka itatu gusa Nkurunziza atorewe Manda ya gatatu itaravuzweho rumwe n'Abarundi, amatora yaguyemo abagera ku 1,200 abagera ku 400,000 bavanywa mu byabo.

Amagana y'Abarundi yazindukiye mu matora asabwa gutora YEGO cyangwa OYA mu kwemeza ivugururwa ry'itegeko Nshinga.

Umwe mu baturage watoreye mu Ntara ya Ngozi uzwi nka Miburo yavuze ko yazindutse mu rukerera aje gutora OYA kuko atashoboraga kwihanganira kwica itegeko nshinga n'ubusugire bw'igihugu nkana.

Aya matora yitabiriwe n'umukuru w'igihugu, Pierre Nkurunziza n'umugore we, yasabye abaturage gutora mu mahoro kandi bakazemera ibizatangazwa n'akanama ka CENI gashinzwe amatora mu Burundi.

Guhindura itegekoshinga ry'Uburundi bizemezwa ari uko abatoye YEGO basaga 50% by'amajwi y'abatoye.

Umuryango Mpuzamahanga urengera uburenganzira bwa muntu, The International Federation for Human Rights (FIDH) watangaje ko habayeho gutera ubwoba no guhatira abantu gutora YEGO ubwo hategurwaga aya matora kuko abatavuga rumwe na Leta batawe muri yombi bazira kwigisha gutora OYA.

Umwe mu bavuganye na AFP yavuze ko mu Mujyi wa Bujumbura ndetse no mu bice by'icyaro Imbonerakure zagendaga zijya kuri buri rugo zigategeka abantu kujya ku biro by'itora ku ngufu.

Ikigo cy'igihugu gishinzwe amatora mu Burundi Independent National Electoral Commission (CENI) kivuga ko abagera kuri Miliyoni 4.8 bajya kungana na Β½ cy'abaturage bose aribo bitabiriye amatora.

Abatavuga rumwe na Leta ya Nkurunziza baba mu mahanga CNARED bari basabye abaturage kutitabira aya matora mu gihe Agathon Rwasa we yari yakanguriye abaturage gutora OYA bakarengera ubusugire bw'igihugu n'amasezerano ya Arusha yo mu 2000 agena kurengera ihame rya demokarasi no gusaranganya ubutegetsi mu Burundi.

Aya matora abaye mu gihe mu ntangiro z'uku kwezi Leta yari yavuze ko uzafatirwa mu bikorwa byo kubangamira amatora azafungwa imyaka itatu ari muri gereza.

Igitangaje muri aya matora ni uko nta ndorerezi n'imwe yari ihari kuko abenshi mu banyamahanga bari barabujijwe kwinjira muri iki gihugu.

Mu ntangiro z'uku kwezi nibwo leta y'Uburundi yafunze amwe mu maradiyo mpuzamahanga nka BBC na VOA ndetse iha gasopo RFI iyibuza kudapfa gutangazo ibyo bita ko bigumura abaturage.

Igihugu cy'Uburundi cyakunze kurangwa n'ubwicanyi ariyo mpamvu hari Abarundi baheze mu buhungiro kuva muri 1993 hakicwa uwari Perezida Melchior Ndadaye, urupfu rwakurikiwe n'ubwicanyi ndengakamere bwaguyemo abagera ku bihumbi 300 ubwicanyi bwakomeje kugeza mu 2006. Bukongera gusubukurwa mu mwaka wa 2015 ubwo Nkurunziza yatorerwaga kuyobora manda ya gatatu batavuga rumwe nawe bakavuga ko atabyemerewe.

Itegeko Nshinga ni rihindurwa, Perezida Nkurunziza wafashe ubutegetsi mu 2005, azaba yemerewe kongera kwiyamamariza indi manda muri 2020 ndetse no muri 2027 bivuze ko yazarekura ubutegetsi m 2034.

Special Olympics Rwanda : Hakomeje ijonjora ry'abazahagararira u Rwanda umwaka utaha

By Editor1

Mu rwego rwo gutegura amarushanwa mpuzamahanga azabera Abu Dhabi, muri leta zunze ubumwe z'Abarabu mu kwezi kwagatatu (Werurwe 2019), umuryango mpuzamahanga Special olympics Rwanda wateguye imikino itandukanye y'abana bafite ubumuga bwo mu mutwe yabereye kuri sitadeIPRC mu karere ka kicukiro.

Imwe mu mikino yabaye ni iyo gusiganywa kumaguru(atheletism) abahungu n'abakobwa, ndetse n'umupira w'amaguru abahungu n'abakobwa.
Amakipe yitabiriye yaturutse mu turere dutandukanye : Gisagara, Rulindo, Kirehe, Kicukiro, Gasabo, Nyarugenge, Umubare wabakinnyi bose hamwe bitabiriye amajonjora ni 109.

Ku itariki 23.05.2018 mu karere ka Muhanga kuri stade ya muhanga hateganyijwe andi majonjoro amakipe azahatana azaturuka mu turere twa Muhanga, Ngororero, Rutsiro, Kamonyi, nyuma y'amajonjoro hazaboneka amakipe azakina umukino wanyuma ku urwego Rw'igihugu muri nyakanga, arinaho hazabonekamo abakinnyi bazaserukira u Rwanda mu mikino mpuzamahanga izahuza ibihugu byose bibarizwa muri Special Olympics International, iyo mikino izabera Abu Dhabi muri werurwe, 2019

Special Olympics ni Umuryango mpuzamahanga, wigisha gukina, guhiganwa mu mikino inyuranye, isanzwe ikinwa ku Isi hose igenewe abafite ubumuga bwo mu mutwe kugirango ibafashe kudakomeza kwigunga, ahubwo ibongerere imbaraga no kwishima, ari nayo mpamvu ibazamurira urukundo, hamwe n'imiryango yabo aho batuye hose.


Iyi mikino igamije kubafasha kwishima no kutigunga

KARENZI Christopher

Polisi yangije ibiyobyabwenge byafatiwe mu karere ka Burera

By Editor1

Igipolisi cy'igihugu gifatanyije n'inzego z'ubuyobozi ndetse n'abaturage bangije ibiyobyabwenge byafatiwe mu karere ka Burera, abaturage babwirwa ko abinjiza ibiyobyabwenge bazakomeza guhigwa bukware.

Iki gikorwa cyo kubyangiza cyabereye mu murenge wa Gahunga, ibyangijwe byose bikaba byarafatiwe mu mirenge ya Cyanika, Gahunga, Kagogo na Rugarama, ubuyobozi bwa Polisi bukaba bwari buhagarariwe n'Umuyobozi wa Polisi mu karere ka Burera Senior Superintendent of Police (SSP) Alex Fata, naho akarere kakaba kari gaharariwe n'Umuyobozi wako wungirije ushinzwe ubukungu, Habumuremyi Evariste.

Inzoga zitemewe zangijwe zigizwe n'amaduzeni 332 ya Host waragi, amapaki 4583 ya Blue Sky, amapaki 535 ya Chase waragi, amapaki 311 ya Leaving, amaduzeni 41 ya Chief waragi, amaduzeni 40 ya Coffe Spirit, amapaki 320 ya African gin, amapaki 50 ya Soft gin, na Litiro 240 za Kanyanga.

Nyuma yo kubyangiza, aba bayobozi bahaye ubutumwa abaturage bari bari aho, babakangurira ububi bw'ibiyobyabwenge n'ibyiza byo gutangira amakuru ku gihe mu kubikumira.

Habumuremyi yabwiye abari aho ko bakwiye kwirinda kwishora mu bikorwa bitemewe n'amategeko kuko byabagusha mu makosa, ahubwo batungira agatoki inzego z'umutekano ababyishoramo.

Yakomeje ababwira ko impamvu abayobozi b'inzego za Leta, iz'ibanze na Polisi y'u Rwanda bayoboye neza igihugu, batafashe ibiyobyabwenge, bakaba bakomeje gutanga umusanzu wo kubaka igihugu, bityo asaba abari aho cyane cyane urubyiruko kubyirinda, kuko arirwo ejo ruzaba ruyoboye igihugu.

SSP Fata yasabye abaturage bari bateraniye aho kwirinda ibiyobyabwenge, anababwira ko Polisi y'u Rwanda yafashe ingamba zo gufata ababyinjiza mu gihugu.

Yaravuze ati:” Ubu dufite uburyo bwo kumenya no gufata abinjiza ibiyobyabwenge mu gihugu kandi hafi y'abantu bose babigiramo uruhare turabazi, ntituzacika intege kugeza igihe bose bazafatwa bagashyikirizwa ubutabera”.

Yanashimiye bamwe mu baturage b'akarere ka Burera, aho yagize ati:” Turashimira bamwe mu baturage kuko kugirango ibi biyobyabwenge bifatwe aribo baduhaye amakuru kandi banadufasha muri uyu mukwabu”.

Yasoje asaba n'abandi baturage kujya batungira agatoki inzego z'umutekano abantu binjiza inzoga zitemewe mu Rwanda ndetse n'ibiyobyabwenge, kugira ngo bagarurwe mu murongo wo gukora ibyemewe n'amategeko.

APR FC itsinze Mukura VS ikomeza gukubana na AS Kigali

By Bikorimana Alexis

APR FC ikuye amanota atatu I Hue nyuma yo gutsindira Mukura Victory Sports mu rugo igitego kimwe ku busa, n'ubwo Mukura yakinnye umukino mwiza

Mu mikino yo ku munsi wa 23 ya Azam Rwanda Premiere league, ikipe ya APR FC itsinze ikipe ya Mukura igitego 1-0 ikomeza kotsa igitutu ikipe ya AS Kigali iyoboye Shampiyona y'u Rwanda.

Umukino watangiranye imbaraga, Mukura Victory Sports igaragaza umukino mwiza nk'uko bisanzwe ariko ku munota wa 19' Issa Bigirimana yaboneye igitego ikipe ya APR FC ari nacyo cyaje kurangiza umukino.

Nyuma yo kubona igitego cya mbere ku ruhande rwa APR FC ikipe ya Mukura Victory Sports yabaye nk'ikangutse barataka ku munota wa 29' Lomami Frank atera ipoto mu gihe igitego cyari cyabazwe.

Mu yindi mikino yabaye, ikipe ya AS Kigali iyoboye Shampiyona yatsindiye ikipe ya Entencelles mu rugo igitego 1-0, ikipe ya Miloplast inganya n'amagaju 1-1.

Dore ababanje mu kibuga ku mpande zombi

Mukura VS: Rwabugiri Omar, Mujyanama Fidele, Iragire Saidi, Nshimirimana David, Gael Duhayindavyi, Rugirayabo Hassan, Ndayegamiye Abou, Ndayishimiye Christophe, Hakizimana Kevin, Cyiza Hussein na Lomami Frank.

APR FC: Kimenyi Yves,Omborenga Fitina, Imanishimwe Emmanuel, Rugwiro Herve, Aimable Nsabimana, Mugiraneza Jean Baptiste, Djihad Bizimana, Issa Bigirimana, Iranzi Jean Claude, Hakizimana Muhadjiri na Amrani Nshimiyimana

Dore uko urutonde rwa Shampiyona ruhagaze nyuma y'umunsi wa 23

1. AS Kigali 45
2. APR FC 44
3. Kiyovu 38
4. Rayon 36
5. Police Fc 33
6. Etincelles 31
7. Sunrise 30
8. Bugesera 28
9. Mukura 24
10. Musanze 24
11. Espoir 24
12. Kirehe Fc 24
13. Amagaju 23
14. Marines 22
15. Gicumbi 19
16. Miroplast 17

Umuyobozi na nyir'ikigo bafunzwe bazira kubamba abanyeshuri ku musaraba

By Bikorimana Alexis

Muri Nigeria Polisi yafunze abagabo babiri bakurikiranyweho guhambira abanyeshuri ku musaraba babaziza ko bakererewe.

Umuvugizi wa Polisi muri Nigeria mu gace ka Ogun, Abimbola Oyeyemi yavuze ko bafunze umuyobozi w'ikigo cya Metorite Standard School, Ayetoro na nyir'ikigo Afolayan Joseph nyuma yo guha ibihano bikabije abanyeshuri babiri .

Umwe mu bapolisi banyuze kuri iki kigo akabona umwana abana bahambiriwe ku musaraba, yagerageje kwegera ngo ahambure aba bana ariko ubuyobozi bw'ikigo na na nyiracyo bumubuza kwivanga, aribwo yahamagaye abamufasha umuyobozi w'iki kigo na nyir'ikigo bahita batabwa muri yombi.

Abanyarwanda twashoboye byinshi bigoye, ikibazo cy'igwingira si cyo cyatunanira-PM Dr.Ngirente

By Bikorimana Alexis

Minisitiri w'intebe Dr. Edouard Ngirente asanga ikibazo cyo kugwingira kw'abana kigomba kuranduka burundu mu Rwanda kuko ataricyo kibazo gikomeye u Rwanda rwaba ruhuye nacyo.

Ubwo yasuraga akarere ka Nyabihu, umurenge wa Bigogwe mu kagari ka Kijote mu gutangiza ubukangurambaga ku kurandura ikibazo cy'igwingira mu bana bato mu Rwanda yavuze ko Leta y'u Rwanda yiteguye gukora ibishoboka byose ariko iki kibazo kikava mu nzira.

Ati, β€œGuverinoma y'u Rwanda n'abafatanyabikorwa izakomeza kuba hafi no gufasha imiryango yugarijwe n'ikibazo cyo kugwingira. Ntituzaruhuka na rimwe iki kibazo kitaracika burundu. Abanyarwanda twashoboye byinshi kdi byari bigoye. Kurandura kugwingira sibyo bizatunanira.”

Minisitiri w'Intebe, Dr. Edouard Ngirente yavuze ko impamvu Guverinoma y'u Rwanda yiyemeje kurandura burundu impamvu zose zitera imirire mibi, ari ingaruka mbi zigira ku bana bahuye nazo, ku miryango yabo no ku gihugu muri rusange, yongeraho ko kandi bisaba ubufatanye bw'inzego zose bireba.

Dr. Ngirente ati, β€œKugira ngo ubu bukangurambaga buzagere ku nshingano bwahawe, birasaba ubufatanye bw'inzego zose zirebwa nabwo. By'umwihariko, birasaba ubufatanye bw'ababyeyi ubwabo kuko aribo bagomba gufata iya mbere mu kurandura imirire mibi mu bana babo.”

Yasabye ababyeyi bose kwitabira gahunda zo kubafasha kurinda abana babo kugwingira zirimo: Gahunda mbonezamikurire y'abana ikorerwa mu midugudu; kuboneza imbyaro; ubukangurambaga ku minsi igihumbi ya mbere y'ubuzima bw'umwana.

Muri Gashyantare uyu mwaka nibwo umuyobozi w'agateganyo w'ihuriro ry'imiryango 79 ya Sosiyete Sivile irwanya imirire mibi mu Rwanda, Scaling Up Nutrition (SUN) Alliance; Muhamyankaka yari yatangaje ko ikibazo cy'imirire mibi kiri kugenda kigabanuka n'ubwo bigoye kugera ku ntego Minisiteri y'Ubuzima yihaye

Atanga urugero.Ati, β€œIkibazo cy'imirire mibi cyavuye kuri 51% mu 2005 kikagera kuri 44% mu 2010 na 38% mu 2015, avuga ko ko bigoye kugira ngo kizagere kuri 18% muri Kamena 2018 nk'uko Minisiteri y'Ubuzima yabyiyemeje.”

Si ubu gusa ikibazo cy'Imirire mibi ituma abana bato bagwingira gihagurukiwe n'abayobozi bakuru b'igihugu kuko no mu mwiherero w'abayobozi wabereye I Gabiro kuwa 26 Gashyantare kugeza kuwa 01 Werurwe uyu mwaka, Perezida Kagame yakigarutseho avuga ko ikibazo bahura nacyo ari icy'imirire mibi n'imirerere mibi y'abana bacu.

Yagize ati, β€œMuzi ikibazo turwana nacyo cy'imirire mibi, cy'imirerere mibi mu myaka itatu ya mbere iyo umwana ayitakaje akivuka, akiri no mu nda, imyaka ikurikira ibiri, itatu, iyo udakoze ibyo wagombaga gukora umwana ngo agire ubuzima bwiza hari ibitagaruka, kuki tuvuga ibindi umutekano, isuku [….] kuki mu mirire mibi tuza ku mwanya mubi”

Ubukangurambaga buzakorerwa mu Rwanda hose, buzafasha imishinga y'ingamba zikomatinyije zo kurwanya igwingira mu bana bato mu turere 13, dufite umubare munini w'abana bahuye n'ibibazo by'imirire mibi byatumye bagwingira.

JPEG - 399.9Β kb
Minisitiri w'Intebe Dr.Edouard Ngirente yasuye abana 145 barererwa mu kigo kiri mu murenge wa Bigogwe

Igihe Perezida Kagame azasubira mu Bufaransa cyamenyekanye , azakirwa na Macron

By Bikorimana Alexis

Perezida wa Repubulika y'u Rwanda Paul Kagame agiye gusubira mu Bufaransa aho azitabira inama ya Viva Tech (Viva Technology) yiga ku kuzamura ikoranabuhanga kuri uyu mubumbe dutuye.

Inama Mpuzamahanga ya Viva Tech itegeganijwe kubera mu Murwa mukuru w'Ubufaransa I Paris, aho mu bashyitsi bakuru bazitabira iyi nama harimo na Perezida w'u Rwanda Paul Kagame.

Iyi nama ya Viva Tech yitabirwa n'abayobozi bakomeye mu nzego za Leta, mu bigo by'Ikoranabuhanga, Abashoramari,,,,muri uyu mwaka ikaba iziga ku iterambere ry'ikoranabuhanga rigezweho ndetse n'icyo rimariye abaturage.

Mu minsi ishize ibitangazamakuru birimo Jeune Afrique byari byanditse ko abayobozi b'Ubufaransa bari basabye Perezida Kagame ko yazitabira iyi nama ariko bitaremezwa niba azayitabira.

Jeune Afrique ariko yamaze kwandika ko Perezida Kagame ari mu bayobozi bazitabira iyi nama, iyi nama izatangira tariki ya 24 kugeza 26 z'uku kwezi kwa 5 ari nabwo Perezida Kagame azajya mu Bufaransa.

Urubuga rwa interineti rwa Viva Tech rwanditse ko biteganyijwe ko Perezida w'Ubufaransa Emmanuel Macron uzatangiza iyi nama azakira mugenzi we w'u Rwnda kuwa 24 Gicurasi ndetse n'umuyobozi wa Viva Tech, Mark Zuckerberg akazaba ahari.

Perezida Kagame yaherukaga mu Bufaransa mu 2015, ubwo yari yitabiriye Inama ya UNESCO ariko nta biganiro byari byitezwe n'umuyobozi w'igihugu cy'Ubufaransa n'ubwo mbere yo kugaruka I Kigali yabonanye n'uwahoze ari Perezida w'iki gihugu, Nicolas Sarikozy.

Iyi nama ya Viva Tech Perezida Kagame agiye kwitabira, izaba yahuje abarenga ibihumbi 80, biteganijwe ko hazerekanwa imishinga mishya igera ku bihumbi 8.

Viva Tech igiye kuba ku nshuro ya gatatu, mu nshuro ebyiri zabanje yitabirwaga n'abashyitsi bari hagati y'ibihumbi 40-45 gusa muri uyu mwaka byitezwe ko izitabirwa n'abagera ku 80.000.

Imishinga isaga ibihumbi 8 izamurikwa harimo 50% yo hanze y'Ubufaransa mu gihe abashoramari 100 baturutse ku mugabane wa Afurika bazerekana udushya mu bikorwa byabo.

Uko abasirikare barindaga Jammeh barashe abantu 50 baciye mu gihugu cyabo bigendera

By Editor1

Imiryango iharanira uburenganzi bwa muntu yatangaje ko mu mwaka wa 2005 abasirika bari bagize umutwe urinda Yahya Jammeh wahoze ayobora Gambia barashe abaturage bo mu bihugu byo muri Afurika y'uburengerazuba bari baciye mu gihugu cyabo bashaka kwigira I Burayi.

Iyi miryango yavuze ko aba basirikare barindaga Jammeh bishe nkana abaturage barenga 50 bo mu bihugu bitandukanye byo muri Afurika y'Uburengerazuba bari mu nzira basuhuka bashaka kujya iburayi.

Imiryango iharanira uburenganzi bwa muntu irimo Human Rights Wacth ndetse na Trio International niyo yatangaje aya makuru.

Iyi miryango yavuze ko ubu bwicanyi bwabaye mu kwezi kwa 7 mu mwaka wa 2015, bavuga ko ubu bwicanyi bwahitanye abanya Ghana 44 abandi 6 bakomoka mu bihugu bya Nigeria, Senegal na Togo.

Abasirikare bari mu mutwe w'ingabo zarindaga Yahya Jammeh bafatiye aba bimukira ku nyanja iri ku mupaka wa Gambia babahimbira ibyaha ko ari abacanshuro baje guhirika ubutegetsi bwa Yahya Jammeh bahita babarasa nta rundi rubanza rubayeho

Yahya Jammeh yategetse Gambia kuva mu mwaka wa 1994 kugeza mu mwaka wa 2017 ashinjwa ko iyi myaka yose yategetse iki gihugu yagitegekesheje igitugu yica umuntu wese yakekaga ko batavuga rumwe.

Bugesera imvura imaze iminsi igwa isize abahinzi bifashe mapfubyi

By Makuruki

Abahinzi basaga 1800 bahinga umuceri mu gishanga cya Rurambi mu karere ka Bugesera baravuga ko kubera ibiza byatewe n'imvura idasanzwe byabahombeje amafaranga agera kuri miliyari imwe mu mafaranga y'u Rwanda.

Bagasaba ko ubuyobozi bwabavuganira kugira ngo ibigo by'imari byari byabahaye inguzanyo bibihanganire muri ibi bihe.

Aha baroba amafi ubusanzwe hari hahinzwemo umuceri n'ibindi bihingwa, uhageze udasanzwe uhazi wagira ngo ni ikiyaga. Byose birakomoka ku mvura idasanzwe yaguye ikuzura iki gishanga. Kandi urebesheje amaso gukama k'uru ruzi ntibizafata igihe gito ikintu aba bahinzi babona nk'ibibazo bibagwiririye.

Iki gishanga cya Rurambi cyahingwagamo cyane umuceri cyahindutse nk'ikiyaga gifite ubuso bwa hegitari 558, cyahuriragamo imirenge ya Juru, Mwogo yo mu Bugesera na Masaka ya Kicukiro muri Kigali. Abahingaga muri iki gishanga hafi ya bose bavuga ko biyambazaga amabanki n'ibindi bigo by'imari bakaka inguzanyo.

Kuri iyi ngingo JMV Murenzi umunyamabanga nshingwabikorwa w'umurenge wa Mwogo yabwiye Ijwi ry'Amerika dukesha iyi nkuru ko bumvikanye n'amabanki ko aba bahinzi batazishyura muri iki gihembwe cy'ihinga kuko bagendeshereje muri iki gishanga bakazishyura bongeye guhinga.

Ejo hazaza h'aba bahinzi bavuga ko habateye impungenge kuko basanga inzara igiye kubibasira. Ikintu bahuriraho na Murenzi uyobora Mwogo.

Ubusanzwe leta y'u Rwanda ikangurira buri wese kuba mu bwishingizi bwamugoboka igihe ahuye n'ikibazo. Abahinzi bavuze ko ubukangurambaga bubareba bwari bugeze kure kandi ko n'abasetaga ibirenge byababereye isomo batazibagirwa.

Silas Mbonigaba ushinzwe imicungire y'iki gishanga cya Rurambi yavuze ko amafaranga yose hamwe abahinzi bari baragujije bahinga umuceri asaga miliyoni 220 z'amafaranga.

Kuva iyi mvura yatangira kugwa umusubirizo yangije amahegitari y'imyaka abarirwa mu 5000 itwara ubuzima bw'abatari bake n'ibindi.

Kugeza ubu kandi abahinzi b'umuceri ku gishanga cya Rurambi baracyagaragaza inyota yo kongera kwegura amasuka igihe cyose babona igishanga gikamye.
Ni mu gihe iteganyagihe ryo rigaragaza ko iyi mvura idasanzwe ishobora kuzageza mu kwezi kwa Gatandatu ikigwa.

❌