WebRwanda.com

🔒
❌
There are new available articles, click to refresh the page.
Today — July 20th 2017Kigali Today

Reba uko Habineza na Mpayimana biyamamaje mu turere (Amafoto) #Rwanda via @kigalitoday

By Editor

Frank Habineza

Uyu mukandida w'ishyaka Democratic Green Party of Rwanda yiyamamarije mu Karere ka Karongi n'aka Muhanga.

JPEG - 120.5 kb
Frank Habineza ubwo yiyamamariza muri Karongi

Muri Karongi yagombaga kugerayo ku saha ya saa mbiri za mu gitondo ariko yahageze ku isaha ya saa sita n'iminota 40. Yakiriwe n'abaturage babarirwa mu 120 barimo abagize itsinda ry'abarwanashyaka be yazanye nabo.

Habineza yijeje abanya-Karongi ko naramuka atorewe kuyobora u Rwanda, guhera mu kwezi kwa cyenda 2017, bose bazaba bafite amazi meza.

Yahavuye ajya mu Karere ka Muhanga, muri Santere ya Nyarusange. Yakiriwe n'abaturage babarirwa mu 2000; nkuko ushinzwe ibikorwa byo kwamamaza Habineza, Ntezimana Jean Claude abivuga. Gusa ariko abitabiriye biganjemo abanyeshuri.

JPEG - 147.8 kb
Frank Habineza ubwo yiyamamariza i Muhanga

Ubwo yabagezagaho ijambo, yabanje kubabwira ko aho i Nyarusange ariho avuka.

Yakomeje avuga ko mbere yuko ajya muri Politiki yari akuriye ikigo gishinzwe kubungabunga umugezi wa Nyabarongo.

Agahamya ko nubwo yagiye muri politiki agikunda ibidukikije bityo ngo naramuka atorewe kuyobora igihugu azaharanira gutera ibiti bivangwa n'imyaka.

Avuga ko azazamura umushahara wa mwarimu, akubaka amashuri meza ndetse akanashyiraho gahunda ihamye y'uburezi idahindagurika.

Akomeza avuga ko kandi azashyiraho gahunda ya “Gira Inzu Mupolisi” na “Gira Inzu Musirikare”.

Philippe Mpayimana

Uyu mukandida wigenda yiyamamarije mu Karere ka Rubavu na Nyabihu.

Muri Rubavu ahantu yiyamamarije hose yakiriwe n'abaturage 14 kuko hari aho yageraga akabura abantu, agasanga hari intebe zihateretse zonyine.

JPEG - 167.8 kb
Hamwe mu ho Mpayimana yiyamamarije yabuze abantu

Ubwo yageraga muri ako karere yatemberejwe ahari amashyuza. Yavuze ko natorerwa kuyobora u Rwanda, azateza imbere ubuvuzi gakondo harimo no gukoresha uruhereko mu gufata abajura kandi akongerera agaciro ubukerarugendo gakondo.

Yakomeze avuga ko ku itariki ya 30 Nyakanga 2017, aribwo azagaragaza gahunda ze, aganire n'abantu abasubize kuri interineti.

Avuye i Rubavu yahise akomereza i Nyabihu. Yari yateguriwe kwiyamamariza ku kibuga cy'Akagari ka Jaba mu murenge wa Mukamira ariko we yaje kubihindura yiyamamariza ku muhanda.

Yavuye aho ku Mukamira yerekeza mu murenge wa Rambura yiyamamariza mu Gasiza.

Mu migabo n'imigambi yagarararije mu mirenge ya Mukamira na Rambura yavuze ko azashyiraho itegeko rigena ko buri muryango utagomba kurenza abana batatu.

Agira ati “Ku buyobozi bwanjye nta bana bazajya babura ibikoresho by'ishuri bitewe n'ubukene buri mu miryango kuko hazajya havuka abana igihugu gishoboye kwitaho aho kubyara abo imiryango ishobora kurera.”

JPEG - 179.3 kb
Muri Nyabuhu ho yagiye abona abantu bamwakira

Mu murenge wa Mukamira yakiwe n'abaturage babarirwa muri 30 hatabariwemo abana bato bamushungereye ubwo bajyaga kwiga.

Mu Gasiza yakiriwe n'abantu babarirwa muri 200. Yabashimiye uburyo bamwakiriye avuga ko aribwo bwa mbere yakiriwe n'abantu benshi kuva yatangira kwiyamamaza.

JPEG - 119.7 kb
Perezida wa komisiyo y'igihugu y'amatora (NEC) Kalisa Mbanda yagaragaye aho Mpayimana yiyamamarizaga muri Rubavu


USA: Abarepubulike bakwiye kurebera ku Rwanda mu kuvugurura ubwisungane mu kwivuza #Rwanda via @kigalitoday

By Editor

Ikinyamakuru The New York Times cyo kuri uyu wa 19 Nyakanga 2017 cyanditse ko Abarepubulike barambiwe kumva, ugereranyije n'ibindi bihugu bikize, uburyo Abanyamerika barwara bakarembera mu ngo kubera kutabona uburyo bwo kwivuza.

Mu gihe batanga urugero rwa Danmark nk'igihugu gifite politiki nziza y'ubwisungane mu kwivuza, Ikinyamakuru The New York Times kiragira kiti “Mu gihe itegeko rigenga ubwisungane mu kwivuza ryananiwe gutambuka, mwikwirirwa mwigora mutekereza ku rugero rwa Danmark ahubwo murebe urw'u Rwanda.”

Iki Kinyamakuru kivuga ko ufashe ubukungu bw'u Rwanda ukabugabanya Abanyarwanda buri wese yabona amadolari y'Amerika 700 mu gihe ufashe ubw'Amerika ukabuganya abaturage bayo buri wese yabona ibihumbi 62 na 300$. Ni ukuvuga inshuro 89 ugereranyije n'Umunyarwanda.

Ni mu gihe mu myaka 23 ishize u Rwanda rwahuye n'amarorerwa ya Jenoside yakorewe Abatutsi igahitana abasaga miliyoni.

Bakomeza bagira bati “Nyamara mu myaka 15 ishize u Rwanda rwashoboye kubaka ubwisungane mu kwivuza bujya kuzuza ubuziranenge (standard) mpuzamahanga ku buryo hejuru 90% by'abaturage barwo babona serivisi z'ubuzima binyuze mu misoro batanga, gufashanya hagati yabo ndetse n'inkunga.”

The New York Times gikomeza kivuga ko nubwo ubushakashatsi bwakozwe ku ivugurura ry'urwego rw'ubuzima ryagaragaje ko abenshi mu bagore babyazwa n'abajyanama b'ubuzima babihuguriwe, kubona serivisi z'ubuzima byoroshye cyane mu Rwanda kandi zigatangwa ku giciro gito.

Mu Rwanda, ubushakashatsi bugaragaza ko Umunyarwanda abonana na muganga (Dr) nibura inshuro ebyiri ku mwaka mu gihe mu 1999, ayo mahirwe yo kubonana na muganga yanganaga n'ishuro enye ku mwaka.

Kugeza ubu, icyizere cyo kubaho cy'Umunyarwanda kiri ku myaka 68 mu gihe mu 1995 rugisohoka muri Jenoside yakorewe Abatutsi icyizero cyo kubaho cyari ku myaka 31.

The New York Times kikavuga ko ubwiyongere bw'icyizere cyo ku baho ku Munyarwanda kikubye inshuro ebyiri mu myaka 18 ishize ugereranyije n'ibindi bihugu byo muri Afurika yo munsi y'Ubutayu bwa Sahara.

Ubushakashatsi bwakozwe na Dr Agnes Binagwaho wahoze ari Minisitiri w'Ubuzima na Dr Paul Farmer wo mu Ishuri ry'Ubuvuzi rya Kaminuza ya Havard muri 2014 bwerekanye ko 97% by'abana b'Abanyarwanda bahabwa inkingo zose kandi uko bikwiye.

Ni mu gihe abangavu bose bakingirwa kanseri y'inkondo y'umura, nyamara amahirwe nk'aya akaba abonwa n'abakobwa 4 mu bakobwa icumi muri USA.

Impuguke mu bukungu ya The New York Times iti “Ba Repubulike, nzi u Rwanda n'ubukene bwarwo no kuba rugifite umubare munini w'abaturage batize ugereranyije na USA, ariko muri serivisi nyinshi z'ubuzima rwabera Amerika urugero uko ikwiye gukoresha amafaranga yayo.”

Iki kinyamakuru gikomeza kivuga ko Amerika yakwiye kurebera kuri politiki y'ubwisungane mu kwivuza yagiye ireshya benshi mu bategura politiki z'ibihugu, haba mu bihugu bikize n'ibikennye cyane ko kubona serivisi z'ubuzima ari kimwe mu burenganzira bwa muntu.

Kiti “Igitekerezo cy'ubwisungane mu kwivuza cy'u Rwanda cyakuruye ibihugu nka Ghana, Thailand, Mexico n'Ubushinwa ku buryo barimo kukifashisha mu gutegura politiki zabo z'ubwisungane mu kwivuza.”

Igihe kirageze ngo Amerika ive ku izima yigire ku bindi bihugu

The New York Times kiravuga ko aho kugira ngo USA ikomeze gutekereza gukuriraho ubwishingizi bwo kwivuza miliyoni z'abaturage bayo bakennye, ikwiye gufatira ku bunararibonye bw'u Rwanda n'ibi bihugu birimo kugendera ku gitekerezo cyarwo.

Ubushakashatsi bwa Banki y'Isi buvuga ko kuva Ghana yatangira kuvugurura inzego zayo z'ubuzima muri 2003, umubare w'abagerwaho na serivisi z'ubuzima wazamutse uva 6,6% ugera kuri 38%, mu gihe Peru byazamutse bikava kuri 37 bikagera kuri 62% .

Vietnam yavuye kuri 16 bigera kuri 67,5% mu gihe Tailand, na yo yafatiye urugero ku Rwanda yavuye kuri 67,3%, ubu iri kuri 96% by'abaturage bayo babona serivisi z'ubuzima.

The New York Times iti “Buri gihugu cyakoresheje uburyo bwacyo kugira ngo kigeze serivisi z'ubuzima ku baturage ariko ibi bihugu byose bifite isomo USA yaheraho ngo ibone uko yavugurura politiki yayo y'ubwishingizi mu kwivuza.”

Impungenge USA iramutse itangije ubwisungane mu kwivuza

Iki kinyamakuru kivuga ko bigoye kubaka ubwisungane mu kwivuza bwujuje ibisabwa ku rwego mpuzamahanga usaba abaturage gutanga imisanzu ku bwende bwabo.
Kivuga ko urubyiruko n'abiyumvamo ko bafite ubuzima bwiza byagora ko babyitabira bigatuma bwitabirwa n'abarwaragurika gusa.

Ibi ngo byatuma umubare w'ababwitabira uba muke kandi bagatwara ikiguzi kinini amavuriro maze bigatuma iyi politiki itagera ku ntego.

Gikomeza kivuga ko Banki y'Isi yagaragaje ko “Nta gihugu na kimwe kigeze kigera ku bipimo mpuzamahanga kuri politiki ishingiye gusa ku misanzu y'abaturage.”

Banki y'Isi ivuga ko muri 2012 ibihugu bitanu gusa ari byo byari bifite abaturage bagera ku bihumbi 600 bishyura ubwisungane mu kwivuza ku bushake bwabo.

Ngo ibihugu biri mu nzira y'amajyambere byinshi byagerageje gukoresha uburyo bw'ubwisungane mu kwuvuza ariko birangira guverinoma zibonye ari ngombwa ko na zo zishyiramo amafaranga yaba aturuka ku misoro y'abaturage cyangwa ku ngengo z'imari zabyo.

Aha ni ho The New York Times ihera igira inama Guverinoma ya Trump ikwiye kwibuka ko abateguye politiki y'ubwishingizi mu kwivuza ya “Obama Care” ibi batabyibagiwe, ari yo mpamvu guverinoma yashyiraga amafaranga mu kunganira abaturage mu kubona ubwishingizi.


U Rwanda ni urw'Abanyarwanda si urw'amadini - Kagame #Rwanda via @kigalitoday

By Editor

Kuri uyu wa kane tariki 20 Nyakanga 2017, Kagame yiyamamarije i Nyamirambo mu Karere ka Nyarugenge, hafatwa nk'igicumbi cy'idini ya Isilamu.

Hatanzwe ubuhamya bw'uburyo abayisilamu batotezwaga mu bihe bya mbere ya Jenoside yakorewe Abatutsi mu 1994.

Sheikh Mussa Fazil Harerimana, wigeze kuba Minisitiri w'Umutekano, yatanze ubuhamya bw'uko Leta zabanje zatotezaga Abayisilamu, ariko kuri iki gihe bakaba barasubijwe agaciro na bo basigaye baterwa ishema no kugira uruhare mu iterambere ry'igihugu.

Ariko mu ijambo rye yagejeje ku mbaga y'abanyamuryango ba FPR-Inkotanyi n'inshuti zabo bari bateraniye kuri Stade Regional i Nyamirambo, Kagame yavuze ko amateka y'Abanyarwanda yatumye bahuriza hamwe bagamije intego imwe.

Yagize ati “Bantu ba Nyarugenge uko mwazindukiye hano, harimo Abayisilamu, harimo Abakirisitu, harimo n'abandi bose, uko muri hano ni ko igihugu ari icyacu twese ku buryo bungana.”

Yavuze ko u Rwanda rw'iki gihe, rubifashijwemo na politiki ya FPR, rudateze kugendera ku ivangura iryo ari ryo ryose nk'uko byagiye bibaho mu bihe byashize.

Ati “Umwana w'Umunyarwanda ntawe umubaza idini, aho akomoka cg akarere ke, ahabwa amahirwe akwiriye yose. Ibi twabigezeho mu bufatanye n'andi mashyaka. FPR ifite umuco wo kutiharira.”


Miss Elsa azahatana n'abakobwa 129 muri Miss World #Rwanda via @kigalitoday

By Editor
JPEG - 55.9 kb
Miss World 2017 izabera mu Bushinwa yitabirwe na ba Nyampinga 130

Biteganijwe ko Miss Rwanda 2017, Iradukunda Elsa na we azitabira iryo rushanwa nk'uko Miss Mutesi Jolly (Miss Rwanda 2016),yitabiriye iry'umwaka ushize.

Nk'uko byatangajwe mu kiganiro n'abanyamakuru, gitegura iryo rushanwa, cyabereye mu Bushinwa ku itariki ya 20 Nyakanga 2017, Miss World igiye kuba ku nshuro ya 67, izatangira ku itariki 18 Ugushyingo 2017, ibere mu Mijyi nka Sanya, Haikou, Singapore na Shenzhen.

Miss World yo muri 2017 izazana ibishya bizagenderwaho mu guhitamo uzegukana ikamba. Muri byo harimo kureba ba Nyampinga bazakoresha cyane imbuga nkoranyambaga ubwo bazaba bari muri iryo rushanwa.

JPEG - 165.6 kb
Miss Iradukunda Elsa biteganyijwe ko azitabira Miss World 2017

Miss World, ni rimwe mu marushanwa y'ubwiza akomeye ku isi. Yitabirwa n'ibihugu bitandukanye byo ku isi.

Iryo muri 2016 ryabereye muri Amerika (USA). Ryitabiriwe n'abakobwa 117 babaye ba Nyampinga mu bihugu baturukamo. Muri uwo mwaka nibwo u Rwanda rwatangiye kwitabira iryo rushanwa.

JPEG - 136.3 kb
Miss Jolly Mutesi yitabiriye Miss World 2016

Kuva icyo gihe abategura Miss Rwanda batangaje ko uzajya yegukana ikamba rya Miss Rwanda azajya yitabira Miss World.

Uwegukanye ikamba rya Miss World 2016 yabaye Stephanie Del Valle Díaz ukomoka mu gihugu cya Puerto Rico.

JPEG - 62.1 kb
Stephanie Del Valle Díaz niwe wegukanye ikamba rya Miss World 2016

Kagame yashimishijwe cyane no kwiyamamariza i Rulindo #Rwanda via @kigalitoday

By Editor

Yagize ati"Abanya Rulindo muranshimishijeee! Avuga ko yizeye ibikorwa byinshi kuko bamwijeje amajwi menshi.”

Umukandida wa FPR Inkotanyi Paul Kagame,avuga ko amateka y'ingamba zatsindiwe muri Rulindo ari aya kera, kandi FPR kuva na kera ngo batojwe kubaka.
Ati"uwo muco turabizi muri Rulindo murawufite".

Yavuze ko itariki ya kane y'ukwezi gutaha kwa Kanama 2017,ari umuhango wo kongera gushimangira iyo nzira yo kubaka u Rwanda.


Karekezi Olivier ngo nta gikombe kigomba kumucika #Rwanda via @kigalitoday

By Editor
JPEG - 163.1 kb
Olivier Karekezi yabaye umukinnyi wa APR FC igihe kinini aba na Kapiteni w'Amavubi yagiriwe icyizere cyo gutoza Rayon Sports

Izo nshingano yazihawe nyuma yo kugirwa umutoza wa Rayon Sports kuri uyu wa kane tariki ya 20 Nyakanga 2017.

Mu zindi nshingano Karekezi Olivier yahawe harimo gutwara ibikombe byose bikinirwa mu Rwanda; nk'uko Gakwaya Olivier, umunyamabanga wa Rayon Sports abisobanura.

Agira ati “Inshingano twamuhaye mbere na mbere ni ukuduhesha ibikombe bikinirwa hano mu Rwanda tumaze imyaka ibiri dutwara, harimo igikombe cy'amahoro twatwaye umwaka washize na shampiyona twatwaye uyu mwaka (2016-2017) akanatugeza mu matsinda ya CAF Champions League.”

Akomeza avuga ko natagera ku ntego yihaye bazahita basesa amasezerano kuko ngo intego yabo bazaba batayigezeho.

Rayon Sports igiye gutozwa na Karekezi Olivier, mu gihe imaze iminsi itandukanye na Masoud Djuma wayihesheje igikombe cya Shampiyona muri uyu mwaka wa 2017. Masoud yatangaje ko yeguye ku mpamvu ze bwite.

Rayon Sports yafashe umwanzuro wo guha akazi Karekezi, nawe akaba yarihitiyemo abazamwungiriza barimo Ndikumana Hamad Katauti na Nkunzingoma Ramathan.

Karekezi yasinye amasezerano y'imyaka ibiri akaba azagera mu Rwanda ku itariki ya 26 Nyakanga 2017, agahita atangira akazi.

Biteganijwe ko Rayon Sports izatangira imyitozo tariki 31 Nyakanga 2017. Ikazitegurira shampiyona mu gihugu cya Tanzania.

Izakorera umwiherero i Dar es Salaam muri Tanzania inakine imikino ya gicuti n'amakipe yo muri icyo gihugu nka AZAM FC na Simba.

Kugeza ubu,Rayon Sports yatakaje abakinnyi barimo Nsengiyumva Moustapha na Munezero Filstn bagiye muri Police FC, Savio Nshuti Dominique wagiye muri AS Kigali.

Rayon Sports nayo ikaba yaraguze Rutanga Eric,Habimana, Hussein,Saddam Nyandwi na Mugisha Gilbert. Ikaba igiye no kuzana rutahizamu wo mu gihugu cya Mali.


Kagame yasabye Abanya-Rulindo kubakira ku mateka yaharanze #Rwanda via @kigalitoday

By Editor

Yavuze ko ako gace ari ko kagize uruhare mu gutuma ingabo zari iza RPF-Inkotanyi zibohora igihugu, nk'uko yabitangaje ubwo yahiyamamarizaga kuri uyu wa gatatu tariki 20 Nyakanga 2017.

Yagize ati “Amateka ya Rulindo hari icyo avuze ku gihugu cyose. Ubu turangamiye imbere, kandi ibyiza biri imbere. Twese turinde ibyagezweho, tubyubakireho ntihagire ubisenya turebera. Abasenya tubarwanye, umuco ni ukubaka.”

Yavuze ko Abanyarwanda muri rusange bakwiye kugira ubushake bwo gukora, nk'uko bafite ubushake bwo kuzatora neza.

Ati “njye niteguye gufatanya na mwe. Icyizere hagati yanjye na mwe ni cyose, ni 100%.”

Yavuze kandi ku kamaro ko guteza umugore imbere no kumuha uruhare mu iterambere ry'igihugu, kuko rireba buri wese.


Amaranye SIDA imyaka 27 agikomeye kuko avurwa ku buntu #Rwanda via @kigalitoday

By Editor
JPEG - 173.8 kb
RPF mu gikorwa cyo kwamamaza umukandida wayo i Rulindo

Nyirakamana uvuga ko kugeza ubu imva ye yari kuba yaramezeho ishyamba, kuko amaranye ubwandu bwa SIDA igihe, ariko agashima ko ubuyobozi bwa Perezida Kagame bwateje imbere ubuvuzi, ubu akaba abona imiti igabanya ubukana bwa SIDA ku buryo bworoshye.

Yagize ati"Ubwandu bw'agakoko gatera SIDA mbumaranye imyaka irenga 27, ariko reba ndacyashobora kubyina. Iyi ni gahunda nziza ya Perezida Kagame aho duhabwa imiti ku buntu".


Yesterday — July 19th 2017Kigali Today

Byari byifashe gutya ubwo Habineza na Mpayimana biyamamazaga (Amafoto) #Rwanda via @kigalitoday

By Editor

Frank Habineza

Uyu mukandida w'ishyaka Democratic Green Party of Rwanda yiyamamarije mu Karere ka Rulindo n'aka Nyabihu ariko ubwo yavaga i Rulindo ajya kwiyamamazira muri Nyabihu yashatse kwiyamamariza muri Musanze kandi bitemewe, ubuyobozi burahagaboboka buramubuza.

JPEG - 153.7 kb
Frank Habineza ubwo yiyamamarizaga i Rulindo

Ku isaha ya saa sita n'iminota 10 nibwo Habineza yari ageze ku kibuga cy'umupira w'amaguru yiyamamarijeho muri Rulindo.

Uyu mukandida wahageze akererewe ugereranyije n'amasaha ya saa mbiri za mu gitondo yari ategerejweho, yakiriwe n'abantu bagera mu 100.

Habineza wari uri kumwe n'umugore we, Kabirira Judith, yijeje abanya-Rulindo ko nibamutora azabubakira ibitaro by'icyitegererezo akanakuraho imisoro y'ubutaka.

Yakomeje ababwira ko azazamurira imishahara abarimu ndetse n'ururimi rw'ikinyarwanda rukarushaho kubahwa nk'ururimi gakondo rw'Abanyarwanda.

Yongeye gushaka kwiyamamariza ahatemewe

Mu ma saa cyenda ubwo yageraga ahitwa ku Kabaya urenze gato umujyi wa Musanze agiye kwiyamamariza muri Nyabihu, yashatse kuhiyamamariza mu buryo butemewe kuko atariho yari yateganyije kwiyamamaza.

JPEG - 164 kb
Frank Habineza ubwo yiyamamarizaga i Nyabihu

Abayoboke b'ishyaka rye bari bamuherekeje bageze ku Kabaya batangira gutanga ibirango biriho ibendera rya Democratic Green Party of Rwanda.

Umuyobozi w'umurenge wa Muhoza, Manzi Jean Pierre yahise ahagera, ababuza gukora ibyo bikorwa bakomeza bajya i Nyabihu aho bagombaga kwiyamamariza.

Bageze i Nyabihu bakirwa n'abantu babarirwa mu 150, Habineza ababwira imigabo n'imigambi ye irimo gukuraho imisoro y'ubutaka, nibaramuka bamutoye.

Ni ubwa kabiri umukandida Frank Habineza ashatsa kwica amategeko yo kwiyamamaza kuko ubwo yajyaga kwiyamamariza muri Nyagatare nabwo yashatse kwiyamamariza ahabera isoko ariko ubuyobozi buramubuza.

JPEG - 222.2 kb
Frank Habineza yiyamamarije i Rulindo

Amabwiriza ya Komisiyo y'igihugu y'amatora (NEC) avuga ko nta mukandida wemerewe kwiyamamariza ahantu hahuriye abantu bari muri gahunda zabo nko mu isoko, ku nsengero, ku bigo by'amashuri n'ahandi.

NEC ikomeza avuga ko ukomeje kurenga kuri ayo mabwiriza yandikirwa ibaruwa imuburira, yabisubira akaba yahagarikwa ntakomeze kwiyamamaza.

Mpayimana Philippe

Uyu mukandida wigenga yiyamamarije mu Karere ka Karongi na Rustiro. Yageze mu Karere ka Karongi ku isaha ya sa saba zibura iminota 10, yakirwa n'abaturage babarirwa mu 170.

JPEG - 135.4 kb
Mpayimana ubwo yiyamamariza i Karongi yakiriwe n'abaturage babarirwa mu 170

Yakomereje mu Karere ka Rutsiro mu masaha ya nimugoraba yakirwa n'abaturage babarirwa muri 40.

Aho yiyayamarije hose yagejeje ku baturage ibyo azashyira mu bikorwa naramuka atorewe kuyobora u Rwanda.

Yagize ati “Kugira ngo tugere ku iterambere ni uko nzabanza kuvugurura uburyo ba gitifu bashyirwaho kugera kumurenge.Tuzajya tubatora kandi no kumudugudu tuzabashyiraho.”

Yakomeje avuga ko ikirango cye ari Ingazi (Escaliers) bivuga ko Abanyarwanda bagomba gutera intambwe ijya imbere.

JPEG - 119.1 kb
Mpayimana ubwo yiyamamarizaga i Rutsiro


Kagame yashimye uruhare rw'amashyaka mu kubaka igihugu #Rwanda via @kigalitoday

By Editor

Yabitangarije mu Karere ka Kicukiro, mu gikorwa cyo kwiyamamaza yahakoreye kuri uyu wa gatatu tariki 19 Nyakanga 2017.

Yagize ati “Dushobora kuba dutekereza bitandukanye ariko iyo bigeze ku kubaka igihugu hari aho duhuriza. Ndashimira amashyaka umunani yifatanyije na RPF, yashimye ubufatanye natwe agakomeza kudushyigikira.”

Yavuze ko ikigamijwe ari uko Abanyarwanda bose batera imbere ntawe basize inyuma, ku buryo n'ufite intege nke azamurwa, nk'uko FPR yabikoreye abayirimo n'abatayirimo.

Yanagarutse ku rubyiruko, arusaba kwitwararika no kurangwa n'Ubunyarwanda kuko ari bo bayobozi b'ejo.

Ati “Abenshi muri urubyiruko. Muri abayobozi b'uyu munsi n'ejo hazaza. Uko mukura mwiga amashuri, ariko mukanigira no mu muryango umwe w'Abanyarwanda.”

Yizeje abatuye Kicukiro ko iterambere bagezeho, rizakomeza no mu myaka irindwi. Avuga ko ako gace kazaba ihuriro ry'igihugu mu minsi izaza, kubera imishinga izahakorerwa.


Kagame yavuze ko Bugesera igaragaza ubudasa bw'u Rwanda #Rwanda via @kigalitoday

By Editor

Mu buhamya bwabanjirije igikorwa cyo kwiyamamaza kwa Kagame mu Karere ka Bugesera, bwagaragazaga uburyo abatuye Bugesera nta cyizere bari bafite mu myaka ishize ariko ubu kakaba ari kamwe mu duce duhanzweho amaso muri iki gihe.

Kagame yavuze ko kugira ngo Bugesera ive mu icuraburindi ry'ubukene n'ibibazo yari irimo, byasabye imbaraga z'Abanyarwanda utasanga ahandi, ari byo yise budasa.

Yagize ati “Ubudasa bw'u Rwanda burimo byinshi cyane. Butandukanye n'ibibi byaranze amateka yacu. Hari ubudasa bw'ibyo tumaze kugeraho tuva mu mateka mabi.

Kuba hari abatumva ubudasa bwacu bijye bituviramo gukomeza kwiyubaka no gutera imbere.”

Yavuze ko nyuma yo gushyira igihugu ku murongo mu myaka 23 ishize, hakurikiyeho guha Abanyarwanda bose iterambere ridaheza, yavuze ko ibyo ariko bizajyana no gukorera hamwe ku Banyarwanda bose.

Ati “Ubu turubaka u Rwanda rw'ubumwe, dutera imbere ntawe dusize inyuma. Iby'abandi bakora bishingiye ku byo bifuza nk'uko ibyacu bishingiye ku nzira y'ubudasa bwacu.

Turashaka ko buri Munyarwanda wese agira inyungu mu byo dukora, tugakomeza gukorera hamwe.”

Yibukije abatuye mu Karere ka Bugesera igihe cy'itotezwa cyabeyeho ku baturage, ryakorwaga n'abari bashinzwe kubarinda, ariko abasezeranya ko ritazongera ukundi.


Uko byari byifashe ubwo abahanzi bamamazaga Kagame muri Ngororero #Rwanda via @kigalitoday

By Editor
JPEG - 374.7 kb
Abaririmbyi batandukanye bo mu Rwanda basusurukije abaturage bo muri Ngororero

Aho Paul Kagame yiyamamariza hose, abo bahanzi baramuherekeza, mbere y'uko ageza ijambo ku bitabiriye uwo muhango bakabanza gususurutsa abaturage baririmba banabyina indirimbo zitandukanye zamamaza umukandida wa FPR-Inkotanyi.

Reba uko byari byifashe ubwo bari bari mu Karere ka Ngororero, ku wa kabiri tariki ya 18 Nyakanga 2017.

JPEG - 194.9 kb
Platini wo muri Dream Boys
JPEG - 205.2 kb
Jules Sentore
JPEG - 270.3 kb
Senderi na Kitoko
JPEG - 251.1 kb
TMC wo muri Dream Boys
JPEG - 130 kb
King James, Knowless, Jules Sentore na Platini
JPEG - 200.6 kb
Mariya Yohana

JPEG - 188.5 kb
Jay Polly
JPEG - 229.5 kb
Senderi
JPEG - 213.9 kb
Platini na Kitoko
JPEG - 192.1 kb
Knowless
JPEG - 276.2 kb
TMC, Platini na Knowless
JPEG - 205.2 kb
King James na Knowless

Kagame yahize kuzahindura isura y'ubucuruzi bukorerwa Nyabugogo #Rwanda via @kigalitoday

By Editor

Yabitangarije mu gikorwa cyo kwiyamamaza yakoreye mu gace k'ubucuruzi ka Nyabugogo, gaherereye mu Karere ka Nyarugenge, kuri uyu wa gatatu tariki 19 Nyakanga 2017.

Yagize ati “Mu myaka irindwi iri imbere ndashaka ko dukomeza guteza imbere hano, hagahindura isura, hakaba hashya. Ni hakurya hariya hazaduha imirimo, tuhashyire amaterasi meza, tuhashyire amazu abantu bashobora guturamo kandi bakagira n'amashanyarazi.”

Yabivugaga yerekana umusozi uzwi nka “Mont Kigali” ubundi usanzwe udatuwe, aho yacaga amarenga ko hari imishinga migari ijyanye n'imiturire yahateganirijwe.

Yagereranije aka gace ka Nyabugogo n'Umuryango w'Afurika y'Uburasirazuba, kuko ari ho hahurira abantu baturutse mu bihugu byose bigize uwo muryango.

Yababwiye ko icyo basabwa ari ugukomeza gukunda umurimo, bakicungira umutekano kandi bakajyana abana mu mashuri.


UNDP isanga gutera imbere k'u Rwanda biva ku miyoborere myiza #Rwanda via @kigalitoday

By Editor
JPEG - 73.9 kb
Abashyitsi baturutse muri UNDP baganira n'abayobozi ba RGB

Byavuzwe na Abdoulaye Mar Dieye, Umuyobozi wa UNDP mu gace ka Afurika, ubwo we n'itsinda ayoboye riri mu ruzinduko mu Rwanda, basuraga Urwego rw'Igihugu rw'Imiyoborere (RGB), kuri uyu wa 18 Nyakanga 2016.

Uwo muyobozi yavuze ko yazanywe mu Rwanda no kureba uko ruyobowe cyane ko ngo abona rwihuta mu iterambere.

Yagize ati “Najyaga nibaza ikirungo u Rwanda rukoresha ngo rwihute mu iterambere, none nkurikije ibyo naganiriye n'ubuyobozi bwa RGB, nsanze ibanga ari imiyoborere myiza y'igihugu.

Leta ikorera mu mucyo, ikagaragariza abaturage ibibakorerwa, ni umwihariko w'u Rwanda”.

Yongeraho ko kuri we u Rwanda rukwiye kubera urugero Afurika yose mu bijyanye n'imiyoborere, agasaba urubyiruko kuzandika ibitabo kuri Perezida Kagame n'u Rwanda, kugira ngo ibyo yakoze bizajye bifasha n'abandi.

Prof Shyaka Anastase, Umuyobozi mukuru wa RGB, avuga ko ahanini icyabagenzaga ari ukwirebera ko ibyo babonaga mu maraporo bijyanye n'ibihari.

Ati “Bashakaga kureba imiyoborere yacu uko ihagaze cyane cyane ibyo RGB dukora, bibanda ku byo dufatanyamo.

Bajyaga babishima mu maraporo tubaha, nk'uburyo twongerera ubushobozi imiryango itari iya Leta ndetse n'itangazamakuru, cyane ko UNDP yita ahanini ku iterambere ariko ikibanda ku miyoborere”.

Akomeza avuga ko muri rusange bashimiye ibyo babonye kuko bijyanye n'ibyo babonaga mu mpapuro, ikindi kandi ngo bakaba banemeye ko bazakomeza gukorana n'u Rwanda.


Before yesterdayKigali Today

Basketball: Misiri yabujije u Rwanda kujya muri kimwe cya kabiri #Rwanda via @kigalitoday

By Editor
JPEG - 146.8 kb
Misiri yari yashyizemo ikinyuranyo kinini mu mukino ubanza ariko mu mukino wo kwisyura u Rwanda rwihagazeho ikinyuranyo nticyazamuka

Mu mukino wabaye kuri uyu wa kabiri tariki ya 18 Nyakanga 2017, ikipe ya Misiri n'ubundi yari yatsinze u Rwanda mu mikino y'amajonjora ibitego 101 kuri 45, yongeye guhura n'u Rwanda mu mikino ya kamarampaka.

Hashakwaga amakipe ane akina muri ½ maze umukino urangira ari amanota 82 ya Misiri kuri 42 y'u Rwanda bituma rubura amahirwe yo gukomeza.

U Rwanda rwasabwaga gutsinda Misiri na Algeria bazakina mu mukino wa nyuma kugira ngo rubashe kwizera gukina imikino ya ½ ariko ubu ntibigishobotse.

Nyuma yo gutsindwa, u Rwanda ruri ku mwanya wa gatandatu mu makipe umunani. N'iyo rwatsinda umukino wa nyuma ruzakina na Algeria ntirwabasha kubona itike yo kujya muri kimwe cya kabiri.

JPEG - 100 kb
U Rwanda rwatsinzwe na Misiri ku nshuro ya kabiri amahirwe yo gukina kimwe cya kabiri arayoyoka

Mozambique yo iza ku mwanya wa karindwi naho Ibirwa bya Maurice byakiriye iyo mikino biza ku mwanya wa munani.

Amakipe yose asigaje umukino umwe. Ane ya mbere akazakina muri ½ naho u Rwanda n'andi makipe atazagera muri ½ azahatanira kujya ku rutonde kuva ku mwanya wa gatanu kugeza ku wa munani.


❌