impuzamashyirahamwe y'umupira w'amaguru ku Isi ‘FIFA', yamaze kwemeza ko igiye gutanga amafaranga angana na miliyoni n'igice y'amadorali ku mafederasiyo yose yo ku Isi mu rwego rwo guhangana n'ingaruka z'icyorezo cya COVID-19.
FIFA ifashe umwanzuro wo gutanga igice cya gatatu cy'amafaranga mu rwego rwo gutera inkunga amafederasiyo guhangana n'ingaruka z'icyorezo cya COVID-19 cyaba cyarateje abanyamuryango bayo(amakipe).
Ubusanzwe FIFA igenera amafederasiyo miliyoni y'amadorali itangwa mu bice 2, ibihumbi 500 bitangwa umwaka w'imikino ugiye gutangira, andi agatangwa mu mpera z'umwaka w'imikino amafederasiyo amaze kwerekana uko aya mbere yakoreshejwe.
Igice cya kabiri FIFA ikaba yaragitanze mu kwezi gushize itarindiye ko amashyirahamwe atanga uko yakoresheje aya mbere, ndetse ibaha uburenganzira bwo kuyakoresha mu bikorwa byo kurwanya COVID-19.
Mu nama ya FIFA yabaye ku munsi w'ejo ku wa Kane, yemeje ko FIFA igiye gutanga igice cya gatatu cy'amafaranga azifashishwa mu guhangana n'ingaruka z'icyorezo cya COVID-19 cyazahaje amakipe menshi ku Isi.
FIFA izatanga miliyoni y'idorali kuri buri federasiyo igenewe kuzafasha yo n'amakipe guhangana n'ingaruka z'icyorezo cya COVID-19, aya akaziyongeraho ibihumbi 500 by'amadorali yo agenewe guhita ajya mu mupira w'abagore.
Perezida wa FIFA Gianni Infatino yagize ati“nejejwe no kubamenyesha ko inama ya FIFA yemeje gutanga miliyoni 1.5 y'amadorali yo kugobaka amafederasiyo yacu muri ibi bihe bya COVID-19.”
FIFA kandi ikaba yageneye miliyoni 2 z'amadorali buri shyirahamwe (Confederation) uko ari 6. FIFA yemereye buri federasiyo yifuza kwaka inguzanyo bitewe n'ibi bihe ko yabegera imirango irafunguye.
Byitezwe ko aya mafaranga natangwa, mu Rwanda azagera no ku makipe yazahajwe n'iki cyorezo, amwe agahagarika amasezerano y'abakinnyi byanakuruye impaka ndende bishobora no kuzavamo imanza bitewe no kutumvikana hagati y'impande zombi kubera uburyo amasezerano yahagaritswemo. Rayon Sports iri mu makipe yagizweho ingaruka n'icyorezo cya COVID-19 Musanze iri mu makipe yahagaritse amasezerano y'abakinnyi mu ba mbere
http://dlvr.it/RZQN2Y
