Perezida wa Uganda, Yoweli Kaguta Museveni, yikomye Ishami ry’Umuryango w’Abibumbye ryita ku buzima, OMS, ku buryo riri kugira uruhare mu kurwanya Coronavirus, avuga ko butaboneye.
Kuri uyu wa Mbere Museveni yavuze ko OMS yakunze kurangwa no guhuzagurika no
gushyiraho amabwiriza
adashoboka.
Mu ijambo yagejeje ku baturage b’igihugu cye, yatanze urugero avuga ko OMS yatanze
inama kuri Guverinoma ko abantu bashaka kwinjira mu gihugu bagaragaweho
Coronavirus
nyuma yo gupimirwa ku mipaka, bakwiye gufatwa na Uganda ikabitaho ndetse
ikababara
nk’abanduriye mu gihugu.
Museveni yavuze ko bene abo bantu baba basuzumwe mbere yo kwinjira mu gihugu,
ko bitaba biboneye kubashyira mu mubare w’abanduriye mu gihugu.
Ati “Uburyo OMS ikoramo si bwiza. Bakeneye ubufasha. Barashaka ko twinjiza mu
gihugu abantu bapimiwe ku mipaka bakagaragara ko banduye COVID-19, ariko
twaravuze
tuti Oya.”
Yavuze ko OMS itazi umuco wa Uganda. Ati “Ntabwo bazi umuco wacu. Muri Uganda,
iyo urugo rufite uruzitiro kandi umunyamahanga akaba atarurenze, ubwo rero ntabwo
abarwa nk’umuntu uri mu bagize urwo rugo.”
Gusa yavuze ko atanenga OMS nk’uko byakozwe na Perezida wa Leta Zunze Ubumwe
za Amerika, Donald Trump.
Ati “Sinshaka kugaragara nka Trump, witandukanyije na OMS. Ariko ndashaka ko
bakora
ibintu biboneye.”
Museveni yakomeje avuga ko mu bwandu bw’abantu 774 ba Coronavirus mu gihugu
cye, 373 ari abashoferi b’amakamyo ndetse ko mu bari muri 631 bakize, bamaze
koherezwa
mu bihugu byabo.
Yavuze ko abanyamahanga 167 bapimwe bagasanganwa COVID-19 bakiri ku mipaka
bagahita basubizwa mu bihugu byabo.
Source : igihe.com
