Umugabo witwa Bizimana Innocent w’imyaka 30 utuye mu mudugudu wa Musave, akagari ka Mbuye,umurenge wa Rukozo, akarere ka Rulindo yishe umugore we witwa Twiringiyimana Chantal w’imyaka 32 akoresheje Inshoka.
Nyakwigendera Twiringiyimana yasanzwe yapfuye kuri uyu wa Gatanu tariki 5 Kamena 2020 mu masaha ya saa yine za mu gitondo.
Amakuru agera kuri IGIRE avuga ko abana bavuye gusenya hanyuma bageze mu rugo basanga urugi rurakinze bagerageje kurusunika biranga maze umwana umwe w’umuturanyi abarusha ubwenge arurira asimbukira mu nzu ubwo asanga uwo mubyeyi yamaze kwitaba Imana.Uwo mwana yahise yiruka atabaza abaturanyi bose baraza baratabara.
Umunyabanga nshingwabikorwa w’umurenge wa Rukozo Niyonambaza Louis yabwiye IGIRE ko ayo makuru ariyo ndetse ko Bizimana yamaze gufatwa akaba afunze.
Ati”Yasanzwe yapfuye bigaragaragara y’uko yatemwe hanyuma umugabo abantu bamubona agenda ariko biza kugaragaragara ko bakeka ko yaba yamwishe hanyuma arafatwa aza gushyikirizwa sitasiyo ya RIB Kinihira”.
Yakomeje avuga ko uyu muryango n’ubusanzwe wabanaga mu makimbirane ariko atari ku rwego rw’uko umuntu yakora igikorwa nk’icyo cy’ubunyamaswa.
Ubwo twavuganaga na Gitifu Niyonambaza,yatubwiye ko ubuyobozi n’inzego z’umutekano DASSO ndetse na RIB bari bakiri aho icyaha cyabereye ndetse ko bari kwitegura kujyana umurambo wa nyakwigendera gukorerwa isuzuma ku bitaro bya Kinihira cyangwa ibya Kacyiru mu mujyi wa Kigali.
The post Rulindo: Umugabo yishe umugore we akoresheje ishoka appeared first on IGIRE.
