Inzego zishinzwe umutekano muri Repubulika Iharanira Demokarasi ya Congo, zirashinja zimwe mu mpunzi z’Abarundi zahungiye muri icyo gihugu gukorana n’imitwe yitwaje intwaro ikorera muri Fizi ho mu ntara ya Kivu y’Amajyepfo.
Ku wa Gatatu w’iki cyumweru, abayobozi mu ngabo za Repubulika Iharanira Demokarasi ya Congo bahuriye mu nama n’abahagarariye impunzi z’Abarundi, mu gushakira umuti wa kiriya kibazo.
Umwe mu bayobozi bashinzwe ubutasi ahitwa Mboko muri Kivu y’Amajyepfo, yavuze ko hari impunzi nyinshi z’Abarundi zo mu nkambi ya Lusenda zafashwe n’igisirikare cya Congo Kinshasa zirwanirira imitwe yitwaje intwaro ikorera mu Burasirazuba bw’icyo gihugu.
Ati: “Bamwe bafatiwe muri Kabumbe, mu gihe abandi bafaterewe muri yombi muri Swima.” Iyo ntasi ntiyatangaje umubare w’impunzi zafashwe zikorana n’abitwaje intwaro.
Amakuru avuga ko imitwe ikorana n’impunzi z’Abarundi irimo uwa Mai-Mai ndetse n’uwa Gumino ugizwe ahanini n’abarwanyi b’Abanyamulenge.
John Mulondani, Umuyobozi wa Segiteri ya Tanganyika yabereyemo inama yahuje inzego z’umutekano za Congo Kinshasa n’abahagarariye impunzi, yavuze ko abafunzwe n’igisirikare bafatiwe mu mirwano yabereye mu duce twa Kamombo na Mikalati.
Abahagarariye impunzi z’Abarundi mu nkambi ya Lusenda bahakaniye mu nama ko nta mpunzi zikorana n’iriya mitwe.
Emmanuel Ntirampeba uhagarariye impunzi yagize ati: “Niba hari impunzi zafatiwe muri iyo mirwano, nimuzitwereke zihanwe n’amategeko. Ibindi ntibihagije kuvuga ngo twafashe impunzi hanyuma mugatuma abantu bemera ko ari ukuri.”
Ntirampeba uhagarariye Komisiyo y’igihugu ishinzwe impunzi muri Fizi, yemereye ishimwe ry’amadorali 50 ya Amerika umuntu wese uzatanga amakuru y’impunzi yaba itunze intwaro.
The post RDC: Impunzi z’abarundi zikomeje gushinjwa gukorana n’imitwe yitwaje intwaro. appeared first on KASUKU MEDIA.
source https://kasukumedia.com/rdc-impunzi-zabarundi-zikomeje-gushinjwa-gukorana-nimitwe-yitwaje-intwaro/
