Ikigo cy'igihugu cy'imiyoborere (Rwanda Governing Board) cyashyizeho abayobozi bashya b'umuryango 'Association Rayon Sports' nyuma y'uko Munyakazi Sadate wayoboraga uyu muryango, yakuweho ku munsi wo kuwa kabiri tariki 22Nzeri 2020
Komite nyobozi y'inzibacyuho yashyizweho uyu munsi, izagira inshingano zitandukanye mu gihe cy'ukwezi kubarwa uhereye kuri uyu wa 24 Nzeri 2020.
Murenzi Abdallah wayoboye neza iyi kipe mu mwaka wa 2013, ni we wagizwe Perezida w'inzibacyuho, aho azungirizwa na Twagirayezu Thadée wigeze kuba Visi-Perezida w'iyi kipe ndetse na Maitre Nyirihirwe Hilaire.
Murenzi Abdallah uyoboye Komite y'inzibacyuho ya Rayon Sports, akabifatanya no kuyobora ishyirahamwe ry'umukino wo gusiganwa ku magare 'FERWACY' , ni umwe mu bayobozi batazibagirana vuba mu mitima y'abakunzi ba Rayon Sports, kuko yayibashishije gutwara igikombe cya Shampiyona muri 2013, aho yari imaze imyaka 9 itagitwara.
Murenzi wari Mayor w'akarere ka Nyanza icyo gihe, yavuye ku buyobozi bwa Rayon Sports nyuma y'igihe gito batwaye igikombe, kubera itegeko ry'ikigo cy'igihugu cy'imiyoborere (RGB) ryavugaga ko nta muyobozi wo mu nzego za Leta wemererwa kubifatanya no kuyobora ikipe.
