Igihembo cy'amahoro cyiritiwe Nobel cya 2020 gihawe ishami ry'umuryango w'abibumbye ryita ku biribwa ku isi WFP cyangwa PAM, kubera umuhate waryo mu kurwanya inzara ku isi.
Komite itanga ibi bihembo byitiriwe Nobel ivuga ko PAM yabaye 'ingenzi mu muhate wo kurwanya gukoresha inzara nk'intwaro y'intambara n'amakimbirane'.
Iki gihembo gifite agaciro ka miliyoni imwe y'amadorari (ni hafi miliyari imwe mu mafaranga y'u Rwanda).
Ku nshuro ya 101, uwegukanye iki gihembo yatangajwe na Norwegian Nobel Institute i Oslo.
Umuvugizi wa WFP yavuze ko 'iki ari ikintu giteye ishema'.
WFP igereranya ko ifasha abantu miliyoni 97 buri mwaka mu bihugu 88.
Abantu 211 n'imiryango 107 bari baratanzwe nk'abakandida bahabwa iki gihembo uyu mwaka.
Amategeko ya Nobel Foundation avuga ko urutonde rwanyuma rw'abatoranywamo ugiha rudashobora gutangazwa mu gihe cy'imyaka 50.
Uwo muryango uvuga ko ibihuha byose byavugwa mbere yo gutangaza uwacyegukanye 'ari ugukekeranya kudafite ishingiro'.
Ishami ry'umuryango w'abibumbye ryita ku buzima OMS hamwe n'impirimbanyi yo kurengera ibidukikije Greta Thunberg bari mu bahabwa amahirwe yo kugihabwa uyu mwaka.
Kajugujugu y'umuryango w'abibumbye ishinzwe ibiribwa ku isi (WFP)
