Los Angeles Lakers yari yatsinzwe umukino uheruka, ibifashijwemo na LeBron James, yitwaye neza itsinda Miami Heat amanota 106 kuri 93 mu mukino wa gatandatu wa nyuma mu mikino irindwi ikinwa ku mukino wa nyuma wa NBA.
LeBron James na Anthony Davis bigaragaje cyane bakinaga nk'abantu badashaka kumara irindi joro muri hotel nuko bafasha Los Angeles Lakers kwegukana igikombe cya 17 cya NBA mu mateka yayo. LeBron James aba umukinnyi wa mbere wegukanye NBA ari kumwe n'amakipe atatu atandukanye.Â
Kwegukana iki gikombe bikomeje gutuma LeBron James yandikaka amateka kuri NBA aho bakomeza ku mugereranya na Michael Jordan nk'umukinnyi w'ibihe byose wabayeho mu mateka ya NBA. James yatsinze amanota 28, akora rebounds 18 ndetse atanga imipira ivamo amanota 10.
Uyu mugabo w'imyaka 35 y'amavuko niwe watowe nk'umukinnyi witwaye neza mu irushanwa, igihembo yegukanye ku nshuro ya kane ndetse aba n'umukinnyi witwaye neza ku mukino wa nyuma. Ibi byatumye aca kuri Magic Johnson, Shaquille O'Neal na Tim Duncan asigara arushwa na Michael Jordan wegukanye iki gihembo ishuro esheshatu.Â
Nyuma y'umukino LeBron James yatangaje ko ashaka icyubahiro akwiye nyuma yo gufasha Los Angeles Lakers yari itaratwara igikombe cya NBA mu myaka icumi. Uyu wari umwaka wa kabiri wa LeBron James muri LA Lakers kuva yayerekezamo avuye muri Cleveland Cavaliers muri 2018.
'Twebwe dushaka icyubahiro dukwiye nta kindi. Rob Pelinka, umuyobozi wa LA Lakers akeneye icyubahiro, Frank Vogel, umutoza wa LA Lakers akeneye icyubahiro, ubuyobozi bwose bw'ikipe bukeneye icyubahiro, buri umwe wese akeneye icyubahiro kand nanjye nkeneye icyubahiro nkwiye.'Â LeBron James aganira na ESPN nyuma y'umukino.Â
LeBron James yakinaga umukino we wa 260 wa playoff byahise bituma uyu mugabo akora amateka, aba umukinnyi wa mbere ukinnye imikino myinshi ya playaoff mu mateka ya NBA aho yanyuze kuri Derek Fisher.Â
Mu mukino wa gatanu batsinzwe mo na Miami Heat, James LeBron yabaye umukinnyi wa mbere utsinze amanota 40 mu gihe ikipe akinira yatsinzwe muri NBA kuva byakorwa na Michael Jordan mu wa 1993.
NBA ryari ryo rushanwa rya mbere ryo muri Leta Zunze Ubumwe z'America ryahagaze kubera icyorezo cya coronavirus, nta wari uziko rizakomeza ngo rigane ku musozo kuko amakipe 22 yose yari yagiye mu kato mu ntangiro za Nyakanga.Â
Kugeza ubu, ntibizwi igihe umwaka w'imikino mushya wa NBA uzatangirira, Adam Silver ukuriye NBA yatangaje ko 'akeka cyane' ko utazatangira mbere y'ukwezi kwa mbere 2021.
Lakers yaherukaga gutwara igikombe cya shampiyona ya NBA mu 2010
