Iyo modoka yari irimo abantu batanu yageze mu Mudugudu wa Muhanga mu Karere ka Muhanga irenga umuhanda, umuntu umwe ahita apfa, abandi bane barakomereka.
Umuvugizi wa Polisi mu Ntara y'Amajyepfo, Superintendent Theobald Kanamugire, yabwiye Kigali Today ko iyo mpanuka yaturuse ku muvuduko munini iyo modoka yagenderagaho, uwo muhanda ukaba wari urimo n'ubunyerere bwaturutse ku mvura yari irimo kugwa.
Yaboneyeho no kwibutsa abantu kwigengesera muri ibi bihe by'imvura n'ubunyerere, bakirinda umuvuduko ukabije, bakubahiriza n'andi mabwiriza abagenga mu gihe bari mu muhanda.
Umurambo w'uwapfiriye muri iyo mpanuka ndetse n'abakomeretse bahise bajyanwa ku bitaro bya Kabgayi i Muhanga.
Hari amakuru avuga ko uwitabye Imana ari umukobwa w'imyaka 23 y'amavuko, akaba yari afite ubukwe mu kwezi gutaha.
source https://www.kigalitoday.com/umutekano/imbere-mu-gihugu/article/muhanga-imodoka-yarenze-umuhanda-umuntu-umwe-arapfa-abandi-bane-barakomereka
