Paruwasi ya Katedrali ya Ruhengeri mu Karere ka Musanze ishobora guhagarikwa nyuma y'uko abapadiri, ku cyumweru, tariki ya 11 Ukwakira, basanze basoma Misa ariko batubahirije ingamba zo kwirinda Covid-19.
Ni nyuma y'igenzura Polisi y'Igihugu yakoze ejo ku cyumweru, mu nsengero zo mu turere twa Musanze, Burera, Gicumbi na Gakenke.
Polisi yasanze muri Kiliziya ya Diyosezi ya Ruhengeri harimo abasaza n'abakecuru bashyizwe ukwabo muri iyo Chapelle barimo gusomerwa igitambo cya misa na Padiri Nsengiyumva Félicien, mu gihe amabwiriza avuga ko abana n'abageze mu zabukuru batemerewe kwitabira amateraniro, mu rwego rwo kwirinda ikwirakwizwa rya Covid-19.
Muri Kiliziya nini hari irindi tsinda risomerwa misa na Padiri mukuru wa Paruwasi ya Ruhengeri, Padiri Ndagijimana Emmanuel.
Umuyobozi wa Polisi mu Ntara y'Amajyaruguru, ACP Révérien Rugwizangoga, yavuze ko mu nsengero zigera kuri 72 bagenzuye, kuri Diyosezi ya Ruhengeri ari ho honyine batari bubahirije amabwiriza yo kurwanya COVID-19.
Ati: 'Mu nsengero zirenga 72 twakoreye igenzura mu Karere ka Musanze, Gakenke, Gicumbi na Burera, muri Cathédrale ya Ruhengeri niho honyine twasanze bakoze ibinyuranyijwe n'amabwiriza. Twasanze abantu begeranye cyane ku buryo byashyira mu kaga abakirisitu bari baje mu misa.'
ACP Rugwizangoga yavuze ko abakecuru n'abasaza bari muri chapelle bari begeranye cyane kandi batambaye udupfukamunwa, mu gihe abandi bakirisitu bari muri cathedrale nabo batari bubahirije intera yagenwe hagati y'umuntu n'undi kuko intebe isanzwe yicarwaho n'abantu bane kuri ubu igomba kwicarwaho n'abantu babiri gusa ariko ntabwo byari byubahirijwe.
Dore uko bari bameze
Ubushakashatsi bwakozwe kandi butangazwa n'Ishami ry'Umuryango w'Abibumbye ryita k'Ubuzima (OMS) buvuga ko akenshi abantu bakuze cyane ari bo bibasirwa n'icyorezo cya COVID-19.
Padiri Emmanuel Ndagijimana na Padiri Felicien Nsengiyumva
Abapadiri barenze ku mabwiriza yo kurwanya COVID-19 bahanwe hakurikijwe amabwiriza ahana abarenze ku mabwiriza yo kurwanya COVID-19.
ACP Rugwizangoga yongeye kwibutsa amadini n'amatorero by'umwihariko abahawe uburenganzira bwo gusubukura serivisi ko bagomba kubahiriza amabwiriza yatanzwe n'inzego zibifitiye ububasha kandi bakagira uruhare mu gukumira ikwirakwira rya COVID-19.
RNP
Source : https://impanuro.rw/2020/10/12/musanze-paruwasi-ya-katedrali-ya-ruhengeri-ishobora-guhagarikwa/
