Umunya-Brazil wahoze atoza ikipe ya Rayon Sports, Roberto Oliveira Gonçalves do Carmo yamaze kugirwa umutoza wa Gor Mahia yo muri Kenya.
Robertinho ni umwe mu batoza banditse amateka hano mu Rwanda ubwo yari muri Rayon Sports, kuko yafashije iyi kipe kugera muri 1/4 cya CAF Confederations Cup bwa mbere mu mateka yayo, hari muri Kanama 2018 ndetse ayihesha igikombe cya shampiyona umwaka w'imikino 2018-2019.
Nyuma y'umwaka umwe atandukanye na Rayon Sports, akaba yamaze kugirwa umutoza wa Gor Mahia yo muri Kenya asimbuye Steven Palack watandukanye n'iyi kipe ku bwumvikane.
Iyi kipe binyuze kuri website yabo yishimiye kwakira uyu mutoza bahamya ko azabafasha byinshi kuko badashidikanya ku bushobozi bwe.
Ubwo yari muri Rayon Sports, yari kumwe na Gor Mahia mu itsinda D rya CAF Confederations Cup, imikino 2 yabahuje umwe yawubatsindiye muri Kenya 2-1, ni mu gihe undi banganyije i Kigali 1-1.
Robertinho yinjiye muri Rayon Sports muri Kanama 2018, baza gutandukana muri Kanama 2019.
