Robertinho werekeje muri iyi kipe ikunzwe cyane muri Kenya agiye gusimbura umutoza w'umunya Finland Steven Pollack, wari wageze muri iyi kipe mu kwezi kwa munani k'umwaka ushize.
Steven Pollack watandukanye na Gormahia ku bwumvikane yari yahawe ikiruhuko cy'iminsi 10 ngo ajye kwita ku bibazo by'umuryango we muri Finland ariko iminsi yari yahawe ishize ntiyagarutse bitera uburakari ikipe ya Gormahia ihitamo kumusimbuza umunya-Brazil Robertinho.
Umuyobozi w'ikipe ya Gormahia Ambrose Rachier yatangarije ikinyamakuru Futaa cyandikirwa muri Kenya ko bategereje umusaruro mwiza kuri Robertinho.
Yagize ati "Twishimiye kumenyesha abakunzi ba Gormahia ukuza k'umutoza mushya Roberto Oliveira ukomoka muri Brazil. Afite ubunararibonye mu gutoza muri Afurika bityo bizatuma arushaho kutugeza kure mu marushanwa ya Afurika tugiye kwitabira. Turatekereza ko azaba umutungo ukomeye mu gushaka kwacu kugira ngo tugere ku musaruro mwiza."
Gormahia ifite ibyumweru 3 gusa ngo ihagararire Kenya mu mikino nyafurika ihuza amakipe yabaye aya mbere iwayo (CAF Champions League) mu kwezi k'Ugushyingo. Robertinho muri Kenya baramuzi kuko azwiho ko ubwo bahuraga n'iyi kipe mu mikino y'amatsinda ya CAF Champions League yayitsinze ibitego 2-1 mu mukino wari wabereye i Kasarani muri Kenya.
Ikipe ya Gormahia Robertinho agiye gutoza ni yo ifite ibikombe byinshi bya shampiyona muri Kenya aho yegukanye ibikombe 18. Iyi kipe ni na yo ifite igikombe cya shampiyona mu mwaka w'imikino ushize ndetse n'igikombe kiruta ibindi mu gihugu cya Kenya.
Robertinho w'imyaka 60 y'amavuko, uretse ikipe ya Rayon Sports, yatoje amakipe atandukanye yo muri Afurika, u Burayi na Azia.
Uyu mutoza ubwo yari umukinnyi mu myaka ya 1980 yanahamagawe mu ikipe y'igihugu ya Brazil ku mukino bahuragamo n'ikipe ya Paraguay.
source https://www.kigalitoday.com/imikino-11/football/article/robertinho-wahoze-atoza-rayon-sports-yerekeje-muri-gormahia-yo-muri-kenya
