Mu kwiyamamariza ku kuba perezida wa Tanzania, uyu munsi Perezida John Magufuli yasabye Abatanzania kwifatanya n'Abanyakenya mu masengesho yabo basaba ko coronavirus irangira iwabo.
Bwana Magufuli yavuze ko Kenya izakora amasengesho yo ku rwego rw'igihugu kuva uyu munsi, ejo tariki 10 no ku cyumweru tariki 11.
Yongeyeho ati: 'birakwiye ko tubafasha gusenga kugira ngo corona ive iwabo nk'uko Imana yayivanye hano muri Tanzania.'
Muri iki cyorezo cya coronavirus Kenya na Tanzania byagiranye amakimbirane ashingiye ku kwemerera no kwangira abaturage kwambuka imbibi z'ibihugu byombi.
Mu ntangiriro z'iki cyumweru perezida Uhuru Kenyattta wa Kenya yatangaje ko agiye gusaba abaturage bose gusenga cyane kugira ngo iki cyorezo gishire mu gihugu.
Muri ayo masengesho ibindi bibazo bikomereye igihugu yavuze ko nabyo babizirikana.
Amasengesho yo ku cyumweru yo biteganyijwe ko azabera ku biro by'umukuru w'igihugu i Nairobi guhera saa kumi za mugitondo.
Ayo masengesho kandi azerekanwa mu gihugu hose kuri radio na televiziyo no ku mbuga nkoranyambaga ari kuba.
Kuva mu kwezi kwa gatanu, Tanzania yahagaritse gutangaza uko ihagaze imbere y'iki cyorezo, nyuma yaho abategetsi bagiye bemeza ko iyi ndwara yashize muri iki gihugu.
The post Tanzania: prezida Magufuri mukwiyamamaza yasabye abanya Tanzaniya kwifatanya na kenya mu gusengera covid-19 bakareba ko nabo yacika burundu appeared first on Kigalinews24.
