Perezida wa Leta zunze ubumwe za Amerika Donald Trump, yakatiwe urwo gupfa n'urukiko rwo mu gihugu cya Yemen ari kumwe n'abandi bantu icyenda, barimo umwami wa Arabie Saoudite n'igikomangoma cyo muri kiriya gihugu, bashinjwa ibyaha by'intambara. Nkuko tubikesha Ikinyamakuru Daily Star.co.uk
Ku wa kane w'iki cyumweru, Perezida Trump n'abo bareganwa bakatiwe urwo gupfa badahari. Ni urubanza rwabereye mu rukiko rw'ahitwa Saada muri Yemen rusanzwe ruri mu maboko y'inyeshyamba z'aba Houthi zirwanya ubutegetsi bwa Yemen.
Urukiko rwakatiye urwo gupfa abantu barimo:
_ Perezida Donald Trump
_Umwami Salman wa Arabie Saoudite,
_N' igikomangoma cya kiriya gihugu
_Turki bin Bandar bin Abdulaziz uyobora ingabo za Arabie Saoudite zirwanira mu kirere
_Perezida wa Yemen, Abedrabbo Mansour Hadi.
_Visi-Perezida wa Yemen, Ali Mohsin Al-Ahmar
_Minisitiri w'Intebe wa kiriya gihugu, Ahmed bin Dagher
_Minisitiri w'Ingabo, Muhammad Al-Maqdishi
_ James Mattis wahoze ari Umunyamabanga w'Igisirikare cya Amerika na we yakatiwe urwo gupfa.
Urukiko kandi rwanzuye ko abaregwa batanga indishyi za miliyari 10 z'amadorali ya Amerika nk'indishyi z'akababaro zo guha imiryango yagizweho ingaruka n'igitero cy'indege cyabaye mu mwaka ushize.
Ni igitero bivugwa ko cyagabwe ku modoka yo mu bwoko bwa Bisi kigahitana abantu 51 barimo abana 40.
Guverinoma ya Yemen imaze igihe ihanganye n'inyeshyamba z'aba Houthi bivugwa ko ziterwa inkunga n'igihugu cya Iran, zigaruriye igice cy'amajyaruguru ya kiriya gihugu n'umurwa mukuru Sana'a kuva muri 2014.
Ibyo byatumye muri 2015 Leta ya Arabie Saoudite ihitamo koherereza Guverinoma ya Yemen ingabo zo kuyitera ingabo mu bitugu.
Source : https://impanuro.rw/2020/10/10/trump-yakatiwe-igihano-cyo-gupfa-n-abandi-bayobozi/
