Ku isaha ya saa kumi n'ebyiri z'i Kigali nibwo ruza kuba rwambikanye Amavubi ahura na Cap- Vert kuri Estádio Nacional Cabo Verde.
Umutoza Mashami kuri uyu mukino yahisemo gukoresha abakinnyi biganjemo abakina hanze y'u Rwanda aho mu izamu yabanjemo Kwizera Olivier, mu gihe mu bwugarizi aza kwiyambaza ba myugariro bane aribo Rwatubyaye Abdul, Manzi Thierry, Omborenga Fitina na Imanishimwe Emmanuel.
Hagati mu kibuga yahisemo kubanzamo Mukunzi Yannick, Niyonzima Ally na Bizimana Djihad mu gihe abasatira ari Niyonzima Haruna, Tuyisenge Jacques na Kagere Meddie.
Umusifuzi w'uyu mukino ni Umunya-Ghana, Daniel Nii Ayi Laryea, uza kuba yungirijwe Kwasi Acheampong Brobbey hamwe na Paul Kodzo Atimaka. Adaari Abdul Latif niwe musifuzi wa kane mu gihe Komiseri w'umukino ari Umunya-Mauritanie, Mohamed Abdatt Bilal.
Muri iyi mikino yo gushaka itike ya CAN 2021, u Rwanda ni urwa nyuma mu itsinda F n'amanota 0, nyuma y'uko rwatsinzwe na Mozambique ibitego 2-0 ndetse na Cameroun igitego 1-0, mu mikino ibiri ibanza yabaye mu Ugushyingo 2019.
Cap-Vert igiye guhura n'u Rwanda, iri ku mwanya wa gatatu mu itsinda n'amanota abiri. Yanganyije na Cameroun ubusa ku busa i Yaoundé mbere yo kwakira Mozambique bikanganya ibitego 2-2.
Cap-Vert iheruka gukina imikino ibiri mpuzamahanga ya gicuti mu kwezi gushize, aho yatsinze Andorra ibitego 2-1, igatsindwa na Guinée 2-1.
Nyuma y'umukino, amakipe yombi arahita afata indege imwe aho azongera guhurira mu mukino w'umunsi wa kane uzabera kuri Stade ya Kigali i Nyamirambo tariki ya 17 Ugushyingo 2020.
Source : http://www.ukwezi.rw/Imikino/article/Abakinnyi-11-babanza-mu-kibuga-Amavubi-akina-na-Cap-Vert
