Kuri uyu wa Gatandatu tariki ya 28 Ugushyingo 2020, Minisitiri w'intebe wa Ethiopia Abiy Ahmed avuga ko ingabo za leta y'iki gihugu ubu 'zigenzura' umurwa mukuru wa leta ya Tigray iri mu majyaruguru.
Mu butumwa bwo kuri Twitter, Bwana Abiy yavuze ko ingabo za leta ya Ethiopia zirimo kugenzura umujyi wa Mekelle kandi ko ibi 'bivuze ko iyi ari impera y'icyiciro cya nyuma [cy'igitero cya gisirikare]'.
Ati: 'Nejejwe no kubasangiza ko twarangije ndetse duhagarika ibikorwa bya gisirikare mu karere ka Tigray'.
Bwana Abiy yavuze ko ingabo ze zabohoje abasirikare babarirwa mu bihumbi bari bafashwe na TPLF ndetse ko zigenzura ikibuga cy'indege n'ibiro bikuru by'ubutegetsi muri iyo leta.
Yongeyeho ko icyo gikorwa cya gisirikare cyakozwe 'hitabwa mu buryo bwa ngombwa ku baturage [b'abasivile]'.
Hari habayeho kugira ubwoba ko gishobora kuba ku baturage 500,000 baba mu mujyi wa Mekelle.
Bwana Abiy yagize ati: 'Ubu akazi k'ingenzi dufite imbere yacu ni ukongera kubaka ibyashenywe… [no] gucyura abahunze'.
Umukuru wa TPLF yabwiye ibiro ntaramakuru Reuters ko izakomeza 'kurwanirira uburenganzira bwacu bwo kwitegeka' no 'kurwanya aba bateye kugeza ku wa nyuma'.
Iyi mirwano yatangiye mu ntangiriro z'uku kwezi kwa cumi na kumwe, nyuma yuko Bwana Abiy atangaje igitero kuri TPLF, ishyaka ryo muri iyo leta, arishinja kugaba igitero ku kigo gikuru cya gisirikare cy'i Mekelle â€" ibyo TPLF yahakanye.
Gusa amakuru ajyanye n'imirwano biragoye kuyemeza kuko imirongo yose ya telefone na internet ihuza n'akarere ka Tigray yaciwe.
Abantu babarirwa mu magana barishwe naho abandi babarirwa mu bihumbi bata ingo zabo kubera imirwano.
Src: BBC
Source : https://impanuro.rw/2020/11/29/abiy-ahmed-avuga-ko-ingabo-ze-zafashe-umurwa-mukuru-wa-tigray/
