Inzego z'ubuzima mu Rwanda ziratangaza ko imibare y'abandura coronavirus ikomeje kuzamuka muri iyi minsi ariko ikaba yibasiye amagereza ku buryo budasanzwe.
Imibare itangazwa buri munsi y'abashya banduye coronavirus iragaragaza ko amazu y'imfungwa ari yo magereza akomeje kwibasirwa cyane n'ubwandu bwa coronavirus.
Ministeri y'ubuzima ivuga ko ku bantu 61 batangajwe ku munsi w'ejo, 55 bose ni abatahuwe muri gereza nkuru ya Kigali iri ahitwa Mageragere.
Ibi byatumye amagereza 3 amaze kugaragaramo ubwandu abarura abantu banduye basaga 160 kandi iyi ikaba ari imibare yo mu gihe kitarenze icyumweru kimwe.
Uretse abanduye itangazo rya Ministeri y'ubuzima riranavuga abantu 3 bashya bahitanywe n'iyi ndwara bose bakaba baguye mu karere ka Rwamagana.
Iyi Rwamagana imaze gutakaza abantu 7 mu gihe kitarenze icyumweru ni na yo irimo Gereza ya Nsinda iherutse kubonekamo abanyururu banduye ari benshi.
Abashinzwe ubuzima bavuga ko nta bwandu bushya buri kugaragara mu baturage muri rusange ariko bagasaba abaturage kurushaho kwitwararika kuko virus yakongera kugarukana ingufu mu gihe yaba ihawe icyuho.
Kugeza ubu mu Rwanda abamaze kwandura iki cyorezo ni 5,455 mu gihe abamaze gukira ari 4,995.Abakirwaye ni 415 abo kimaze guhitana ni 45.kuva cyahagera kuwa 14 Werurwe 2020
Source : https://impanuro.rw/2020/11/16/covid-19-ikomeje-gufata-benshi-muri-gereza-zo-mu-rwanda/
