Umutoza w'ikipe ya Police FC, Haringingo Francis ahamya ko abakinnyi be bashya barimo Faustin, Papy, Radu, Rutanga na Martin bameze neza ndetse shampiyona izajya gutangira bahagaze bwuma.
Police FC ni imwe mu makipe yiyubatse uyu mwaka ndetse yongeramo amazina azwi cyane mu Rwanda nka Usengimana Faustin, Rutanga Eric, Twizerimana Martin Fabrice, Iradukunda Eric Radu na Sibomana Patrick Papy.
Muri aba bakinnyi bamwe bakaba bari bamaze igihe badakina, n'abakinaga bakaba bari bamaze igihe kinini mu kiruhuko kubera COVID-19.
Umutoza w'iyi kipe, Haringingo Francis avuga ko abakinnyi be bashya yaguze umunsi ku munsi bagenda bazamura urwego bityo ko yizeye ko shampiyona izajya gutangira bahagaze bwuma.
Ati'ubu barimo barinjira neza, batangiye kumenyerana n'abandi, ikipe imeze nk'iyahindutse cyane, ubu bimeze neza ariko ntabwo biraba uko njye byifuza, ni ukuvuga barimo kwinjira ariko imikino iri imbere bazaba binjiyemo neza.'
Ku bakinnyi babiri, Radu na Papy ubona ko bataragarura umuvuduko bari bafite mbere, yavuze ko yizeye ko shampiyona izajya gutangira bameze neza kuko n'ubundi uko baje bamaze kwiyongeraho ikintu kinini.
Ati'urebye imikino niyo igarura umuvuduko w'abakinnyi, Radu na Papy navuga ko hari icyo biyongereyeho kuko uko baje siko bahagaze ubu, ndebye akazi barimo gukora n'ubushake barimo kubishyiramo dushobora kugera muri shampiyona bameze neza, ndimo gukorana nabo umunsi ku munsi.'
Police FC yagombaga gutangira shampiyona tariki ya 4 Ukuboza ikina na AS Kigali ariko uyu mukino wahise uba ikirarane kuko AS Kigali tariki ya 5 Ukuboza izaba ifite umukino wo kwishyura wa CAF Confederations Cup na Orapa United yo muri Botswana.
