Ubusanzwe kuri iyi tariki i Kibeho habaga hateraniye abakirisitu ibihumbi n'ibihumbi, ariko uyu munsi hitabiriye 400 mu misa ya mbere na 400 mu ya kabiri.
Musenyeri Célestin Hakizimana, umushumba wa Diyosezi ya Gikongoro, yasabye abitabiriye kuzirikana ubutumwa Bikira Maria yahaye abakobwa batatu babonekewe.
Yagize ati “Bikira Mariya wabonekeye i Kibeho ni nyina wa Jambo. Ni yo mpamvu tuzirikana ubutumwa yatanze, kwicuza, gusenga, kwigomwa,....”.
Naho Musenyeri Simaragde Mbonyintege, umushumba wa Diyosezi ya Kabgayi na we wari uhari, akaba n'umwe mu bari bagize itsinda ryagenzuye amabonekerwa ya Kibeho kuva mu 1983, yavuze ko ubutumwa bw'aba bakobwa bwahise buba ubutumwa bwa Kiliziya, akaba ari yo mpamvu umwepiskopi wa Gikongoro aba agomba kubahiriza ubutumwa bwa Kibeho.
Nubwo i Kibeho hateraniye abakirisitu bakeya kubera icyorezo cya Covid-19, kuzirikana amabonekerwa yabereye i Kibeho byanabereye mu maparuwasi yose yo mu Rwanda.
source https://www.kigalitoday.com/amakuru/amakuru-mu-rwanda/article/kibeho-abakirisitu-babanje-kwiyandikisha-ni-bo-bijihije-isabukuru-ya-39-y-amabonekerwa
