Kuri uyu wa Kabiri tariki 17 Ugushyingo 2020, Ikipe y'igihugu y'u Rwanda 'Amavubi' irakira Ikipe y'Igihugu ya Cape Verde 'Tubarões Azuis', mu mukino w'umunsi wa kane mu itsinda 'F' mu gushaka itike yo kuzakina igikombe cy'Afurika cya 2022 kizabera muri Cameroon.
Tariki 12 Ugushyingo 2020, ni bwo ibi bihugu byombi byari byahuye mu mukino w'umunsi wa gatatu umukino ukaba wararangiye amakipe yombi aguye miswi 0-0, mu mukino wari wabereye kuri Estadio Nacional de Cabo Verde.
Mu ijoro ryo ku wa Gatanu rishyira ku wa Gatandatu, ni bwo abakinnyi b'ikipe y'igihugu y'u Rwanda Amavubi bageze mu Rwanda, aho bagarukanye n'Ikipe y'Igihugu ya Cape Verde mu ndege imwe ya Rwandair.
Nyuma yo kunganya 0-0 mu mukino wabereye i Praia muri Cape Verde, aya makipe yombi yakaniye kwegukana amanota atatu mu mukino wo kwishyura uba kuri uyu wa Kabiri kuri Stade ya Kigali i Nyamirambo ugatangira saa cyenda, aho nta mufana wemerewe kwinjira muri stade.
ABAKINNYI BASHOBORA KUBANZA MU KIBUGA
• Umunyezamu
Kwizera Olivier
• Ba myugariro
Rwatubyaye Abdul, Manzi Theiry, Ombalenga Fitina, Imanishimwe Emmanuel
• Abakina hagati
Ally Niyonzima, Mukunzi Yannick, Bizimana Dhihadi, Muhire Kevin
• Ba Rutahizamu
Meddie Kagele na Ernest Sugira
Amavubi ari ku mwanya wa nyuma mu itsinda n'inota rimwe, mu gihe Cape Verde ari iya gatatu n'amanota atatu, mu mikino itatu Amavubi amaze gukina yatsinzwe na Mozambique ibitego 2-0 ku itariki ya 14 Ugushyingo 2019, yatsinzwe kandi na Cameroon igitego 1-0 ku itariki ya 17 Ugushyingo 2019, umukino uheruka bakaba baranganyije na Cape Verde 0-0
