Ubusanzwe Ladies Empire yari inzu itunganya umuziki mu buryo bw'amajwi n'amashusho ikaba yarashinzwe n'umuraperikazi Uzamberumwana Pacifique wamamaye nka Oda Paccy.
Uyu muhanzikazi kuri uyu wa Gatatu yanditse ku rukuta rwe rwa Instagram ko "Muyoboke Alexis na Dusabe Eric uzwi nka Alto bagifitanye amasezerano na Ladies Empire."
Oda Paccy yabanje gushinga Empire Records mu 2019, nyuma y'umwaka umwe [ubwo ni mu 2020] yaje kubona abafatanyabikorwa mu buryo bw'ubushobozi bahita bamufasha kuyivugurura ndetse ihabwa izina rishya rya Ladies Empire Records.
Ku Kabiri tariki 10 Ugushyingo 2020, ikinyamakuru UKWEZI, cyatangaje inkuru ivuga ko 'Akasongoye ihwa !Ibitaravuzwe ku igurishwa rya Ladies Empire ya Oda Paccy', igaragaza ko umwuka utari mwiza muri iyi isigaye yitwa Classic Empire.
Muri iyi nkuru havugwamo ko Oda Paccy aherutse kugurisha Ladies Empire Records ndetse igahindurirwa izina ikitwa Classic Empire Records.
Abakozi n'abahanzi ba Ladies Empire nabo baragurishijwe ?
Ku wa 14 Kanama 2020, nibwo Oda Paccy yatangaje byeruye ko yagurishije Ladies Empire Records [iyi ni studio] abayiguze bahita bayihindurira izina yitwa Classic Empire Records.
Ibi ariko amakuru aturuka imbere avuga ko ibi byatangajwe na Oda Paccy byari ukuyobya uburari kuko iyi studio atayigurishije ahubwo ari uko yari yatsinzwe mu nkiko bityo agahitamo kubwira itangazamakuru ko yagurishije studio.
Iyi ntabwo ariyo nkuru ! Inkuru kugeza ubu ni uko abahanzi n'abakozi bagiranye amasezerano na Ladies Empire batigeze bamenyeshwa ibijyanye n'imikoranire bazagirana na Classic Empire ari isanzwe.
Iki kibazo nicyo gifitwe n'umuhanzikazi Eva umwe mu bari basanzwe babarizwa muri Ladies Empire ari nayo yagiranye nayo amasezerano muri Werurwe 2020.
Mu kiganiro yagiranye na UKWEZI, yavuze ko kugeza ubu atazi neza niba akiri umuhanzi wa Ladies Empire cyangwa Classic Empire.
Ntabwo twabashije kubona kopi y'amasezerano umuhanzikazi Eva yagiranye na Ladies Empire ariko yaduhishuriye ko ahari ndetse n'umubyeyi we [Se] yayasinyeho cyane ko ariwe umushyigikira mu bikorwa bye bya muzika.
Yavuze ko 'Njyewe nagiranye nabo amasezerano muri Werurwe uyu mwaka, ariko kuva icyo gihe bagiye bansaba guhora kuri studio ku buryo twari tumaze gukora indirimbo zigera kuri eshanu, gusa ntan'imwe irajya hanze.'
Umuhanzikazi Eva utarashyira hanze indirimbo ye n'imwe ariko akaba ari umunyempano ndetse witabiriye amarushanwa ya I AM THE FUTURE akagera kure, yavuze ko ajya kujya muri Ladies Empire yari yijejwe gufashwa mu iterambere ry'impano ye ariko ntibyakorwa.
Yakomeje agira ati 'Ejo bundi hasohoka indirimbo 'feedback' nibwo bambwiye ngo ninyigaragaramo nibwo bizoroha kugira ngo izindi ndirimbo zanjye zisohoke mu buryo bworoshye abantu bahite bazimenya.'
Uyu muhanzikazi avuga ko nyuma yo gukora iyi ndirimbo ndetse na nyuma yagiye kuri studio asanga barimutse aho bakoreraga harafunze, agerageje guhamagara Oda Paccy ntiyamwitaba ndetse n'Umujyanama we, Nadia nawe ntiyitaba.
Gusa ngo nyuma y'igihe aba bose batitaba uyu muhanzikazi cyangwa ngo basubize ubutumwa bwe, yagiye kubona abona indirimbo 'feedback' irasohotse.
'Twamaze igihe twarayikoze muri studio nyuma baduhamagara tugiye kwifotoza baraduhamagara ngo tujye kwifotoza ariko nabwo ntitwamenye ibyabaye twashidutse indirimbo yasohotse.'
Yakomeje agira ati 'Indirimbo nayo imaze gusohoka ntabwo bigeze banshyira ku mbuga nkoranyambaza zabo ahubwo bafataga agace Oda Paccy aririmbamo akaba ariko bashyiraho. Niba bankeneye nk'umuririmbyi badashaka ko nzaza nk'umuhanzi mushya bari kujya banshyira ku mbuga zabo no kunyamamaza n'ibindi byose ariko ntabyo bakoze.'
Eva avuga ko uretse kuba aba barakomeje kwanga kumwitaba no gusubiza ubutumwa bwe, byageze aho umubyeyi we atangira kumubaza impamvu atakijya kuri studio ndetse n'indirimbo ze zidasohoka, umukobwa akabura icyo amusubiza.
Ati 'Urumva Papa wanjye niwe unshyigikira yarambazaga nkabura icyo musubiza, ariko ikintu cyambabaje ni uko nawe ubwe yabahamagaye bakanga kumwitaba.'
Ikinyamakuru UKWEZI cyamanye ko uyu muhanzikazi ateganya kwandika ibaruwa isezera muri Ladies Empire cyane ko ibyo yagombaga guhabwa nayo atigeze abibona. 
Soma inkuru bifitanye isano : Akasongoye ihwa !Ibitaravuzwe ku igurishwa rya Ladies Empire ya Oda Paccy
Reba hano indirimbo feedback, imwe rukumbi umuhanzikazi Eva agaragaramo
