Kuri uyu wa Gatatu , Joe Biden yagejeje ijambo kuri rubanda, avuga ko ari mu nzira zo gutsinda, mukeba we Trump yanditse kuri Twitter ko bari 'kugerageza kwiba amajwi'.
Bwana Biden yavuze ko bari babizi ko bishobora gufata igihe kumenya ibyavuye mu matora, ati: 'Ndi hano kubabwira ko twizeye ko turi mu nzira igana ku gutsinda aya matora'.
Yongeyeho ko 'birangira ari uko buri jwi rimaze kubarwa'.
Bwana Trump, yanditse kuri Twitter ko ahagaze neza, ati: 'ariko bari kugerageza kwiba amatora, ntituzabibemerera'.
Ubutumwa bwa Perezida Trump ariko bwahise bushyirwaho ikimenyetso n'urubuga rwa Twitter ko 'bushobora kuba buyobobya ku matora'.
Si Biden na Trump gusa bari kwiyamamariza kuyobora America, ahubwo aba nibo bari buvemo umwe uri butorerwe gutegeka Amerika kuko aribo bari imbere cyane mu matora, ariko hari n'abandi nubwo bari inyuma cyane mu majwi.
Madamu Jo Jorgensen umwalimu muri kaminuza ya Clemson University ahagarariye ishyaka 'Libertarian Party' naho Bwana Howie Hawkins ahagarariye ishyaka 'Green Party'.
Aba bombi ariko kugeza ubu bari inyuma cyane, kugeza ubu nta n'uragira ijwi rimwe (electoral vote) muri 270 aba akenewe ngo umuntu atsindire kuba perezida wa Amerika.
Gusa nko mu majwi asanzwe ya rubanda, Madamu Jo kugeza ubu amaze gutorwa n'abarenga miliyoni 1.3.
Perezida mushya wa Amerika uza gutorwa biteganyijwe ko azarahira tariki 20 z'ukwezi kwa mbere 2021.
Biden aramutse atsinze yaba ari we wa mbere mu myaka 28 ishize utsinze perezida uri ku butegetsi, kuva mu 1992 Bill Clinton yatsinda George H. W. Bush.
Source : https://impanuro.rw/2020/11/04/usa-biden-ati-ndagana-ku-ntsinzi-trump-ati-bari-kwiba-amajwi/
