Zari Hassan umuherwekazi w'umugande, yifatiye ku gahanga umuvandimwe wa Diamond(ariko badahuje ababyeyi bombi), Ricardo Momo amubuza gukoresha izina rye mu gushaka kumenyekana.
Ibi yabitangaje nyuma y'uko uyu mugabo agiye mu itangazamakuru agatangaza uburyo Diamond na Zari bahuye ndetse ko Zari ari we waje asa n'uwiteretera Diamond Platnumz.
Ibi byabaje Zari Hassan maze mu nyandiko yumvikanamo akababaro yiyama uyu muhungu amubuza gukoresha izina rye mu byo yise umwanda ari nabwo yahishuye uko yahuye n'uyu muhanzi.
Ati'Ricardo ikindi gihe ujye uvuga ibyo ufitiye gihamya atari ugushaka abakunda bakanavuga ku byo wanditse gusa(comments & Likes). Ntukangize izina ryanjye kubera likes gusa. Namwandikiye kuko namushakaga mu kirori cya White Party, naringiye kumwishyura kuko nari mfite amafaranga na mbere y'uko duhura. Yambwiye kuvugana na manager we ariko icyo gihe yari yarafashwe ntibyakunzwe.'
'Twongeye guhurira mu ndege ibyicaro byacu byegeranye turavugana nk'uko wavugana n'undi muntu, duhana nimero sinongeye kumubona nyuma y'urugendo, yakomeje kujya anyandikira kugeza duhuye. Niba ari ugucinya inkoro ku mukoresha wawe, gerageza kumpa icyubahiro nk'uko nagihaye umuryango wose.'
Muri 2014 ni bwo Zari Hassan na Diamond bakundanye ndetse baza kubana nk'umugore n'umugabo, batandukanye muri 2018 nyuma yo kubyarana abana 2, umuhungu n'umukobwa.
