Nyuma yo gutsindwa na Marines FC 3-0 mu mukino w'umunsi wa 2 wa shampiyona, Kiyovu Sports ivuga ko byatewe n'umunaniro ukabije bitewe n'uko shampiyona imikino yegeranye.
Ku munsi w'ejo Kiyovu Sports yari yakiriye Marines FC mu mukino w'umunsi wa kabiri wa shampiyona umwaka w'imikino 2020-2021, hari nyuma y'uko ku wa Gatanu w'icyumweru gishize tariki ya 4 Ukuboza 2020 bari batsinze Mukura VS 3-1 mu mukino ufungura shampiyona.
Mu mukino w'umunsi wa kabiri, Kiyovu Sports ikaba yaraye itunguwe na Marines ikayitsindira i Nyamirambo 3-0.
Nyuma y'uyu mukino umutoza wungirije wa Kiyovu Sports, Kalisa Francois akaba yavuze ko byatewe n'umunaniro w'imikino yegeranye.
Ati'ntabwo ari ikibazo cya fitness ngira ngo imikino igiye yegeranye rero habamo kunanirwa, biri mu byatumye dutakaza. Nta mpungenge abafana bakwiye kugira cyane ko bataza no ku kibuga, bizakosoka vuba babone ibyishimo'
N'ubwo uyu mutoza avuga ibi, siko benshi babibona kuko nibwo shampiyona igitangira hamaze gukinwa imikino ibiri gusa, ntibumva aho uwo munaniro uturuka.
Bamwe mu barebye uyu mukino, batunguwe n'ingano ya bamwe mu bakinnyi ba Kiyovu Sports bigaragara ko biyongereyeho ibiro byinshi nka kapiteni w'iyi kipe, umunyezamu Kimenyi Yves, umukinnyi wo hagati Ngendahimana Eric na rutahizamu Babuwa Samson.
Uku kubyibuha kw'aba bakinnyi bikaba ari bimwe mubarebye umukino bemeza ko byaba batumye ikipe ititwara neza bitewe n'uko bitwaraga mu kibuga n'uko bari basanzwe bitwara.
