Buri wese washakaga kwitabira iki gikorwa, yasabwa gukorera igikorwa cy'urukundo abandi, hanyuma akabisakaza yifashishije imbuga nkoranyambaga nka Facebook, Twitter na Instagram agakora 'Tags' kuri Nyampinga Foundation akanakoresha Hashtag ya #Kindness #Nyampingafoundation. Kuri uyu wa kabiri tariki 29 Ukuboza 2020, Nyampinga Foundation yatangaje abantu babiri batsinze muri iki gikorwa cyiswe #ChallengeUbumuntu. Abatsinze ni Murungi Sabin washinze Isimbi Tv ikorera kuri Youtube na Irene Murindahabi Umunyamakuru wa Isibo Tv.
Byari biteganyijwe hahembwa umuntu umwe. Mutesi Jolly uharagarariye Nyampinga Foundation mu Rwanda, yabwiye INYARWANDA, ko ubu bukangurambaga bwari bugamije kugangurira abantu kugira ubumuntu mu buzima bwabo bwa buri munsi ari nayo mpamvu bahisemo abantu babiri basanzwe bakora ibikorwa by'indashyikirwa mu bihe bitandukanye.
Yavuze ko Sabin yakoze ibiganiro bitandukanye yisunze umurongo we, abasha gukorera ubuvugizi abantu batandukanye kandi bugira akamaro, benshi ubuzima burahinduka. Yatanze urugero avuga nk'abana we na Aline Gahongayire bavuje n'abandi.
Jolly yavuze ko Irene yakoze ibikorwa byinshi birimo nk'itsinda ry'abakobwa bakiri bakiri bato Vestine na Dorcas yazanye mu muziki, Niyo Bosco ufite ubumuga bwo kutabona yazanye mu muziki, umwana ukiri muto Karyuri uzi kubyina, umugore yahaye igishoro wari umaze imyaka irenga 20 mu buraya n'ibindi.
Miss Jolly ati 'Urumva rero ntabwo twari dukwiriye kuba twabacaho ngo tujye ku bandi bapiganirwaga amafaranga kandi hari abandi basanzwe babikora. Ubukangurambaga bwari bugamije kubwira abantu kugira ubumuntu n'ubuntu.'
Jolly yavuze ko bahisemo guhemba Irene na Sabin kuko bari mu gisata kimwe kandi bakaba bifashisha imbuga zabo mu gukangurira benshi kugira ubumuntu.
Mutesi Jolly yavuze ko ku nshuro ya mbere bakoze iki gikorwa babonye ko kitabiriwe, kandi ko bashaka ku kigira igikorwa ngaruka mwaka.
'Nyampinga Foundation' ibarizwamo Nishimwe Naomie, Miss Rwanda 2020, Mutesi Jolly, Miss Rwanda 2016, Kundwa Doriane, Miss Rwanda 2015, Bwana Larry Muganwa, Akiwacu Colombe, Miss Rwanda 2014, Aurore Kayibanda, Miss Rwanda 2012 na Grace Bahati 2009.
Ku wa 02 Mutarama 2021 ni bwo hazaba umuhango wo gushyikiriza abatsinze ibihembo byabo. Ari nabwo hazatangazwa birambuye ibijyanye na Nyampinga Foundation.
Abantu babiri batsindiye amadorali 1000$ mu bukangurambaga bw'Ihuriro rya ba Nyampinga b'u Rwanda bugamije gukangurira abantu kugira ubumuntu n'ubuntu
Murungi Sabin wa Isimbi Tv yatsindiye amadorali 500$ ku bw'ibikorwa by'ubumuntu yakoreye benshi
