Nyuma y'uko Minisiteri ya Siporo ihagaritse shampiyona y'umupira w'amaguru mu Rwanda umwaka w'imikino 2020-2021 kubera ko amakipe yadohotse ku kwirinda icyorezo cya Coronavirus, Amavubi afite irushanwa rya CHAN na AS Kigali yemerewe kuguma mu mwiherero igakora imyitozo ndetse ikitabira n'amarushanwa mpuzamahanga.
Ku wa Gatanu tariki ya 11 nibwo Minisiteri ya Siporo yasohoye itangazo rihagarika shampiyona y'umupira w'amaguru n'imyitozo ndetse itegeka FERWAFA gupimisha amakipe mbere y'uko abakinnyi bataha bajya mu ngo zabo bavuye aho babaga.
MINISPORTS yavugaga ko amakipe atubahirije amabwiriza nk'uko FERWAFA na MINISPORTS zayatanze bigatuma habamo ubwiyongere bukabije bw'ubwandu bwa Coronavirus ku makipe.
Mu Inama y'Abaminisitiri yaraye ibaye muri Village Urugwiro iyobowe na Perezida Kagame, bemeje uyu mwanzuro wa MINISPORTS ko shampiyona y'umupira w'amaguru ihagarara n'imyitozo ariko amakipe ahagariye u Rwanda mu marushanwa mpuzamahanga yo akaba yemerewe kwitabira no kwitoza yitegura imikino.
AS Kigali akaba ari yo kipe isigayemo mu mikino Nyafurika aho izahura na KCCA yo muri Uganda muri uku kwezi muri CAF Confederations Cup, ikaba yemerewe gukomeza umwiherero yitegura iyi mikino.
Amavubi nayo afite irushanwa rya CHAN muri Mutarama 2021, umutoza yemerewe kuba yahagamagara ikipe yitegura iri rushanwa cyane ko nta n'igihindutse bazatangira imyiteguro mu mpera z'uku kwezi.
Hari kandi n'ikipe y'Igihugu y'Ingimbi, Amavubi U-17, iri mu irushanwa ryahuje amakipe atandatu yo mu bihugu bya Afurika y'Iburasirazuba no Hagati (CECAFA) i Rubavu, rigamije gushaka amakipe azabona itike yo gukina Igikombe cya Afurika cy'Abatarengeje imyaka 17 kizabera muri Maroc mu Werurwe 2021.
