FC Barcelona, imwe mu makipe abiri y'umupira w'amaguru akomeye cyane muri Esipanye, ikomeje gusuzugurwa mu buryo budasanzwe, mu gihe byari byitezwe ko izitwara neza nyuma yo gukora amavugurura mbere y'uko umwaka w'imikino utangira.
Iyi kipe itaravaga mu myanya ine ya mbere ku rutonde rw'agateganyo cyangwa ikahava bigoranye, kuri ubu iri ku mwanya wa 7 n'amanota 14 kuri 30, inyuma y'amakipe nka Atletico Madrid iri ku wa 1, Real Sociedad iri ku wa 2, Real Madrid iri ku wa 3 na Villarreal iri ku wa 4.
FC Barcelona yatangiye urugendo nabi ubwo tariki ya 4 Ukwakira 2020 yanganyaga igitego 1-1 na FC Sevilla yari isanzwe ikuraho insinzi kandi iyinyagira ibitego byinshi. Ku mukino wakurikiyeho wabaye tariki ya 17 Ukwakira 2020, FC Barcelona yongeye gutsindwa na Getafe igitego 1-0.
Urugendo rwakomeje kuba rubi kuri iyi kipe y'ubukombe, ubwo tariki ya 24 Ukwakira 2020 iri ku kibuga cyayo (Camp Nou) na none yatsindwaga na Real Madrid ibitego 3-1.
Hashize icyumweru kimwe, tariki ya 31 Ukwakira 2020, FC Barcelona yanganyije na Deportivo Alavez igitego 1-1, na none itsindwa na Atletico Madrid igitego 1-0 tariki ya 21 Ugushyingo 2020.
Kuri uyu wa 5 Ukuboza 2020, FC Barcelona yari ifite abakinnyi bayo bose bakomeye nka Captain Lionel Messi, Antoine Griezmann, Philip Coutinho, Sergio Busquets, Jordi Alba n'umuzamu Ter Stegen yongeye gutsindwa na Cadiz ibitego 2-1.
Muri uyu mukino wahuje FC Barcelona na Cadiz, Lionel Messi usanzwe yitegwaho gukora ibitangaza, yakinnye iminota yose ariko birananirana
Bitewe no kwitwara nabi muri shampiyona y'icyiciro cya mbere muri Esipanye (La Liga), UEFA Champions League no mu irushanwa ry'igihugu rya Copa del Rey, FC Barcelona ntako itagize ikora impinduka zikomeye zatuma yongera kwisubiza igitinyiro, ariko kugeza magingo aya iracyafatwa n'andi makipe nk'intsina ngufi.
Mu mpinduka zose FC Barcelona yakoze, bigaragara ko n'ubundi nta cyizere gikomeye cy'uko hari ibitangaza abakunzi bayo bayitegaho. Gusa igisubizo gishobora kuzava kuri Perezida wayo mushya uzatorwa, witezweho kuzagura abakinnyi bakomeye no kugarura abarimo Neymar Jr ukinira Paris Saint Germain mu Bufaransa.
- FC Barcelona yakubiswe inshuro na Cadiz itsindwa ibitego 2-1
Source : https://impanuro.rw/2020/12/06/fc-barcelona-ikomeje-gusuzugurwa-nkinsina-ngufi/
