Nyuma yo gitsindwa na APR FC mu mukino w'umunsi wa 3 wa shampiyona, umutoza Karekezi Olivier wa Kiyovu Sports yavuze ko atari bibi bitewe n'imyiteguro iyi kipe yagize cyane ko ivuye mu mikino nyafurika.
Ni umukino wabaye ku munsi w'ejo hashize maze APR FC iyitsinda igitego 1 nacyo myugariro w'iyi kipe, Serumogo Ally yitsinze.
Nyuma y'umukino Karekezi yavuze ko atari bibi cyane gutsindwa igitego 1 na APR FC ivuye muri Champions League.
Ati'mu mupira birashoboka, ngira ngo hari amakosa ugenda ubona ugenda ukosora, nibaza ko ikipe ya APR FC ivuye muri Champions League kuba yagutsinda igitego kimwe ku busa ntabwo ari igitangaza kuko yanatangiye imyiteguro mbere yacu.'
Uyu mutoza kandi yashimiye ikipe ye uko yitwaye kuri uyu mukino aho ahamya ko mu minsi iri imbere bazaba bameze neza kurushaho.
Shampiyona y'u Rwanda umwaka w'imikino 2020-2021 yari igeze ku munsi wa 3 ariko Minisiteri ya Siporo ikaba yafashe umwanzuro wo kuyihagarika kugeza igihe kitazwi bitewe n'uko ubwandu bwa Coronavirus bukomeje kwiyongera mu makipe.
