Umutoza wa APR FC, Mohammed Adil Erradi avuga ko iyi kipe nta munyezamu ifite ubanzamo bityo ko niba Ahishakiye Heritier yaritwaye neza agomba gukomereza aho akagumana umwanya we.
Umunyezamu Rwabugiri Umar wari usanzwe abanza mu izamu ry'iyi kipe, yagiye ashidikanywaho ku bushobozi bwe kugeza aho iyi kipe ivuyemo mu mikino nyafurika ya Champions League basezerewe na Gor Mahia, akagenda ashinjwa amakosa amwe namwe yatumye basezererwa nk'igitego bamutsindiye i Kigali n'andi makosa yakoreye muri Kenya.
Nyuma yo gusezererwa, APR FC umukino wa mbere yakinnye ni uwo yakinnye na Kiyovu Sports muri shampiyona ku wa Gatanu w'icyumweru gishize, nk'ikimenyetso cy'uko atishimiye imyitwarire ye, umutoza Adil mu izamu yabanjemo Ahishakiye Heritier, Rwabugiri ajya ku ntebe.
Uyu munyezamu ukiri muto, akaba yaritwaye neza kuri uyu mukino ndetse agenda akuramo imipira yakabaye yaravuyemo ibitego.
Adil yatangaje ko uyu musore akwiye gukomeza kwitwara neza kugira ngo agumane umwanya ubanzamo kuko nta munyezamu wa mbere iyi kipe ifite.
Ati"Imyitwarire ye irashingira ku cyizere yahawe n'umuryango mugari wa APR FC, nk'uko mwabibonye uyu munsi nta mukinnyi ubanzamo muri APR buri mukino ufite abantu bawo, uyu munsi mwabonye ko Herithier yagize umukino mwiza agomba gukomeza gutya. Nta munyezamu ubanzamo dufite, (Heritier) agomba gukomereza aho ibyiza yakoze.'
Ahishakiye Heritier yinjiye muri APR FC nkuru mu mwaka ushize wa 2019 avuye muri Marines. Akaba yarakuriye mu ishuri ryigisha umupira rya APR FC nyuma ajyanwa mu Intare FC.
