Umunsi wa kabiri wa shampiyona y'u Rwanda umwaka w'imikino 2020-2021 ugomba gutangira ku munsi w'ejo ku wa Mbere tariki ya 7 Ukuboza, FERWAFA ikaba yamaze gufata umwanzuro w'uko umukino Rayon Sports yagombaga kwakiramo Bugesera FC n'uwo Police FC yagombaga kwakiramo Rutsiro isubikwa kubera COVID-19.
Amakuru ISIMBI yamenye yahamirijwe n'abakinnyi b'aya makipe ni uko iyi mikino yari kuzaba ku munsi w'ejo itakibaye bitewe n'ikibazo cya COVID-19 kivugwa muri Rayon Sports aho abakinnyi bayo bari mu kato, kimwe na Rutsiro abakinnyi bayo bari mu kato nyuma yo guhura na ba Rayon Sports ku munsi wa mbere wa shampiyona ubwo banganyaga 1-1.
Kuba Rayon Sports na Rutsiro FC zarashyizwe mu kato, byatumye imikino zari gukina isubikwa. Rutsiro FC yagombaga guhura na Police FC mu mukino wari kubera i Nyamirambo.
Ku wa Gatanu nyuma y'umukino Rayon Sports yanganyijemo na Rutsiro 1-1, nibwo byamenyekanye ko abakinnyi bane ba rayon Sports banduye iki cyorezo, ni mu gihe hari andi makuru avuga ko hari abandi 9 nabo bikekwa ko banduye.
Indi mikino 2 igomba kuba ibirarane, ni uwo AS Kigali yagombaga kwakirwamo na Gasogi United ku munsi w'ejo ku wa Mbere n'uwo APR FC yagombaga kwakirwamo na Gorilla ku wa Kabiri, yasubitswe bitewe n'imikino nyafurika aya makipe(APR FC na AS Kigali) yakinaga.
Uko amakipe azahura ku munsi wa kabiri wa Shampiyona:
Ku wa Mbere tariki ya 7 Ukuboza 2020}
Police FC vs Rutsiro FC (Wasubitswe)
Musanze FC vs AS Muhanga (Stade Ubworoherane, 15:00)
Mukura VS vs Sunrise FC (Stade Huye, 15:00)
Rayon Sports vs Bugesera FC (Wasubitswe)
Etincelles FC vs Espoir FC (Stade Umuganda, 15:00)
Gasogi United vs AS Kigali (Warasubitswe)
Ku wa Kabiri tariki ya 8 Ukuboza 2020:
Kiyovu SC vs Marines FC (Stade de Kigali; 15:00)
Gorilla FC vs APR FC (Warasubitswe)
