Ku gicamunsi cyo kuri uyu wa Mbere tariki 14 Ukuboza 2020, nibwo habaye iyi nama yabereye mu Biro by'Umukuru w'Igihugu, Village Urugwiro.
Ku rukuta rwa Twitter rwa Village Urugwiro hatangarijwe ko iyi nama yabaye ariko ntihavugwa ibiri ku murongo w'ibyigwa n'ubwo bizwi ko imiterere ya COVID19 iri mu bihangayikishije igihugu.
Mu bindi byitezwe kuganirwaho muri iyi nama ni Inama y'Igihugu y'Umushyikirano yagombaga guterana ku wa 16 Ukuboza, ariko ikaba yasubitswe ku mpamvu z'ubwiyongere bukabije bw'ubwandu bushya bwa Coronavirus.
Mu kiganiro cyatambutse kuri Televiziyo Rwanda ku wa 13 Ukuboza 2020 kigaruka ku ngamba zo gukumira ikwirakwira ry'iki cyorezo, Minisitiri w'Ubuzima, Dr Ngamije Daniel, yatangaje ko mu byumweru bibiri bishize, hagaragaye ubwandu ku kigero giteye inkeke.
yavuze ko nk'umubare w'ubwandu ku wa Gatandatu wageze ku bantu 100, ku Cyumweru nabwo ukaba 131, umubare waherukaga muri Kanama ndetse impfu zikiyongera aho abantu batanu bapfuye mu cyumweru kimwe.
Dr Ngamije yavuze ko abantu barenze ku mabwiriza, bajya mu busabane, guhana intera biribagirana aho nka restaurant zahindutse utubari ku buryo abantu bicara badahanye intera n'ibindi.
Ati 'Badohoka ku mabwiriza, nko muri restaurant ugasanga zahindutse utubari, no muri hoteli ugasanga bicaye badahanye intera, kandi bakahamara amasaha menshi.'
Umuvugizi wa Polisi, CP John Bosco Kabera, we yavuze ko mu mezi icyenda ashize iki cyorezo kigeze mu Rwanda, nta gihe na kimwe cyigeze kibaho ngo usange abantu barenze ku mabwiriza yo kwirinda Covid-19 nk'uko bimeze muri iki gihe.
Kuva muri Werurwe ubwo umuntu wa mbere yasanganwaga Coronavirus mu Rwanda, abantu 6659 bamaze kwandura mu gihe 56 bo bapfuye.
