Nyuma yo kutabona umwanya uhagije wo gukina kuva haza umutoza Sven, rutahizamu w'umunyarwanda Meddie Kagere ukinira Simba SC yo muri Tanzania, ntiyiteguye kuba yakongera amasezerano muri iyi kipe.
Mu minsi ishize nibwo twabagejejeho inkuru y'uko uyu rutahizamu umaze imyaka ibiri yikurikiranya ari we rutahizamu uhiga abandi muri shampiyona ya Tanzania, ashobora kongera umwaka umwe w'amasezerano akinira iyi kipe yo mu gace ka Msimbazi.
Amakuru aturuka mu gihugu cya Tanzania nk'uko ibinyamakuru byaho bibitangaza, uyu rutahizamu yamaze kubabwira ko mu gihe iyi kipe igitozwa n'umubiligi Sven byagorana ko yabongerera umwaka w'amasezerano bifuza.
Meddie Kagere uri ku mwaka wa nyuma w'amasezerano ye muri Simba SC, yabwiye ubuyobozi bwa Simba SC ko atari umukinnyi wo kwicara kandi uretse kuba akinira Simba SC ari umukinnyi w'ikipe y'igihugu agomba kubona umwanya wo gukina kugira ngo afashe igihugu cye ndetse ko bishobotse bamurekura mu isoko rito ryo gusinyisha abakinnyi rizafungura muri uku kwezi.
Umuntu wahaye amakuru ikinyamakuru Global Publishers dukesha iyi nkuru yagize ati'abakinnyi ubwabo nibo bisabiye ko babarekura, muri abo bakinnyi harimo rutahizamu Meddie Kagere, niba mubyibuka neza kuva uyu mwaka w'imikino watangira umutoza yamushyize ku ntebe akajya akinisha Bocco gusa.'
Simba SC nayo amakuru avuga ko ititeguye kurekura uyu musore kuko bakeka ko yahita ajya muri mukeba Yanga, bityo bakaba bagomba kureka umwaka we ukarangira yakwanga kongera amasezerano akaba ari bwo agenda, gusa bakaba bari mu ihurizo ryo gushaka umusimbura we.
Si Kagere gusa wifuza gutandukana n'iyi kipe kuko abandi bakinnyi nka Miraji Athumani 'Sheva', Charles Ilanfya na Gadiel Michael nabo bashaka gutandukana na Simba SC kuko nta mwanya wo gukina babona.
Source : http://isimbi.rw/siporo/article/simba-sc-mu-ihurizo-kagere-meddie-ntakozwa-ibyo-kongera-amasezerano
