Umutoza wa APR FC, Mohammed Adil Erradi yashimiye ubuyobozi bwa APR FC kubera ukuntu babashije kwihanganira ibyabereye muri Kenya ndetse bakabasha no kubihanganisha, aho yashimangiye ko gukorana nabo ari iby'agaciro.
Uyu mutoza yatangaje ibi nyuma y'uko yari yizeje abakunzi n'ubuyobozi bw'iyi kipe kuzagera mu matsinda y'imikino nyafurika ya CAF Champions League cyangwa Confederations Cup.
Ntibyaje kubakundira kuko baviriyemo mu ijonjora ry'ibanze bakuwemo na Gor Mahia ku giteranyo cy'ibitego 4-3. Umukino ubanza wabereye mu Rwanda APR FC yatsinze 2-1, muri Kenya itsindwa 3-1.
Uyu mutoza akaba yashimiye abafana n'ubuyobozi bw'iyi kipe bwabashije kwihanganira ibyabereye muri Kenya bagakomeza gushyigikira ikipe yabo.
Ati"Ndabanza gushimira abakinnyi bakoze akazi neza(ku mukino wa Kiyovu Sports), umuryango mugari wa APR FC ndetse n'abayobozi bacu, ni abantu bahora inyuma yacu ni abantu batwihanganiye kandi badufashije nyuma y'ibyabaye muri Kenya, buri gihe ndabivuga ni iby'agaciro gukorana n'abayobozi bo kuri uru rwego.'
Ibi yabitangaje nyuma yo gutsinda Kiyovu Sports ku wa Gatanu 1-0. Yakomeje asaba abanyarwanda muri rusange gushyigikira abakinnyi b'abanyarwanda ntibumve ko hari igikuba cyacitse ngo babace intege kuko nibakomeza gushyigikirwa bazagera kure.
Source : http://isimbi.rw/imyidagaduro/article/umutoza-wa-apr-fc-yashimiye-ubuyobozi-bw-iyi-kipe
