Kuri iki cyumweru tariki 03 Mutarama 2021, abantu 3 bahitanywe na COVID-19 bituma umubare w'abamaze kwicwa n'iki cyorezo mu Rwanda uba 101 mu gihe abanduye bo biyongereyeho 109 bose hamwe baba 8,676 mu bipimo 3,318 byafashwe.
Amakuru yatangajwe na Minisiteri y'Ubuzima agaragaza ko abitabye Imana barimo abagabo 2 barimo uw'imyaka 75 na 67 bo mu mujyi wa Kigali n'umwe w'imyaka 51 wo mu karere ka Huye.
Abarwayi bashya babonetse I Kigali: 64, Musanze: 20, Rubavu: 12, Nyamasheke: 4, Gicumbi: 3, Kamonyi: 3, Huye: 2, Burera: 1.
Uyu munsi hakize abantu 67 mu masaha 24 ashize bituma umubare w'abamaze gukira bose uba 6,752 naho abakirwaye ni 1,823.
Ibimenyetso bya Coronavirus birimo inkorora, ibicurane, guhumeka bigoranye n'umuriro. Yandura binyuze mu matembabuzi aturuka mu myanya y'ubuhumekero.
Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n'amazi n'isabune, kwirinda imihuro itari ngombwa no kwambara udupfukamunwa n'amazuru mu gihe umuntu avuye mu rugo cyangwa ahuye n'abantu benshi.
Ubuyobozi muri Mexique bwatangaje ko umugore w'imyaka 32 wari umuganga yajyanywe mu bitaro nyuma yo guterwa urukingo rwa Coronavirus rwakozwe na Pfizer ifatanyije na BioNTech.
Uyu muganga utatangajwe izina, yajyanywe mu cyumba cy'indembe mu bitaro byo mu ntara ya Nuevo Leon iherereye mu Majyaruguru ya Mexique.
Reuters yatangaje ko uwo muganga yagaragazaga ibimenyetso birimo guhumeka nabi, gufuruta n'ibindi.
Minisiteri y'ubuzima yatangaje ko mu isuzuma bamukoreye basanze yagize ikibazo cyo kwangirika mu bwonko bizwi nka encephalomyelitis.
Nta wundi mu batewe urukingo wigeze agaragaza ibimenyetso nk'iby'uwo muganga.
Muri Mexique abantu 126 500 bamaze guhitanwa na Coronavirus. Guhera tariki 24 Ukuboza hatangiye gutangwa inkingo ku bakora mu rwego rw'ubuzima.
