Ikipe ya AS Kigali ihagarariye u Rwanda mu irushanwa rihuza amakipe yatwaye ibikombe by'Ibihugu iwayo 'CAF Confederation Cup' yamenye ikipe bizahura mu ijoronjora rya Gatatu ry'iri rushanwa.
Mu ijoronjora rya mbere ry'iyi iri rushanwa AS Kigali yari yasezereye Orapa United yo muri Botswana ku giteranyo cy'ibitego (2-2), ariko AS Kigali irokorwa n'igitego yatsindiye hanze.
Umukino ubanza wari babereye muri Botswana warangiye Orapa united itsinze AS Kigali ibitego 2-1, mu gihe mu mukino wo kwishyura AS Kigali yatsinze Orapa United igitego 1-0, bituma igiteranyo cy'ibitego mu mikino yombi biba 2-2, ariko igitego cyo hanze AS Kigali yari yatsindiye muri Botswana kiyifasha gusezerera Orapa United.
Mu ijonjora rya Kabiri ry'iri rushanwa, AS Kigali yahuye na KCCA yo muri Uganda, Nabwo ikomeza kubera igitego yatsindiye muri Uganda.
Umukino ubanza wari kubera i Kigali, ariko waje gusubikwa kubera ko KCCA itari yujuje umubare w'abakinnyi kubera bamwe muri bo bari banduye icyorezo cya Coronavirus.
Komiseri w'umukino yahise afata umwanzuro w'uko AS Kigali itera mpaga KCCA y'ibitego 2-0 nk'uko itegeko rya CAF ribivuga kubijyanye n'ibi bihe bya COVID-19.
Umukino wo kwishyura wabaye kuwa Gatatu tariki 6 Mutarama warangiye KCCA itsinze AS Kigali ibitego 3-1, ariko igitego AS Kigali yatsindiye hanze gituma yisanaga mu kindi Cyiciro kibanziriza amatsinda.
Mu ijonjora rya gatatu rya CAF Confederation Cup, AS Kigali izakina na Club Sportif SFaxien yo mu gihugu cya Tunisia, nk'uko byavuye mu bisubizo bya Tombola yabereye ku Cyicaro gikuru cya CAF, giherereye I Cairo mu Misiri.
CS Faxien yashinzwe mu mwaka w'1928, Ni imwe mu makipe akomeye muri Africa kuko izwiho guhangana cyane n'amakipe yo mu bihugu bya,' Misiri, Algeria na Marooc, bafite ijambo rikomeye ku mupira w'Africa.
Iyi kipe itozwa na Anis Bouljebene, Yakirira kuri stade ya 'Taieb Mhiri' ifite imyanya ibihumbi 11 (11.000), ahabitse ibikombe Umunani bya Shampiyona ya Tunisia ndetse na bitanu by'igikombe cy'igihugu.
Mu mikino Nyafurika, CS Faxien ibitse igiteranyo cy'ibikombe 4, birimo 3 bya CAF Confederations Cup (2007, 2008 na 2013) ndetse n'igikombe kimwe cya 'CAF Cup' yatwaye muw'1998.
Hari kandi ibikombe bibiri bihuza amakipe yabaye aya mbere mu bihugu by'abarabu ndetse n'igikombe gihuza ama-Club yitwaye neza muri Africa y'amajyaruguru, yatwaye muri 2009.
Dore uko andi makipe azahura
Source : https://impanuro.rw/2021/01/08/breaking-news-as-kigali-yatomboye-ikipe-irusha-izindi-ibikombe/
