Minisiteri y'Uburezi yatangaje ko amashuri y'Incuke, abanza n'ayisumbuye yo mu Mujyi wa Kigali yaba aya Leta n'ayigenda abaye afunzwe kuva kuri uyu wa Mbere tariki 18 Mutarama 2021 kubera ingamba zo kwirinda icyorezo cya COVID-19.
Bikubiye mu itangazo ryasohowe na Minisiteri y'Uburezi ku gicamunzi cyo kuri iki Cyumweru tariki 17 Mutarama 2021.
Minisiteri y'Uburezi ishishikariza aya mashuri yo mu Mujyi wa Kigali gukomeza kwigisha yifashishije uburyo bw'ikoranabuhanga, yatangaje ko iki cyemezo gishingiye ku gukumira ikwirakwira ry'icyorezo cya COVID-19 by'umwihariko mu Mujyi wa Kigali.
Minisiteri y'Uburezi ivuga ko abiga bacumbikiwe muri aya mashuri mu Mujyi wa Kigali, bazaguma mu bigo bagakomeza guhabwa serivisi z'ingenzi.
Iki cyemezo ntikireba amashuri yo mu Ntara kuko yo azakomeza kwiga uko bisanzwe ariko anakomeza kubahiriza amabwiriza yo kwirinda ikwirakwira ry'iki cyorezo.
Minisiteri y'Uburezi itangaza ko izi ngamba zizavugururwa nyuma y'ibyumweru bibiri habanje gukorwa isuzuma ry'uburyo icyorezo kizaba gihagaze.
Ibi bibaye mu gihe hari hategerejwe itangira ry'amashuri kubiga mu mashuri y'incuke n'abanza mu kiciro cyo hasi.
Source : https://impanuro.rw/2021/01/17/covid-19-amashuri-yose-yo-mu-mujyi-wa-kigali-yafunzwe/
