Kuri uyu wa Gatandatu tariki 02 Mutarama 2021, ikipe ya AS Kigali FC irahaguruka i Kigali yerekeza muri Uganda aho igiye gukina na KCCA mu mukino wo kwishyura w'imikino y'Afurika y'amakipe yitwaye neza iwayo 'Total CAF Confederation Cup 2020-2021', uzabera ku kibuga cya St. Mary's Stadium-Kitende tariki 06 Mutarama 2020.
Iyi kipe ya AS Kigali FC itozwa na Nshimiyimana Eric, iterwa inkunga n'Umujyi wa Kigali, ikaba iza guhagukurana abakinnyi bagera kuri 23, izifashisha kuri uyu mukino wa KCCA.
Mbere yo guhaguruka i Kigali, ikipe ya AS Kigali FC yakoze imyitozo ya nyuma itegura uyu mukino, yabereye kuri Sitade ya Kigali, ku wa Gatanu tariki 01 Mutarama 2021.
AS Kigali FC ikaba igiye gukina uyu mukino ifite impamba y'ibitego 2-0, nyuma yo gutera mpaga ikipe ya KCCA mu mukino ubanza wagombaga kubera i Kigali tariki 23 Ukuboza 2020, kubera ko itari ifite abakinnyi bakenewe kugira ngo umukino ubashe gukinwa aho abenshi bari barwaye COVID-19.
AS Kigali irimo gukina ku nshuro ya kabiri yikurikiranya imikino ya Total CAF Confederation Cup, ubwo yaherukaga kuyikina mu mwaka ushize yasezerewe mu ijonjora rya kabiri itsinzwe na Proline FC yo muri Uganda ku bitego 3-2 mu mikino ibiri.
Abakinnyi 23 AS Kigali ijyana muri Uganda gukina na KCCA.
Aba ni Ndayishimiye Eric 'Bakame', Bate Shamiru, Bayisenge Emery, Ntamuhanga Tumaine Tity, Karera Hassan, Nsabimana Eric, Kalisa Rachid, Hakizimana Muhadjiri, Abubakar Lawal, Shabani Hussein Tchabalala, Nkinzingabo Fiston, Benedata Janvier, Bshira Lafiff, Kwizera Pierrot, Biramahire Abeddy, Orotomal Alex, Rurangwa Mossi, Rugero Chris, Kayitaba Jean Bosco, Ndekwe Felix, Sudi Abdallah, Rugirayabo Hassan na Ishimwe Christian.
