Kiyovu Sports yamaze guhagarika amasezerano y'abakoze bayo bose barimo n'abakinnyi kugeza igihe kitazwi.
Uyu munsi nibwo ISIMBI yabagejeho inkuru y'uko Kiyovu Sports ishobora guhagarika amasezerano y'abakinnyi bayo bitewe no kuba batari mu kazi kandi amafaranga yo kubahhemba ntayo.
Umunyamabanga wa Kiyovu Sports yari yabwiye ISIMBI ko hari ibyo bari bataranoza ariko vuba itangazo ry'ibyemezo bafashe riri butangazwe.
Ibinyujije ku rukuta rwayo rwa Twitter, Kiyovu Sports, yavuze ko yamaze guhagarika amasezerano y'abakozi bayo kugeza igihe hazasohokera irindi tangazo.
Iti"Dushingiye ku cyemezo cya FERWAFA cyo gusubika amarushanwa ya shampiyona kuva kuwa 12 Ukuboza 2020, ubuyobozi bwa Kiyovu Sports bwafashe umwanzuro wo gusubika amasezerano y'abakozi kugeza igihe irindi tangazo risubukura amarushanwa rizazira."
Yakomeje ivuga ko izakoemza gushaka uko ifasha abakozi bayo muri ibi bihe bigoranye.
Iti"Ikipe izakomeza gushakisha uburyo bwo gufasha abakozi mu gihe bishoboka muri ibi bihe bigoye Isi yose. Turizera ko vuba ibikorwa bya siporo byongera kugaruka buri wese agasubira mu nshingano ze."
Kiyovu Sports ihagaritse amasezerano y'abakinnyi yaba ibaye ikipe ya kabiri iyahagaritse nyuma Bugesera FC.
