Ijonjora ryo gutiranya abakobwa bazahatanira ikamba rya Nyampinga w'u Rwanda 2021 ryagombaga gutangira mu mpera z'iki cyumweru ryasubitswe kubera ingamba nshya zo kwirinda icyorezo cya Coronavirus.
Tariki ya 9 Muturama 2021 nibwo hagombaga gutangira ijonjora rya Miss Rwanda 2021 rigatangirira i Burengerazuba mu karere ka Rubavu.
Ubuyobozi bwa Miss Rwanda bubinyujije ku mbuga nkoranyambaga zabo, bwatangaje ko iri jonjora ryabaye risubitswe bitewe n'ingamba nshya zo kwirinda icyorezo cya Coronavirus.
Inama y'Abaminisitiri yaraye iteranye, yemeje ingamba nshya zo kwirinda icyorezo cya Coronavirus harimo no guhagarika ingendo zo hagati y'uturere ndetse n'Umujyi wa Kigali.
Byari biteganyijwe ko iri jonjora rizatangirira mu karere ka Rubavu tariki 09 Mutarama 2021, tariki 16 Mutarama 2021 azakomereza mu Ntara y'Amajyaruguru mu Karere ka Musanze naho tariki 23 Mutarama 2021 berekeze mu Ntara y'Amajyepfo mu Karere ka Huye.
Tariki 30 Mutarama 2021 ijonjora rizabera mu Ntara y'Iburasirazuba mu Karere ka Kayonza naho tariki 06 Gashyantare 2021 hatorwe abo mu Mujyi wa Kigali.
Tariki 20 Gashyantare 2021 nibwo hazatorwa abakobwa 20 bazajya mu mwiherero uzabera i Nyamata kuva tariki 07 Werurwe kugera tariki 19 Werurwe 2021.
Tariki 20 Werurwe 2021 nibwo hazaba umuhango wo kwambika ikamba Nyampinga w'u Rwanda 2021 n'ibisonga bye. Ni ibirori bizabera ku Intare Conference Arena.
Source : http://isimbi.rw/imyidagaduro/article/miss-rwanda-yasubitswe
