Nk'uko hari amakuru anyuranye yavuzwe na benshi ku ndwara ya Covid-19 aho bamwe bavuga ko ari icyorezo Imana yaterereje Isi kubera ibyaha byinshi biriho ubu, abandi bakavuga ko ari virus y'inkorano yacuriwe mu Bushinwa nk'uko byakunzwe gutangazwa na Donald Trump Perezida wa Leta Zunze Ubumwe za Amerika, ni nako hari kuvugwa amakuru anyuranye ku rukingo rwa Covid-19 rwatangiye gutangwa, ariko ayo akaba ari amakuru abantu bivugira ku giti cyabo atari ayatangazwa n'inzego zishinzwe ubuzima.
Muri ayo makuru y'ibihuha (atemejwe n'inzego z'ubuzima), hari abavuga ko urukingo rw'iki cyorezo ari umugambi wa Anti-Kristo kugira ngo abatuye isi bose bazashyirweho ikimenyetso cya 666 banabashe kugenzurwa mu buryo bwoshye. Apotre Dr Paul Gitwaza umushumba wa Zion Temple ku Isi, yatangaje ko amaze kumva ibi bihuha byose biri kuvugwa, yafashe umwanya asoma ibitabo, aganira n'abantu b'inzobere, aranasenga cyane, aza kuhakura amakuru y'uko nta kantu na kamwe ka Anti-Kristo kari mu rukingo rwa Covid-19.
UMVA HANO ICYO APOTRE GITWAZA YAVUZE KU RUKINGO RWA COVID-19
Apotre Dr. Gitwaza uri kubarizwa muri Leta Zunze Ubumwe za Amerika, yatangaje ibi mu minsi mike ishize mu mpera za 2020, abinyuza ku mbuga nkoranyambaga akoresha. Ni inyigisho yahaye umutwe w'amagambo ugira uti "Ibyiringiro byacu biri muri Kristo, ntabwo ari mu rukingo". Yatangiye avuga ko kuri ubu hari kuba intambara hagati y'abantu babiri b'abaherwe ku Isi ari bo Jeff Bezos nyiri Amazon na Elon Musk umuherwe wa mbere ku Isi, bakaba barwanira gutegeka ikirere (Space), akaba ari intambara ya mudasobwa.Â
Gitwaza yavuze ibanga yamenewe n'umunyabwenge wo muri Israel ku byo Amerika na Israel bakorera mu isanzure hamwe n'ibivejuru
Apotre Gitwaza yavuze ko muri iki gihe Isi igezemo Abanyamerika batakiri ku rwego rwo kurwana intambara zo ku Isi, ahubwo barangamiye gufata ikirere aho bashaka gutangiza ingendo zijyayo buri munsi. Avuga ko aho Amerika itandukanye n'ibindi bihugu, inshuro nyinshi ntabwo ari Leta ikora imishinga nk'iyi ikomeye ahubwo isaba abacuruzi bayo kuba ari bo batangiza igikorwa hanyuma Leta ikabashyigikira.
Yavuze ko umwe mu mishinga Perezida Trumo asize harimo uwo gukingura inzira z'ikirere, bakajya guturayo no kuruhukirayo. Ati "Barimo barahiga ibirere bisa nk'aho ari bizima kugira ngo abantu bajye kwiturirayo ngo isi irimo akavuyo. Ni abana b'abantu". Apotre Gitwaza yatangaje ko hari umunyabwenge wo muri Israel uherutse kumena ibanga ry'ibibera mu isanzure, wavuze ko hashize imyaka myinshi Amerika na Israel bikorera ingendo mu isanzure bagahurirayo n'Ibivejuru bafitanye imikoranire n'ubucuti bukomeye.
Ati "Ejobundi hari umu Porofeseri muri Israel yari amaze imyaka akora mu mabanga y'ibyogajuru bakorana n'abanyamerika. Ni umu Porofeseri ukomeye muri Physics, afite imyaka 70. Ejobundi yaravuze ati 'ngiye kubabwira amabanga, simfite isoni zo kuyavuga kuko mfite ibihembo byinshi nahawe, ntacyo ntakaza nimbivuga, kandi sinkiri umwana ushakisha Diplome no kumenyekana'. Gitwaza ati "Yavuze ibintu bikomeye".
Yakomeje ati "Ngira ngo mwarabisomye hirya no hino, byari bimaze iminsi byaravuzwe na kaminuza Magri yo muri Canada, nibo babivuzeho, bavuga ibi bintu; 'Yaravuze ngo iyo tugiye mu kirere, tuhasanga abandi bantu tukaganira nabo, babita aba Aliyene (Aliens), ni ibinyamahanga biri mu kirere, turaganira batubwira ibintu byinshi. Hashize imyaka Israel na Amerika dukorana n'abo bantu".Â
Apotre Gitwaza yavuze ibanga yamenewe n'uwakoranye n'ibivejuru
Gitwaza yavuze ko babajije uwo munyabwenge impamvu ubu ari bwo abitangaje, abasubiza ko basabwe kubigira ibanga, none kuribika we biramunaniye. Ati 'Twaramubajije tuti Professor kuki ubivuze ubu? Aravuga ngo ni uko bari baratubujije kuvuga ayo mabanga, baravuze ngo ntimuzabibwire ab'isi ko dukorana namwe. Ni abandi bantu ngo baba mu kindi kirere kuko nimubivuga abantu bazagira ngo muri abasazi, ikindi ntutubyemeye, mubigire ibanga'". Gitwaza ati "Uwo mu Professor byaramunaniye, aravuga ngo bantuka batantuka ndabivuga, napfa ntapfa ndabivuga".Â
Apotre Dr. Gitwaza yakomeje ati "Rero abantu benshi babivuzeho cyane ariko si igitangaza, its normal, ni abadayimoni, bambara imibiri y'abantu bakavugana n'abantu. Abenshi ni bo barimo batanga amakuru y'ikoranabuhanga, nibo babwira abantu ibigomba gukorwa. Ntumbwire ngo ama Bombe yo kwica abantu no gusenya ibintu yazanywe n'Imana, ni abo bantu, abo ba Aliens. Bibiliya yabavuze kuva kera, si igitangaza, mu ijuru ryo mu mwuka niho batuye".
Gitwaza yavuze ko ibi abakozi b'Imana babimenyereye kuko bizwi ko abadayimoni bambara ishusho y'abantu bakavugana n'abantu. Yavuze ko nta kindi kirere Yesu yacunguye uretse Isi, bityo abo bandi baba mu kirere (Aliens) akaba ari abadayimoni, ati "Twe twenyine gusa, ni twe twacunguwe. Ibindi birere ntibyacunguwe, niyo mpamvu hatariyo abantu. Abariyo ntibacunguwe kandi ntibazacungurwa. Amen".Â
"Urumva abantu bataye umutwe barandika babaza bati ibi ni ibiki? Si igitangaza abadayimoni bambara imibiri y'abantu, bakabyarana n'abantu, igihe cya Nowa niko byari bimeze. Yavuze ko ibi yari amaze kubabwira byari ibibafasha kwinjira neza mu nyigisho yabateguriye, ikaba ivuga ku bivugwa kuri Covid-19 ndetse n'urukingo rwayo. Ati "Byari ukugira ngo dusubire muri 'Mood' noneho mbone kwigisha".
Apotre Dr Gitwaza yavuze byinshi kuri Coronavirus n'urukingo rwayo
Ati "Iyi si turimo nimutamenya ibyayo, izamenya ibyanyu. Tugomba kumenya ibirimo bibaho, mugomba gusoma cyane mukamenya ibiriho ubungubu, ibintu birimo biragenda bihinduka umunsi ku munsi. Ubungubu uramutse witabye Imana twahita tuvuga ko wishwe na Coronavirus kuko nicyo kigezweho".Â
"Ubu gupfa kose ni Covid-19, ntawucyicwa n'iyindi ndwara, birashoboka ko irimo yica abantu ariko hari abandi barimo bapfa batarwaye Covid-19 ariko bikitirirwa Covid-19. Ni iki kiri inyuma y'ibi bintu? Indwara ifata umukire igafata umukene, igafata umuboyi igafata Perezida, iyi ndwara ni indwara ki?". Yavuze ko kera habagaho indwara z'abakene n'abakire aho Diyabete ari iy'abakire naho bwaki ikaba iy'abakene.Â
Yavuze ko Covid-19 yo idasanzwe kuko ifata abantu bose, yaba ababa i Burayi, Amerika, Afrika n'ahandi. Mu kumvikanisha uburemere bwa Covid-19, yavuze ko na Perezida w'u Bufaransa, Bwana Emmanuel Macron yanduye Covid-19 kimwe n'abandi banyacyubahiro batandukanye. Yavuze ko hari n'umuturage wo mu Rwanda udashobora gushaka kuri Google ngo umubone kuko ari umuntu uciriritse, ariko nawe yanduye Covid-19.
Ati "Iyi ni indwara yaje mu bantu icyarimwe. Ikibazo si iyi ndwara, ikibazo ni ikigiye gukorwa cyangwa se ni amategeko azaza ku bantu bose uhereye ku mukuru kugeza ku muto kuko iyi ndwara ikora ku bantu bose. Yavuze ko afite Email nyinshi cyane ziri mu magana n'amagana z'abamwandikiye bamusaba kubasobanurira ibijyanye n'urukingo rwa Covid-19, ati "Namwe ndangira ngo murabyibaza (yavugaga abakurikiye inyigisho ye), hari abasubije bati "cyane".
Apotre Gitwaza ati "Ikibazo cy'urukingo ni ikibazo kiduhangayikishije, abantu barabivugaho byinshi cyane ko kirimo akantu ka Anti-Kristo, abantu barabivugaho cyane. Gusa icyo nababwira, nta kantu ka Anti-Kristo kari mu rukingo, ntakarimo. Muhumure, ntimugire ubwoba. Ako kantu nikaramuka kaje, itorero ntirizaba riri aha. Muhumure, gusa ni imyiteguro iganira ku bintu ariko urukingo rwo nta kibazo".Â
Yavuze ko urukindo rw'iki cyorezo nta kibazo na kimwe rufite, gusa ngo uwo rwagiraho ingaruka ni nk'uko n'izindi nkingo zisanzwe hari aho zigiraho ingaruka. Yatangaje ko ko kuva avutse ataraterwa urukingo, icyakora yongeraho ko bishobora kuba byaratewe n'uko yavukiye aho zitaba. Yasabye abantu bose kudaterwa ubwoba n'urukingo rwa Covid-19.
Ati 'Ushatse wakwiteza ku giti cyawe ni nk'uko inkingo baziterwa cyangwa sibaziterwe. Kuva navuka sindaterwa urukingo njye, kubera ko navukiye aho zitaba wenda, ariko nta rukingo nari naterwa njyewe, ariko ntirubatere ubwoba ruriya rukingo. Ingaruka zaba zirimo ni nk'uko umuti uwo ari wo wose wagira ingaruka ku mubiri w'umuntu, ariko mu by'ukuri nta kibazo cya Anti-Kristo (ikibazo cy'inyamaswa) kiryamye muri ruriya rukingo, ntacyo".Â
Ati 'Ndagira ngo mbibabwire (aravuga abari mu materaniro) n'abandi babyumva (Abandi bose bazareba iyi nyigisho), ntimutinye, turacyafite Umwuka wera, turacyafite Yesu, dufite Umwuka wera. Umwuka wera ntazemera ko satani adu-kontorola kandi yaradushyireweho nk'ingwate. Umwuka wera ni ingwate Imana yasize kugira ngo bizagaragare ko Yesu yakoye - umugeni - ku Isi, azagaruka kumutwara. Twahawe Umwuka wera nk'intwate, ni inkwano".Â
Apotre Gitwaza yavuze ko ibi atangaje abikoze nyuma yo gusenga, gusoma no kubaza Imana
Yagize ati 'Rero nturi umugeni wa Kristo hanyuma Anti-Kristo agushyiremo ake, ntiwaba umugeni w'abantu babi, uri uwa Kristo. Ibyo bazakora byose, ntibizacamo. Gusa murakomeza mwumva ibintu byinshi ku ma televiziyo, ku ma Youtube n'ibiki, biriya ntibibatere ubwoba, mwumve ibyo tubabwira, kuko turakurikira, turasenga, turanasoma cyane. Nabajije ahantu henshi, narasomye, narasenze, ibi bambwira mu by'ukuri mbibabwiye nyuma yo kumva icyo Imana yambwiye. Ntimuntere amabuye abapinga".Â
Ku bijyanye n'abafite impungenge ko ikigamijwe kuri uru rukingo ari uko bazakontororwa nyuma yo kwikingiza, Gitwaza yabasubije ko n'ubusanzwe ibi byo kubakontorola bikorwa. Yabahaye urugero ati "Iyo telefone ufite ni iya nde?". Yatanze urundi rugero kuri VISA Card, avuga ko iyo uyikoresheje bahita bamenya aho uhagaze. Yongeyeho ko telefone ye bwite, iyo ageze mu rugo imuha raporo y'ahantu yiriwe, aho yaciye hose.
Yanavuze ko iyo ufotoye umuntu, telefone ihita ikwereka aho wamufotoreye. Ati "Control mutinya, Deja muyirimo, ariko icyo mugomba gutinya kuruta ibindi byose ni ugutinya icyaha, kuko Control y'Umwuka wera ni yo ikomeye kuruta iy'abantu, naho abantu bo uko akugenzura (gukontorola) ni ko nawe bamu kontorola. Bibiliya iravuga ngo naremye umucuzi, ndema n'uwica ibyo acura,..Rero muhumure bwoko bw'Imana, mugire amahoro, dufite Yesu wanesheje".
Apotre Dr Gitwaza afite urusengero rw'igitangaza muri Amerika
KANDA HANO UREBE APOTRE GITWAZA AVUGA KU RUKINGO RWA COVID-19
