Aba bakuru b'ibihugu byo mu muryango wa Africa y'Iburasirazuba urimo na Uganda ivuye mu matora y'umukuru w'Igihugu, bashimiye Museveni watsinze aya matora ku majwi 58% mu gihe Robert Kyagulanyi uzwi nka Bobi Wine bari bahanganye, yagize 34.83%.
Perezida Evariste Ndayishimiye w'u Burundi, wanyujije ubutumwa bwe kuri Twitter, yavuze ko yishimiye intsinzi ya Museveni wongeye gutorwa.
Yagize ati 'Abanya-Uganda bakoze amahitamo meza azakomeza gutanga umusanzu ushimishije mu muryango wa Africa y'Iburasirazuba uhuriwemo Uganga n'u Burundi.'
Dr Magufuli wa Tanzania na we washimiye Museveni, yavuze ko yishimiye kuba mugenzi we Museveni yongeye gutorerwa kuyobora Uganda ndetse ko ibihugu byombi bizakomeza kubanirana neza.
Perezida Uhuru Kenyatta wa Kenya na we yashimiye Museveni, avuga ko kongera gutorwa ari ikimenyetso cy'icyizere abaturage ba Uganda bafitiye uyu muyobozi umaze imyaka 35 ku butegetsi.
Kenyatta yavuze ko Museveni yafashije igihugu cye gukomeza kubanira neza Tanzania ndetse amwizeza ko bazakomeza gukorana.
Ibikorwa by'aya matora yo muri Uganda yabaye ku wa Kane, byavuzweho byinshi kubera ihangana ryavugwagamo ryatewe ahanini n'umuhanzi Robert Kyagulanyi uzwi nka Bobi Wine wakunze kuvuga ko igihe kigeze ngo Museveni ave ku butegetsi.
Uyu mugabo wanagiye afungwa inshuro zitandukanye ubwo yari mu bikorwa byo kwiyamamaza, ntarabasha kugira byinshi avuga dore ko asa nk'ufungiye iwe kuko harinzwe n'abasirikare.
Bobi Wine wakoresheje Twitter agaragaza ko ibi ari akarengane ari gukorerwa, yavuze ko atemerewe kugira undi muntu bahura ndetse ko hari umwe mu ntumwaz a rubanda waje kumureba agafatwa n'abasirikare bakamukubita ubu akaba arwariye mu bitaro bya Rubaga.
UKWEZI.RW
