Kuri uyu wa Kane tariki ya 07 Mutarama 2021, hamenyekanye inkuru y' urupfu rw' umunyamakuru witwa Umuhire Valentin wamenyekanye cyane mu ishami ry'amakuru kuri Radio Rwanda, Radio 10 na TV10 ndetse no mu bindi bitangazamakuru bya hano mu Rwanda.
Iyi inkuru yakababaro yatangajwe na murumuna we wavuze ko yari arwariye mu bitaro bya Kigali (CHUK) yari amazemo imunsi.
Mu minsi ishize Umuhire Valentin yari arimo gukurikiranwa n'abaganga i Kanyinya ahasanzwe havurirwa by'umwihariko abarwayi ba Covid-19, ariko amakuru twatangarijwe na murumuna we avuga ko baje kumupima bagasanga nta burwayi bwa Covid-19 afite mu mubiri we ariko akirembye, akaza koherezwa i Kigali.
Umuhire Valentin yari azwi cyane mu itangazamakuru ryo mu Rwanda nk'umwe mu barimazemo igihe. Yamenyekanye cyane avuga amakuru kuri Radio Rwanda ndetse benshi mu banyamakuru bakamufata nk'icyitegererezo akaba n'umwe mu bahanga mu gusoma amakuru.
Yagiye akora no mu bindi bitangazamakuru bitandukanye birimo Radio 10, Radio Huguka, Pax Press, Syfia Grands Lacs, akaba n'umuhanga mu kuyobora ibiganiro. Yari umwe mu bayoboraga ikiganiro Urubuga rw'Itangazamakuru cy'ishyirahamwe ry'abanyamakuru mu Rwanda (ARJ).
Kuri ubu yari atuye mu mujyi wa Musanze akora ibijyanye n'ubuhinzi ariko abifatanya n'itangazamakuru akaba yari afite igitangazamakuru cye gikorera kuri Internet cyitwa 'Valuenews'.
