Abantu 60 banduye COVID-19 mu Rwanda mu bipimo 4.374 byafashwe. Hakize abantu 6 mu masaha 24 ashize.
Minisiteri y'Ubuzima yatangaje ko uyu munsi tariki ya 28 Gashyantare 2021,nta muntu n'umwe wishwe n'icyorezo cya Covid-19 mu Rwanda, bituma abamaze gupfa bose baguma ari 261.
Amakuru ya Covid-19 kuri uyu munsi:
Habonetse abanduye bashya:60
Abanduye bose:18,850
Hakize:6
Abakize bose:17,313
Abamaze gupfa bose:261
Abakirwaye:1,276
Abarembye:8
Ibimenyetso bya Coronavirus birimo inkorora, ibicurane, guhumeka bigoranye n'umuriro. Yandura binyuze mu matembabuzi aturuka mu myanya y'ubuhumekero.
Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n'amazi n'isabune no kwambara udupfukamunwa n'amazuru mu gihe umuntu avuye mu rugo cyangwa ahuye n'abantu benshi.
Ikigo cy'Igihugu Gishinzwe Ibiribwa n'Imiti cya Leta Zunze Ubumwe z'Amerika FDA, cyemeje ikoreshwa ry'urukingo rwa Coronavirus rwakozwe na Johnson & Johnson rutangwa inshuro imwe gusa.
Inkuru dukesha France24 ivuga ko uru rubaye urukingo rwa gatatu rwemerewe gutangwa muri iki gihugu nyuma y'urwa Pfizer na Moderna.
FDA yatangaje ko uru rukingo rushya rufite ubushobozi bwo guhangana na Coronavirus ku kigero cya 85%.
Kugeza ubu sosiyete ikora izi nkingo yemereye Leta Zunze Ubumwe z'Amerika ko kugeza muri Werurwe bazaba bamaze kubashyikiriza doze zigera kuri miliyoni 20,naho mu mpeshyi bakazaba barabahaye doze miliyoni 100 .
Perezida wa Leta Zunze Ubumwe z'Amerika,Joe Biden yatangaje ko iyi ari inkuru nziza ariko ko urugamba rutararangira bakwiye gukomeza kubahiriza ingamba zo kwirinda Coronavirus.
Usibye Leta Zunze Ubumwe z'Amerika hari ibindi bihugu byemeje gutumiza uru rukingo birimo nk'u Bwongereza bwatumije doze miliyoni 30,Umuryango w'Ubumwe bw'Uburayi watumije doze miliyoni 200,Canada yatumije doze miliyoni 38 n'Ibihugu bihuriye muri gahunda ya Covax byatumije doze miliyoni 500.
