Kuri uyu wa Gatandatu tariki ya 13 Gashyantare 2021,Minisiteri y'Ubuzima yatangaje ko abantu 540 aribo bakize Coronavirus,nta muntu Coronavirus yahitanye mu gihe umubare w'abanduye ari 67.
Uyu munsi nibwo bwa mbere kuva iki cyorezo kigeze mu Rwanda kuwa 14 Werurwe 2020, habonetse umubare munini w'abakize.Abarwayi bari munsi y'ijana byaherukaga kuboneka mu Rwanda tariki 9 Mutarama 2021 ubwo habonekaga abarwayi 93.
barwayi babonetse kuri uyu wa Gatandatu, 19 babonetse i Kigali, Nyamagabe haboneka 8, Muhanga 7, Karongi 7, Kayonza 4, Ruhango 3, Ngoma 3, Ngororero 2, Kamonyi 2, Rusizi 2, Burera 2, Gakenke 2, Huye 2. Nyaruguru 2, Rubavu 1, Gicumbi 1.
Kugeza kuri uyu wa Gatandatu tariki 13 Gashyantare, abantu 17 267 nibo bamaze kwandura Coronavirus kuva muri Werurwe 2020. Abakize ni 14 447, abakirwaye ni 2554 mu gihe abapfuye ari 236. Minisante yatangaje ko abantu 14 aribo barembye.
Ibimenyetso bya Coronavirus birimo inkorora, ibicurane, guhumeka bigoranye n'umuriro. Yandura binyuze mu matembabuzi aturuka mu myanya y'ubuhumekero.
Minisitiri w'Intebe wa Canada, Justin Trudeau, yatangaje ko bagiye kongera umubare w'inkingo za Covid-19 zakozwe n'uruganda rwa Pfizer-BioNTech na Moderna zemewe gukoreshwa muri iki gihugu.
Trudeau atangaje ibi nyuma y'iminsi ishize ari ku gitutu, bitewe n'uko igihugu cya Canada kitarakwirakwiza inkingo mu baturage benshi kandi ari kimwe mu bihugu bifite inkingo nyinshi ku rwego rw'Isi. Ni nyuma y'uko Trudeau yari yahamirije abaturage bose b'igihugu cye ko kugera muri Nzeri uyu mwaka, abazakenera inkingo bose bazaba bazihawe.
Kugeza uyu munsi Canada imaze gukingira abantu miliyoni 1,18 mu barenga miliyoni 37 bayituye, bivuze ko abaturage batatu mu bantu ijana ari bo bamaze gukingirwa.
Ni mu gihe nko muri Leta Zunze Ubumwe za Amerika, abantu 14 mu ijana (14/100) ari bo bamaze gukingirwa, naho abandi bantu 21 mu bantu ijana (21/100) bakaba bamaze gukingirwa mu gihugu cy'u Bwongereza.
Trudeau yavuze ko Canada izakira izindi nkingo miliyoni esheshatu muri Werurwe, ku buryo bizatuma iki gihugu gikingira hafi ya buri wese uzabishaka. Bivugwa ko iki gihugu kimaze kugura inkingo zikubye gatanu umubare w'abaturage bayo.
Canada kandi ni cyo gihugu cyonyine kiri mu bihugu birindwi bikize ku Isi (G7) kigaragara ku rutonde rw'ibihugu bizahabwa inkingo muri gahunda ya Covax igamije gukwirakwiza inkingo hose ku Isi, no mu bihugu bifite amikora macye.
