Ni icyemezo cyafashwe n'Urukiko rw'Ibanze rwa Gacurabwenge rwanzuye ko Niyobuhingiro Obedy ukekwaho kurigisa amabuye y'agaciro na Ruswa, arekurwa.
Itwabwa muri yombi ry'Umunyambanga Nshingwabikorwa w'Umurenge wa Ngamba, Niyobuhingiro Obed ndetse n'abandi bantu bane barium umukuru wa DASOO mu Murenge Jean Damascene, n'uyobora Inkeragutabara (Reserve Force) mu Murenge witwa Jean Marie Vianney n'umuturage witwa Hagenimana, ryatangajwe na RIB mu kwezi k'Ugushyingo 2020.
Niyobuhingiro Obedy, Umunyamabanga Nshingwabikorwa w'Umurenge wa Ngamba wo mu Karere ka Kamonyi yaregwaga kwakira Ruswa y'ibihumbi 300 Frw, ngo yaba yarahawe kugira ngo arekure amabuye y'agaciro ayahe umuturage witwa Hagenimana bari bafunganye.
Icyaha kindi cyari ugusibanganya ibimenyetso, kuko byavugwaga ko ageze mu nzira afite uko yahinduranyije ibyari amabuye y'agaciro bihinduka umucanga bigeze kuri Polisi.
Uyu mugabo wanaregwaga icyaha cyo kunyereza amabuye y'agaciro, Ubushinjacyaha buvuga ko bwabuze ibimenyetso ku cyaha cya ruswa kuko haba mu buryo bw'ikoranabuhanga cyangwa mu ntoki, butigeze bubona ibimenyetso by'uko yakiriye iriya ruswa ya 300 000 Frw.
Naho ku cyaha cyo kuzimanganya ayo mabuye, icya mbere ngo ntiyapimiwe aho yayafatiye ngo bibe bizwi ko ari amabuye y'agaciro. Ikindi ntibizwi aho yarigitishirijwe.
Amabuye ngo yavuye mu rugo ajya kuri Polisi nta we uzi uko yahindutse umucanga. Abaye yarahinduwe ntawe uzi ko yahinduriwe mu nzira cyangwa kuri Polisi, kandi iperereza ryabaye nyuma y'igihe ageze kuri Polisi.
Icyaha cyo Kuyanyereza, iki ngo kiregwa umuntu ufite umurimo yahabwa ikintu kijyanye n'uwo murimo akakinyereza, bakurikije ibiri muri dosiye basanze ibigize icyo cyaha bituzuye.
Urukiko rwanzuye ko aba bagabo bose barimo uriya Munyamabanga Nshingwabikorwa w'Umurenge barekurwa.
UKWEZI.RW
