Umuvugizi w'Igisirikare cy'u Rwanda, Lt Col Ronald Rwivanga, yemereye ikinyamakuru Ukwezi ko Lt Gen Musemakweli yitabye Imana ninjoro. Tumubajije niba yari amaze iminsi arwaye, yavuze ko nyuma yo kumenya urupfu rwe bakigenzura ngo hamenyekane icyamwishe.
Lieutenant General Jacques MUSEMAKWELI wari Umugenzuzi Mukuru w'Ingabo z'u Rwanda (RDF), yagiye kuri uyu mwanya yari Umugaba w'Ingabo zirwanira ku butaka.
Mbere y'uko ahabwa uyu mwanya, yari umuyobozi w'ingabo zirinda umukuru w'igihugu, mbere yaho nabwo akaba yari umuyobozi wa J5 mu ngabo z'igihugu, aho yari ashinzwe imibanire hagati y'igisirikare, leta n'abasivile.
Mu myaka ya za 2010 yayoboraga ishami rishinzwe ubutasi bwa gisirikare (J2), mbere y'aho akaba yari mu ngabo zirwanira mu kirere. Mu mashuri yize hari ayo yakurikiye muri Air War College iherereye Alabama muri Leta Zunze Ubumwe za Amerika.
