Ijoro rya tariki 13 Gashyantare 2021 rizahora mu ntekerezo ze! Yasohoye amashusho y'amasegonda 34' kuri konti ye ya Instagram ashima Imana na buri wese wamutinyuye, kuko yari atangiye gukorera Ikigo cy'Igihugu cy'Itangazamakuru, RBA aho avuga amakuru mu rurimi yisanzuyemo rw'Icyongereza. Aya mashusho amugaragaza avuga inkuru y'Inteko Ishinga Amategeko y'u Rwanda yamaganye icyemezo cy'Inteko Ishinga Amategeko y'Ubumwe bw'Uburayi (EU/UE) kijyanye na Paul Rusesabagina [Ejo mu rukiko yahakanye Ubunyarwanda ku nshuro ya Gatanu] urugerwa ibyaha by'iterabwoba, ivuga ko 'cyuzuyemo ibinyoma no kwirengagiza nkana ukuri'.
Byerekana ko ari umukobwa udacika intege nk'uko nawe abyivugira. Muri 2015 yitabiriye irushanwa rya Miss Rwanda ntiyegukana ikamba, ageze mu rugo yahise atangira urugendo rushya rwo kwitabira Miss Rwanda 2016.
Yakoze imyitozo ngororamubiri, asoma ibitabo, areba amashusho y'abakobwa bamubanjirije maze mu 2016 ajya ku rutonde rw'abahataniye ikamba. Yahatanye ari kumwe na Mutesi Jolly yigaga imbere, aba ari nawe mukobwa wegukana ikamba.
Mutoni Jane avuga ko yari abyibushye cyane, ku buryo gukora siporo byatumye atakaza ibiro 9. Umubyihuho yari afite muri icyo gihe utandukanye n'ibiro yari afite.
Uyu mukobwa yabwiye INYARWANDA ko yiyiziho kudacika intege, biri no mu byatumye ahatana muri Miss Rwanda ku nshuro ya kabiri.
Ati 'Buriya ukuntu nteye ntabwo njya mva ku izima...Ni ibintu nakundaga, si ukuvuga ngo ni amarushanwa gusa birarangiye. Numvaga nishimiye kuba mu irushanwa. Kugaruka, mbese ni nka njye wihaye andi mahirwe."
Mu irushanwa rya Miss Rwanda 2016 yabashije kwegukana ikamba rya Nyampinga w'Umuco [Miss Heritage 2016]. Muri uwo mwaka yemezwa guserukira u Rwanda muri Miss Heritage Global 2016-2017 abasha kwegukana ikamba ry'igisonga cya mbere.
Muri Miss Rwanda 2016 yahuriyemo n'abakobwa barimo Isimbi Eduige, Kundwa Doriane wegukanye ikamba n'abandi. Uyu mukobwa avuga ko we na Isimbi bemeranyije kujya gusaba kwimenyereza umwuga w'itangazamakuru mu Ikigo cy'Igihugu cy'Itangazamakuru, RBA ariko basanga batari kwakira abasitajeri.
Mutoni avuga ko batiyumvishaga ukuntu babangiye, bituma bahagenda mu gihe cy'ingana n'icyumweru. Ngo hari igihe babonaga abanyamakuru bagiye gutara amakuru bakabasaba kubaherekeza, rimwe baza kubona ko koko n'abasitajeri bari kwakirwa babivamo.
Mutoni Jane yitabiriye Miss Rwanda 2015 na Miss Rwanda 2016 yegukana ikamba rya Miss Heritage 2016Uyu mukobwa yavuze ko yahise atangira kwiga itangazamakuru muri Mount Kenya, Isimbi Eduige ajya mu bindi. Ati 'Ni ukuvuga ngo twashatse kwisunikamo ahubwo urebye [Akubita agatwenge] … hari abajyaga kuri 'field' tuti basi reka tubaherekeze kuko urumva bari badukatiye ariko twanze kumva. Bari batubwiye ko nta sitaje ihari ariko twe dushaka kwigira aba miss cyane rero biranga.'
Jane avuga ko yakuze akunda itangazamakuru, ndetse ko mu mashuri yisumbuye yajyaga yifashishwa mu gusomera abandi inkuru. Yakuze akunda kureba abanyamakuru barimo Evelyn Umurerwa, Fiona Mbabazi byatumaga yumva ashatse gutera ikirenge mu cyabo.
Uyu mukobwa yavuze ko muri Kamena 2020, yasubiye kuri RBA gusaba sitaje baramwemerera atangira kuhakora kuva ubwo. Yavuze ko gukora muri RBA zari inzozi ze, kandi ko ashima Imana kuba yarabashije kuzirotora.
Mutoni Jane avuga ko nta muntu ukwiye gucika intege mu gihe cyose azi icyo ashaka kandi akaba agikunda. We avuga ko umuntu akwiye gushyira imbere gukorera icyo akunda, ntashyire imbere cyane amafaranga. Ikirenze kuri ibyo, ugashyira imbere isengesho.
Ati 'Nta mwuga utavuna. Buri kintu cyose cyiza kiravuna. Ariko biba akarusho, iyo ucyiyumvamo. Kuko iyo ubikunda ntabwo ucika intege. Ariko buriya nta kintu cyoroshye ku Isi.'
Isimbi Eduige na Mutesi Jolly Miss Rwanda 2016 bamushimiye kudacika intege:
Abatandukanye barimo Isimbi Eduige uri mu bakobwa bahataniye ikamba rya Miss Rwanda 2016, yabwiye Mutoni Jane ko ari urugero rwiza rw'umugore buri wese yakwigiraho 'mu kugera ku nzozi ze'. Avuga ko kudacika intege bigera aho bigatanga umusaruro.
Isimbi yavuze ko mu bantu azi batacitse intege basabye kwimenyereza umwuga w'itangazamakuru kuri RBA, harimo na Mutoni Jane. Ati 'Ndibuka mu myaka ishize tujya gusaba akazi ko kwimenyereza kuri RBA ni we wenyine utaracitse intege.'
Ngo Mutoni Jane yakoresheje uburyo butandukanye kugira ngo atakaze ibiro abone uko yitabira Miss Rwanda ku nshuro ya kabiri, atsindire ikamba rinini anabashe guhatanira ikamba rikomeye ku rwego mpuzamahanga. Ati 'Ni urugero rwiza kandi yakwigirwaho byinshi. Turakwishimira Mutoni Jane.'
Mutesi Jolly wabaye Nyampinga w'u Rwanda 2016 yavuze ko yemeranya n'ibyo Isimbi Eduige yavuze. Avuga ko urugendo rwa Mutoni Jane ari isomo ko "inzozi zacu zirashoboka".
Yavuze ko icyo umuntu asabwa ari ukudacika intege. Ati 'Ndakwishimira Jane, uri urugero rwiza. Sinkunda gutwarwa n'amarangamutima gusa kuba nzi urugendo rwawe nkakomeza ku kubona ushikama ku nzozi zawe kugeza uzigezeho binteye kurira, uri impirimbanyi, nk'abakobwa bakiri bato dufite byinshi byo ku kwigiraho.'
Mutoni Jane avuga ko nk'abandi bana bose yakuranye inzozi zitandukanye zirimo kwifuza kuza umuyobozi ukomeye 
Mu mashuri yisumbuye yize ibijyanye n'indimi ageze muri Kaminuza ya Mount Kenya yiga itangazamakuru 
Mutoni yavuze ko yahisemo kujya avuga amakuru mu rurimi rw'Icyongereza kubera ko ari rwo rurimi rumworohera cyane kuruvuga no kurwumva 
Uyu mukobwa yasabye buri wese ufite inzozi kudacika intege, ahubwo agaharanira kuzigeraho
KANDA HANO UREBE IKIGANIRO CYIHARIYE TWAGIRANYE NA MUTONI JANE WATANGIYE GUKORA KURI TELEVIZIYO
VIDEO: Aime Films-INYARWANDA.COM
