Mu ijoro ryakeye ubwo Ikipe y'Igihugu 'Amavubi' yakinaga umukino wa ¼ cya CHAN 2020 n'ikipe ya Guinea, umutekano wari wakajijwe mu bice bitandukanye by'Umujyi wa Kigali. Ubwo Amavubi yaherukaga gutsinda Togo ku wa Kabiri, akabona itike yo gukina ¼ cya Shampiyona Nyafurika iri kubera muri Cameroun, benshi mu batuye Umujyi wa Kigali uri muri gahunda ya Guma mu Rugo, biraye mu mihanda bishimira iyo ntsinzi mu buryo budasanzwe. Inzego zitandukanye zirimo Polisi y'Igihugu, Ubuyobozi bw'Umujyi wa Kigali n'Ikigo cy'Igihugu cy'Ubuzima (RBC), zagaragaje impungenge ko muri uko kwishimira intsinzi y'Amavubi hashobora kuba (cyangwa harabayeho) gukwirakwiza icyorezo cya COVID-19 dore ko abantu benshi bahuriye hamwe kandi bakirengagiza amabwiriza arimo guhana intera no kwambara udupfukamunwa. Mu duce dutandukanye tw'umujyi wa Kigali, inzego za Polisi y'igihugu ndetse n'abakorerabushake b'urubyirko (youth volunteers) bari maso biteguye kuza guhosha ikintu cyose kijyanye no kurenga ku mabwiriza yo kwirinda COVID-19 harimo nko kwirara mu mihanda byagaragaye ubwo Amavubi yatsindaga Togo kuwa kabiri w'icyumweru gishize.
DORE UKO BYARI BIMEZE MURI TUMWE MU DUCE TW'UMUJYI WA KIGALI
AMAFOTO: IGIHE
